អាជ្ញាធរគ្រប់គ្រងអាកាសចរណ៍ស៊ីវិល សិង្ហបុរី បានធ្វើការផ្អាកជាបណ្តោះអាសន្ននូវការហោះហើររបស់យន្តហោះប្រភេទ Boeing 737 Max នៅក្នុងដែនអាកាសរបស់ខ្លួន។
ការសម្រេចបិទការហោះហើររបស់យន្តហោះម៉ូតនោះ ក្រោយពេលមានការធ្លាក់យន្តហោះនៅប្រទេសអេត្យូពីកាលពីថ្ងៃអាទិត្យកន្លងទៅនេះបណ្តាលឲ្យមនុស្សចំនួន ១៥៧នាក់ស្លាប់បាត់បង់ជីវិត។
វាគឺជាការធ្លាក់របស់យន្តហោះប្រភេទ Boeing 737 Max លើកទី ២ក្នុងរយៈពេលត្រឹម ៥ខែប៉ុណ្ណោះ។
ព្រលានយន្តហោះ Changi របស់សិង្ហបុរីគឺជាព្រលានយន្តហោះដែលមានភាពមមាញឹកបំផុតទី ៦ក្នុងពិភពលោក និងជាកន្លែងដែលមានការហោះហើរច្រើនពីអាស៊ីទៅអ៊ឺរ៉ុប និងសហរដ្ឋអាមេរិច។
និយតករ និងក្រុមហ៊ុនអាកាសចរណ៍ជាច្រើនទូទាំងពិភពលោកបានបញ្ជាឲ្យមានការផ្អាកប្រតិបត្តិការរបស់យន្តហោះម៉ូតនោះ ដោយសារមានការធ្លាក់កាលពីពេលថ្មីៗនេះ។
ការផ្អាករបស់សិង្ហបុរីបានចូលជាធរមាននៅម៉ោង ១៤ ថ្ងៃនេះ ម៉ោងនៅសិង្ហបុរី៕
អត្ថបទប្រែសម្រួលដោយ៖ សុភ័ក្រ
ប្រភព៖ BBC
