ខេត្តព្រះសីហនុ ៖ គ្រូពេទ្យបង្អែកខេត្តព្រះសីហនុ បានឲ្យដឹងថា មានកម្មការិនីម្នាក់ បំរើការងារ នៅរោងចក្រ ក្នុងតំបន់សេដ្ឋកិច្ចពិសេស ឃុំបិតត្រាំង ស្រុកព្រៃនប់ បានឈឺពោះ សម្រាលកូននៅតាមចញ្ចើមផ្លូវថ្នល់ នៅម៉ោងប្រមាណ ៩ព្រឹកថ្ងៃទី១៩ ខែធ្នូ ឆ្នាំ២០១៧។
គ្រូពេទ្យ ឲ្យដឹងថា ស្ត្រីរូបនេះមានផ្ទះនៅភូមិតាលះ ឃុំរាម ស្រុកព្រៃនប់ ហើយពេលឈឺពោះឆ្លងទន្លេ ក៏បានធ្វើដំណើរមកកាន់មន្ទីរពេទ្យ ដើម្បីសម្រាលកូន ប៉ុន្តែមកមិនទាន់ ក៏ត្រូវសម្រាលកូនខ្ចី នៅតាមផ្លូវ ម្តុំខាងមុខរោងចក្របិតត្រាំង ស្រុកព្រៃនប់តែម្តង។
ប្រភពដដែល បានឲ្យដឹងថា ក្រោយស្ត្រីរូបនេះ ឆ្លងទន្លេរភ្លាមៗ និងដោយសារវិស័យទូរគមនាគមន៍ មានការជឿនលឿន ក៏មានអ្នកផ្តល់ព័ត៌មានមកកាន់មន្ទីរពេទ្យបង្អែក ខេត្តព្រះសីហនុ ហើយក៏បានបញ្ចូនពេទ្យឆ្មប អោយចុះទៅជួយអន្តរាគមន៍ ជួយសម្រាលតាមបច្ចេកទេសពេទ្យ ដោយសុវត្ថិភាព មុននឹងដឹកតាមរថយន្តសង្គ្រោះមកសម្រាកបន្ត នៅមន្ទីរពេទ្យបង្អែកខេត្តនេះ។
ប្រធានមន្ទីរពេទ្យបង្អែកខេត្តព្រះសីហនុ លោក សេង ណុង បានអោយដឹងថា ស្ត្រីជាកម្មការីនីរោងចក្ររូបនេះ មានឈ្មោះ ឆៀង ឆវី អាយុ ២៣ឆ្នាំ និងមានប្តីឈ្មោះ សេង រុន អាយុ ២២ឆ្នាំ មានទីលំនៅភូមិតាលះ ឃុំរាម ស្រុកព្រៃនប់។
លោក សេង ណុង បន្តថា ស្ត្រីរូបនោះ ប្រសូត្រ បានកូនប្រុស និងជាកូនទី៣ ក្នុងគ្រួសារ ហើយភ្លាមៗ ត្រូវម្តាយទារករូបនោះ ដាក់ឈ្មោះថា សំណាង ព្រមទាំងមានទម្ងន់ ២,៨គីឡូក្រាម។
លោក សេង ណុង ឲ្យដឹងថា បច្ចុប្បន្ន ទាំងស្ត្រីជាម្តាយ និងទាំងទារក គឺមានសុខភាពល្អជាធម្មតា និងកំពុងសម្រាក នៅមន្ទីរពេទ្យបង្អែកខេត្តព្រះសីហនុ៕ ដែន សីមា