ភ្នំពេញ ៖ លោក ឆាយ ថន ទេសរដ្ឋមន្ត្រី រដ្ឋមន្ត្រីក្រសួងផែនការ អញ្ជើញជាអធិបតីដ៏ខ្ពង់ខ្ពស់ក្នុងពិធីផ្សព្វផ្សាយក្របខ័ណ្ឌគោលដៅអភិវឌ្ឍប្រកបដោយចីរភាពកម្ពុជា(គ.អ.ច.ក.) ២០១៦-២០៣០ កាលពីថ្ងៃចន្ទទី១១ ខែមីនា ឆ្នាំ២០១៩ នៅរាជធានីភ្នំពេញ។
ក្នុងពិធីនេះ លោកទេសរដ្ឋមន្ត្រីបានមានប្រសាសន៍ថា ក្របខ័ណ្ឌគោលដៅអភិវឌ្ឍប្រកបដោយចីរភាពកម្ពុជា ២០១៦-២០៣០ នេះនឹងរួមចំណែកយ៉ាងពេញលេញ ក្នុងការជំរុញសន្ទុះនៃការអភិវឌ្ឍ ដើម្បីឱ្យកម្ពុជាក្លាយជាប្រទេសដែលមានចំណូលមធ្យមកម្រិតខ្ពស់នៅឆ្នាំ២០៣០ និង ឈានទៅប្រទេសដែលមានចំណូលខ្ពស់ នៅឆ្នាំ២០៥០ ជាមួយគ្នានឹងអត្រានៃភាពក្រីក្ររបស់ប្រជាជនកម្ពុជានឹងត្រូវបានកាត់បន្ថយជាបន្តបន្ទាប់ទៀត និងឈានទៅលុបបំបាត់បំបាត់ទាំងស្រុង ហើយកម្រិតជីវភាពរបស់ប្រជាជនក៏នឹងត្រូវបានការលើកកម្ពស់កាន់តែប្រសើរឡើង តាមរយៈ ការធ្វើសមាហរណកម្មក្របខ័ណ្ឌនេះ ទៅក្នុងប្រព័ន្ធផែនការជាតិដើម្បីអនុវត្ត។
យើងអបអរសាទរ និងប្រកាសដាក់ឱ្យអនុវត្តជាផ្លូវការ នូវសមិទ្ធផលដែលយើងទាំងអស់គ្នាបានខិតខំរួមគ្នាបង្កើតឡើង។ សមិទ្ធផលនេះគឺជាការបង្ហាញឱ្យឃើញច្បាស់ ពីការប្តេជ្ញាចិត្តរបស់រាជរដ្ឋាភិបាលកម្ពុជា ក្នុងនាមជាសមាជិកមួយរបស់អង្គការសហប្រជាជាតិក្នុងការអនុវត្ត និងរួមចំណែកធ្វើឱ្យសម្រេចបានរបៀបវារៈឆ្នាំ២០៣០ របស់អង្គការសហប្រជាជាតិ។ ជាមួយគ្នានេះ លទ្ធផលនេះក៏បានស្តែងឱ្យឃើញពីការរួបរួមសាមគ្គី និងសហការគ្នាយ៉ាងជិតស្និទ្ធពីគ្រប់ភាគីទាំងអស់នៅក្នុងប្រទេសនិងក្រៅប្រទេស ទាំងក្រសួងស្ថាប័នរបស់រាជរដ្ឋាភិបាលកម្ពុជា ដៃគូអភិវឌ្ឍ សង្គមស៊ីវិល អង្គការមិនមែនរដ្ឋាភិបាល ផែ្នកឯកជន និងភាគីដែលមានចំណែកពាក់ព័ន្ធផ្សេងទៀត ក្នុងការរួមចំណែករៀបចំក្របខ័ណ្ឌគោលដៅអភិវឌ្ឍប្រកបដោយចីរភាពកម្ពុជា នេះក្នុងបុព្វហេតុជំរុញការអភិវឌ្ឍនិងលើកស្ទួយកិត្យានុភាពប្រទេសជាតិ តាមគោលការណ៍គ្មាននរណាម្នាក់ត្រូវបានទុកឱ្យនៅក្រៅការអភិវឌ្ឍ និងគ្មាននរណាម្នាក់មិនទទួលបានផលពីការអភិវឌ្ឍ។
នៅទីបញ្ចប់លោកទេសរដ្ឋមន្ត្រីមានមតិផ្តាំផ្ញើ និងមានជំនឿយ៉ាងមុតមាំថា ឯកឧត្តម លោកជំទាវ អ្នកឧកញ៉ា លោក លោកស្រី ទាំងអស់នឹងធ្វើសមាហរណកម្ម គ.អ.ច.ក. ទៅក្នុងផែនការរបស់ស្ថាប័នរៀងៗខ្លួន ដើម្បីអនុវត្ត។ ខ្ញុំសង្ឃឹមយ៉ាងមាំថា តាមរយៈកម្ពុជានឹងទទួលបានលទ្ធផលល្អជាថ្មីទៀត ក្នុងការធ្វើឱ្យសម្រេចបាន គ.អ.ច.ក. និងបានអាចសម្រេចបានតាមទស្សនទានឆ្នាំ២០៣០ក្លាយជាប្រទេសដែលមានចំណូលមធ្យមកម្រិតខ្ពស់ និងជាប្រទេសចំណូលខ្ពស់ នៅឆ្នាំ២០៥០។
លោកទេសរដ្ឋមន្ត្រី បានបន្ថែមថា បើយើងពិនិត្យមើលឡើងវិញ ពីលទ្ធផលនៃការអនុវត្ត គោលដៅអភិវឌ្ឍន៍សហស្សវត្សរ៍កម្ពុជាស្ទើរតែគ្រប់គោលដៅទាំងអស់ត្រូវបានធ្វើឲ្យសម្រេចបាន រហូតដល់អង្គការសហប្រជាជាតិបានចាត់ថ្នាក់កម្ពុជាគឺជាប្រទេសមួយក្នុងចំណោមបណ្តាប្រទេសដែលសម្រេចបានគោលដៅច្រើនជាងគេ នៃគោលដៅអភិវឌ្ឍន៍សហស្សវត្សរ៍។ ជាការពិតផ្នែកតាមការវាយតកម្លៃចុងក្រោយ ឆ្នាំ២០១៥ នៅមានគោលដៅនិងចំណុចដៅមួយចំនួន ដែលយើងមិនទាន់អាចសម្រេចបានឬសម្រេចបាន ពេញលេញមិនទាន់ពេញលេញ។ រាជរដ្ឋាភិបាលកម្ពុជាបានចាត់ទុកបញ្ហាដែលនៅសេសសល់ គឺជាអាទិភាពខ្ពស់ និងប្តេជ្ញាចិត្តយ៉ាងមោះមុត ក្នុងការដោះស្រាយ ទន្ទឹមនឹងការចាប់ផ្តើមអនុវត្ត គោលដៅថ្មីបន្តទៀត។
លោករដ្ឋមន្ត្រី បានបន្ថែមថា ក្របខ័ណ្ឌគោលដៅអភិវឌ្ឍប្រកបដោយចីរភាពកម្ពុជា គឺជាឯកសារ ដែលត្រូវបានរៀបចំឡើងផ្អែលើគោលដៅអភិវឌ្ឍប្រកបដោយចីរភាពសាកល ដោយបានកំណត់ជ្រើសរើសបណ្តាគោលដៅ ចំណុចដៅ និងសូចនាករបញ្ចូលក្នុងអាទិភាពជាតិ តាមលក្ខខណ្ឌដែលបានកំណត់និងដែលរំពឹងថាអាចនឹងសម្រេចបានដោយផ្អែកលើប្រភពធនធានសម្រាប់គាំទ្រ និងប្រភពទិន្នន័យសម្រាប់បម្រើឲ្យការតាមដាន ត្រួតពិនិត្យនិងវាយតម្លៃ។ ក្រសួងផែនការត្រូវបានរាជរដ្ឋាភិបាលកម្ពុជា ផ្តល់សិទ្ធិប្រទាន ក្នុងការដឹកនាំសម្របសម្រួលក្នុងដំណើរការរៀបចំធ្វើមូលដ្ឋាននីយកម្មគោលដៅអភិវឌ្ឍប្រកបដោយចីរភាព និងរៀបចំ ក្របខ័ណ្ឌគោលដៅអភិវឌ្ឍប្រកបដោយចីរភាពកម្ពុជា។
លោកឆាយ ថន បានលើកឡើងថា តាមរយៈកិច្ចខិតខំប្រឹងប្រែងរួមគ្នាំ កម្ពុជា បានស្នើឡើងនូវ គ.អ.ច.ក. ដែលមានគោលដៅចំនួន ១៨ ដែលក្នុងនោះ គោលដៅចំនួន ១៧ ទទួលយកពីក្របខ័ណ្ឌសាកល និងបន្ថែមគោលដៅជាតិមួយពាក់ព័ន្ធនឹងការបញ្ចប់ ផលប៉ះពាល់អវិជ្ជមាន នាំគ្រាប់មីននិងសំណល់ជាតិផ្ទុះពីសង្គ្រាម និងជំរុញការសង្គ្រោះជនរងគ្រោះ ចំណុចដៅចំនួន ៨៤ រួមបញ្ចូលនូវចំណុចដៅសាកលចំនួន៨៤ ដែលមានការគាំទ្រទិន្នន័យ និងចំណុចដៅបន្ថែមចំនួន៤ និងសូចនាករចំនួន ១៤៨ រួមបញ្ចូលនូវសូចនាកររបស់សាកល និងបន្ថែមសូចនាកររបស់ជាតិដែលជាសូចនាករថ្មី និងសូចនាករបំបែក៕ ដោយ៖កូឡាប