សហរដ្ឋអាមេរិចបានប្រាប់ទៅដល់ប្រទេសអាល្លឺម៉ង់ថា ខ្លួននឹងកម្រិតការចែករំលែកពត៌មានស៊ើបការណ៍ជាមួយនឹងប្រទេសទាំងឡាយណាដែល ប្រើប្រាស់បច្ចេកវិទ្យារបស់ក្រុមហ៊ុន Huawei ដើម្បីបង្កើតប្រព័ន្ធទំនាក់ទំនងចុងក្រោយរបស់ពួកគេ គឺ 5G។
ឯកអគ្គរដ្ឋទូតអាមេរិចប្រចាំអាល្លឺម៉ង់ លោក Richard Grenell បានផ្ញើសំបុត្រទៅកាន់រដ្ឋាភិបាល អាល្លឺម៉ង់កាលពីសប្តាហ៍មុន ដោយបានធ្វើការព្រមានក្នុងការកម្រិតអាល្លឺម៉ង់ពីការចូលប្រើប្រាស់ពត៌មានស៊ើបការណ៍អាមេរិច ប្រសិនជាទីក្រុងប៊ែឡាំង សម្រេចចិត្តចេញកុងត្រាជាមួយនឹងក្រុមហ៊ុន Huawei។ នេះបើតាមការបញ្ជាក់របស់មន្ត្រីអាមេរិចដែលយល់ច្បាស់ពីបញ្ហានេះ។
អ្នកនាំពាក្យស្ថានទូតអាឡឺមំងប្រចាំទីក្រុងវ៉ាស៊ីនតោន លោក Matthias Wehler បានថ្លែងថា “រដ្ឋមន្ត្រីសហព័ន្ធកិច្ចការសេដ្ឋកិច្ច និងថាមពល បានទទួលសំបុត្ររួចហើយ ប៉ុន្តែមិនទាន់មានការអត្ថាធិប្បាយពីភាគីពួកគេទេ តែនឹងមានការឆ្លើយតបយ៉ាងលឿន”។
សូមបញ្ជាក់ថា ការព្រមានរបស់អាមេរិចចំពោះអាល្លឺម៉ង់ បានកើតឡើងក្រោយពេលប្រទេសអាល្លឺម៉ង់ បានប្រកាសនៅថ្ងៃទី ៧ ខែមីនាថា ខ្លួនមិនមានការហាមឃាត់ក្រុមហ៊ុនណាមួយឡើយក្នុងការដេញថ្លៃលើកុងត្រាប្រព័ន្ធ 5G។
អាមេរិចបានប្រាប់ទៅដល់ប្រទេសសម្ព័ន្ធមិត្តរបស់ខ្លួនជាច្រើនថា បើចង់មានទំនាក់ទំនងល្អជាមួយអាមេរិច ពួកគេត្រូវបោះបង់ការប្រើប្រាស់បច្ចេកវិទ្យារបស់ ក្រុមហ៊ុន Huawei ចោល ដោយលើកឡើងថាវាអាចប៉ះពាល់ដល់សន្តិសុខជាតិរបស់ពួកគេ៕
អត្ថបទប្រែសម្រួលដោយ៖ សុភ័ក្រ
ប្រភព៖ BBC
