នេះជាហេតុការណ៍មហាស្លុតរន្ធត់ និងស្ទើរតែពុំគួរឲ្យជឿ នៅពេលបុរសវ័យក្មេងម្នាក់អាចនៅមានស្មារតីធម្មតា និងសូម្បីសុំទាមទារជក់បារី១ដើមសិនទៀតផង បន្ទាប់ពីក្លាហានព្យាយាមឡើងលើកំពូលភ្នំតាមជញ្ជាំងថ្ម ប៉ុន្តែ ទីបំផុត បានរបូតដៃរមៀលធ្លាក់ចុះដីពីក្នុងរយៈកម្ពស់ ៤០ ម៉ែត្រ បណ្តាលឲ្យរងរបួសយ៉ាងដំណំ កាលពីថ្ងៃទី១០ មីនា ។
វីដេអូនៅលើបណ្តាញសង្គម បានបង្ហាញឲ្យឃើញបុរសម្នាក់មានអាយុជាង ២០ ឆ្នាំ បានកំពុងព្យាយាមឡើងតាមជញ្ជាំងថ្មភ្នំ ដោយពុំមានឧបករណ៍សុវត្ថិភាពការពារណាមួយនោះទេ ។ ប៉ុន្តែ នៅពេលឡើងដល់ចុងនៃកំពូលភ្នំទៅហើយ ស្រាប់តែ «អស់ដៃ» តោងលែងជាប់របូតធ្លាក់រមៀលរាប់សិបជុំ ទង្គិចនឹងផ្ទាំងថ្មដ៏ស្រួចៗ ធ្វើឲ្យភ្ញៀវទេសចរស្រែកស្ទើរគាំងបេះដូងតែម្តង ។
ទោះយ៉ាងណា ពេលធ្លាក់មកដល់ដី បុរសនេះនៅតែមានស្មារតីធម្មតា និងអ្វីដែលគួរឲ្យហួសចិត្តនោះ គឺត្រង់ថាបុរសរូបនេះនៅបានសុំបារីគេជក់យ៉ាងព្រងើយហាក់ដូចគ្មានរឿងអ្វីកើតឡើង បើទោះបីមានឈាមគ្របដណ្តប់តាំងពីក្បាល ដៃ ជើងរបស់គាត់យ៉ាងណាក៏ដោយ ។
តែយ៉ាងណាក៏ដោយ បន្ទាប់ក្រោយមក ក្រុមភ្ញៀវទេសចរដែលពោរពេញដោយក្តីរន្ធត់ ក៏បានហៅរថយន្តសង្គ្រោះបន្ទាន់ ដើម្បីដឹកគាត់ទៅព្យាបាលរបួសនៅឯងមន្ទីរពេទ្យផងដែរ ៕ រក្សា