ភ្នំពេញ ៖ នៅក្នុងឆ្នាំ២០១៧នេះ អង្គភាពស៊ីម៉ាក់ សម្រេចបោសសំអាតផ្ទៃដី មានបញ្ហាគ្រាប់មីន និងផ្ទៃដីចំការគ្រាប់ បានចំនួន ៨.៦៣៦ហិកតា និងកម្ទេចចោលគ្រាប់មីន និងគ្រាប់យុទ្ធភណ្ឌគ្រប់ប្រភេទបានចំនួន ៣៧.៤៤៨ គ្រាប់។
លោក ហេង រតនា ប្រតិភូរាជរដ្ឋាភិបាល ទទួលបន្ទុកជាអគ្គនាយកមជ្ឈមណ្ឌលកម្ចាត់មីនកម្ពុជា (ស៊ីម៉ាក់) បានបញ្ជាក់ថាបានបន្ដថា លទ្ធផលការងារឆ្នាំ២០១៧និងផែនការឆ្នាំ២០១៨ របស់ស៊ីម៉ាក់ គឺនៅក្នុងឆ្នាំ២០១៧នេះ អង្គភាពស៊ីម៉ាក់ សម្រេចបោសសំអាតផ្ទៃដី មានបញ្ហាគ្រាប់មីន និងផ្ទៃដីចំការគ្រាប់ បានចំនួន ៨.៦៣៦ហិកតា ក្នុងនោះផ្ទៃដីចំការមីនទំហំ៤.០២៤ហិកតា ផ្ទៃដីចំការគ្រាប់ទំហំ ៣.១៤៩ហិកតា បោសសំអាតដើម្បីសុវត្ថិភាពនិងស្រាវជ្រាវទំហំ១.៤៦២ហិកតា និងកម្ទេចចោលគ្រាប់មីន និងគ្រាប់យុទ្ធភណ្ឌគ្រប់ប្រភេទបានចំនួន ៣៧.៤៤៨ គ្រាប់ ក្នុងនោះរកឃើញនិងកម្ទេចចោលយុទ្ធភណ្ឌមិនទាន់ផ្ទុះបានចំនួន៣៣.៣៦៦គ្រាប់ រកឃើញនិងកម្ទេចចោលមីនប្រឆាំងមនុស្សបានចំនួន៣.៩៨០គ្រាប់ រកឃើញនិងកម្ទេចចោលមីនប្រឆាំងរថក្រោះបានចំនួន ៨៧គ្រាប់ រកឃើញនិងកម្ទេចចោលមីនច្នៃចំនួន១៥គ្រាប់ រកឃើញនិងកម្ទេចចោលគ្រាប់កាំភ្លើងធុនតូចបានចំនួន១.៧៩៨គីឡូក្រាម បោះផ្លាកសញ្ញាសម្គាល់ព្រំប្រទល់ចំការមិណបានប្រវែង ១.២៤៧.០១០ម៉ែត្រ ។ ស៊ីម៉ាក់បានផ្សព្វផ្សាយអប់រំ ប្រជាពលរដ្ឋយល់ដឹងពីគ្រោះថ្នាក់ដោយសារគ្រាប់មីន និងសង្គ្រោះជនពិការ ដោយសារមីន ការងារស្រាវជ្រាវ និងកំណត់ទីតាំង គ្រាប់មីន គ្រាប់បែកចង្កោម និងគ្រាប់បែកគីមី ព្រមទាំងការងារហ្វឹកហ្វឹនកម្រិតជាតិ និងកម្រិតអន្តរជាតិផងដែរ។
អគ្គនាយកស៊ីម៉ាក់ បានបញ្ជាក់ទៀតថា ក្នុងឆ្នាំ២០១៨ ដែលជាឆ្នាំទី១ នៃការអនុវត្តផែនការយុទ្ធសាស្ត្រជាតិ សកម្មភាពមីន ២០១៨-២០២៥នោះ អង្គភាពស៊ីម៉ាក់មានផែនការរំដោះផ្ទៃចំការមីន និងចំការគ្រាប់ចំនួន១១៦គីឡូម៉ែត្រក្រឡា ត្រៀមឆ្លើយតបសំណើរបន្ទាន់ៗ ៩០០០សំណើរ និងអាចបោសសំអាតគ្រាប់មីន និងគ្រាប់យុទ្ធភណ្ឌ័នានាចំនួន៥០.០០០គ្រាប់។
ជាមួយគ្នានេះ លោក ហេង រតនា បានអំពាវនាវឲ្យប្រជាពលរដ្ឋ សូមនាំគ្នាថែរក្សា និងពង្រឹងសន្តិភាព ដែលបានមកដោយលំបាកបំផុត និងអំពាវនាវបញ្ឈប់វប្បធម៌ពឹងបរទេស មកគាបសង្កត់ និងបំផ្លិចបំផ្លាញ សេចក្តីសុខនិងវឌ្ឍនភាពខែ្មរ។ នេះជាសំណល់មរតកនៃសង្គ្រាម ដែលបន្តគំរាមកំហែងដល់សុខសុវតិ្ថភាពប្រជាជនយើង៕ ដោយ ៖ កូឡាប
