ភ្នំពេញ ៖ លោកស៊ិក ប៊ុនហុក ប្រធានគណៈកម្មាធិការជាតិរៀបចំការបោះឆ្នោត និងសមាជិក គ.ជ.ប រួមទាំងថ្នាក់ដឹកនាំអគ្គលេខាធិការដ្ឋាន គ.ជ.ប បានទទួលជួបពិភ្សាការងារជាមួយលោក គីម យ៉ុងហ៊ី (Kim YongHi) អគ្គលេខាធិការសមាគម នៃគណៈកម្មាធិការជាតិរៀបចំការបោះឆ្នោតពិភពលោក ហៅកាត់ថា A-WEB កាលពីព្រឹកថ្ងៃទី១៩ ខែធ្នូ ឆ្នាំ២០១៧ នៅស្តីការ គ.ជ.ប ។
ជំនួបនេះធ្វើឡើងក្នុងគោលបំណងស្វែងយល់ពីស្ថាប័ន A-WEB និងការបញ្ចុះបញ្ចូល គ.ជ.ប ឱ្យក្លាយជាសមាជិកនៃ A-WEB ។
លោក គីម យ៉ុងហ៊ី បានឱ្យដឹងថា A-WEB មានសមាជិក ចំនួន ១០៩ មកពី ១០៣ប្រទេសបាននឹងកំពុងធ្វើការងារយ៉ាងច្រើន ដើម្បីធ្វើយ៉ាងណាសហការគ្នា ក្នុងគោលបំណងឱ្យការបោះឆ្នោតក្នុងប្រទេសនីមួយៗប្រព្រឹត្តទៅឱ្យកាន់តែមានសុក្រឹត្យភាព និងមានតម្លាភាព ។
ឆ្លើយតបនឹងចំណុចនេះលោក ស៊ិក ប៊ុនហុក ប្រធាន គ.ជ.ប បានសង្កត់ធ្ងន់ថា ដូចដែល A-WEB បាននឹងកំពុងធ្វើ និងទស្សនវិស័យរបស់ខ្លួន គឺមិនខុសពីការចង់បាន និងទស្សនវិស័យរបស់ គ.ជ.ប នោះទេ ។ លើសពីនេះទៅទៀត គ.ជ.ប ខិតខំបំពេញភារកិច្ចរបស់ខ្លួន ក្នុងគោលដៅឱ្យប្រជាពលរដ្ឋកម្ពុជាមានឈ្មោះក្នុងបញ្ជីបោះឆ្នោត បានមកបោះឆ្នោត និងសម្លេងរបស់ពួកគាត់ត្រូវបានរាប់យ៉ាងត្រឹមត្រូវ ។
ឆ្លៀតក្នុងឱកាសជំនួបលើកទី១នេះលោកប្រធាន គ.ជ.ប បានគូសបញ្ជាក់ថា គ.ជ.ប បានរៀបចំការបោះឆ្នោតជាច្រើនលើកច្រើនសារមកហើយ ថ្មីៗនេះ ការបោះឆ្នោតជ្រើសរើសក្រុមប្រឹក្សាឃុំ សង្កាត់ កាលពីថ្ងៃទី៤ ខែមិថុនា ឆ្នាំ២០១៧ បានប្រព្រឹត្តទៅដោយសេរី ត្រឹមត្រូវ និងយុត្តិធម៌ ដោយគ្មានភាគីណាមួយតវ៉ានោះទេ ហើយ គ.ជ.ប នៅតែបន្តមាគ៌ានេះតទៅទៀតសម្រាប់ការបោះឆ្នោតនៅពេលបន្តបន្ទាប់។
ពាក់ព័ន្ធនឹងការវិវត្តន៍ថ្មីៗនេះ ដែលសហភាពអឺរ៉ុបបានប្រកាសព្យួរជំនួយមក គ.ជ.ប លោកប្រធាន គ.ជ.ប បានជម្រាបជូន លោកអគ្គលេខាធិការ A-WEB ថា គ.ជ.ប នៅតែបន្តការងាររបស់ខ្លួនជាប្រក្រតី ហើយភាគីជាច្រើនរួមមាន ជប៉ុន ចិន កូរ៉េខាងត្បូង និងរុស្ស៊ី ហើយជាពិសេសអង្គការ JICA ដែលពីមុននឹង បច្ចុប្បន្ននៅតែបន្តជួយ គ.ជ.ប ទៀតក្នុងការងារបច្ចេកទេស និងថវិកាដោយមិនលូកលាន់ក្នុងកិច្ចការផ្ទៃក្នុងរបស់ គ.ជ.ប ទេ ។
លោក ស៊ិក ប៊ុនហុក ក៏បានវាយតម្លៃខ្ពស់ចំពោះសមាគម A-WEB ផងដែរ ដែលបានចែងយ៉ាងច្បាស់ពីធម្មនុញ្ញរបស់ខ្លួនត្រង់មាត្រា៣-១ ថា “សមាគម A-WEB ជាសមាគមមិនធ្វើនយោបាយ មានស្វ័យភាព និងឯករាជ្យដែលរួមបញ្ចូលសមាជិកពីគណៈកម្មាធិការជាតិរៀបចំការបោះឆ្នោតពិភពលោក និងគ្មានឆន្ទៈលូកដៃចូលក្នុងដែនអធិបតេយ្យរបស់ប្រទេសជាសមាជិកនោះទេ” ហើយឯកឧត្តមបន្ថែមថា គ.ជ.ប នឹងសហការជាមួយ A-WEB ជាជំហានៗ មុននឹងក្លាយខ្លួនជាសមាជិកនៃសមាគមនេះ។
លោក គីម យ៉ុងហ៊ី អគ្គលេខាធិការ A-WEB បានថ្លែងកោតសរសើរ និងវាយតម្លៃខ្ពស់ចំពោះ គ.ជ.ប និងគាំទ្រ ព្រមទាំងរង់ចាំសហការជាមួយ គ.ជ.ប ៕ ដោយ ៖ កូឡាប
