អាជ្ញាធរមីន ៖ អាល្លឺម៉ង់ បានសម្រេចបន្តភាពជាដៃគូ និងកិច្ចសហប្រតិបត្តិការជាមួយកម្ពុជាលើគ្រប់វិស័យ ហើយនឹងបន្តកិច្ចសហប្រតិបត្តិការបន្ថែមទៀតជាពិសេសលើវិស័យសកម្មភាពមីន។
ថ្ងៃអង្គារ ទី១២ ខែមីនា ឆ្នាំ២០១៩ លោក ទេសរដ្ឋមន្ត្រី លី ធុជ អនុប្រធានទី១ អាជ្ញាធរមីន បានជួបពិភាក្សាការងារជាមួយលោក Ingo Karsten ឯកអគ្គរដ្ឋទូតសហព័ន្ធអាល្លឺម៉ង់ប្រចាំនៅព្រះរាជាណាចក្រកម្ពុជា។
ក្នុងនាមសម្តេចតេជោ នាយករដ្ឋមន្ត្រី និងប្រធានអាជ្ញាធរមីន លោក ទេសរដ្ឋមន្ត្រី លី ធុជ បានមានប្រសាសន៍ថា អាល្លឺម៉ង់បានជួយដល់ការដោះមីន នៅកម្ពុជាជាយូរមកហើយតាមរយះមជ្ឈមណ្ឌលសកម្មភាពកំចាត់មីនកម្ពុជា (CMAC) ហើយបច្ចុប្បន្ននេះបាននឹងកំពុងបន្តជួយដោះមីនតាមរយះអង្គការ HALO Trust ចាប់តាំងពីឆ្នាំ ២០១៦ ដែលបានជួយគាំទ្រដល់កម្លាំងបោសសម្អាតមីនចំនួន ៥៥ ក្រុម និងក្រុម Survey EOD ចំនួន ២ក្រុម ស្មើនឹងបុគ្គលិកចំនួន ៤០០នាក់។ ជាលទ្ធផលការគាំទ្ររបស់អាល្លឺម៉ង់សម្រេចបានការបោសសម្អាតមីនក្នុងផ្ទៃដីជាង ៦លានម៉ែត្រការ៉េ កាត់បន្ថយផ្ទៃដីគម្រាមបានជាង ៦ម៉ឺនម៉ែត្រការ៉េ បានបំផ្លាញមីនប្រឆាំងមនុស្ស ២៩៩១គ្រាប់ មីនប្រឆាំងរថក្រោះ ១១៨ គ្រាប់ សំណល់ជាតិផ្ទុះពីសង្គ្រាម ៣១៩២ គ្រាប់។ ប្រជាពលរដ្ឋដែលទទួលបានផលពីការបោសសម្អាតមីនដោយផ្ទាល់មានជាង ៥ម៉ឺននាក់ ហើយប្រជាពលរដ្ឋទទួលបានការអប់រំកាត់បន្ថយគ្រោះថ្នាក់ដោយសារមីន មានចំនួនជាង ៤ពាន់នាក់។
លោក Ingo Karsten បានកោតសរសើរនិងវាយតម្លៃខ្ពស់ចំពោះការធ្លាក់ចុះអត្រាជនរងគ្រោះថ្នាក់ ដោយសារមីននិងសំណល់ជាតិផ្ទុះ ពីសង្គ្រាមជារៀងរាល់ឆ្នាំ និងសញ្ញាវិជ្ជមាននៃការរីកចម្រើន ផ្នែកសេដ្ឋកិច្ចរបស់កម្ពុជា។ លោក បានបន្តទៀតថា រដ្ឋាភិបាល និងសភាអាល្លឺម៉ង់ បានសម្រេចបន្តភាពជាដៃគូ និងកិច្ចសហប្រតិបត្តិការជាមួយកម្ពុជាលើគ្រប់វិស័យ ហើយនឹងបន្តកិច្ចសហប្រតិបត្តិការបន្ថែមទៀតជាពិសេសលើវិស័យសកម្មភាពមីនផងដែរ ៕ ដោយ ៖ កូឡាប