មន្ទីរបញ្ចាកោណនៃក្រសួងការពារជាតិអាមេរិច បានចាប់ផ្តើមអភិវឌ្ឍន៍មីស៊ីលប្រភេទថ្មី ក្រោយរដ្ឋបាលរបស់ដូណាល់ ត្រាំបានប្រកាសពីការសម្រេចចិត្តក្នុងការដកខ្លួនចេញពី សន្និសញ្ញាគ្រប់គ្រងអាវុធ ។
ការគ្រោងដកខ្លួនចេញពីសន្និសញ្ញាគ្រប់គ្រងអាវុធឆ្នាំ ១៩៨៧របស់អាមេរិច កើតឡើងក្រោយពេលរដ្ឋបានត្រាំ បានចោទប្រកាន់រុស្សីថា បានល្មើសទៅនឹងសន្និសញ្ញានោះ។
“ពួកយើងនឹងចាប់ផ្តើមធ្វើកិច្ចការលើសមាសភាគ ដើម្បីគាំទ្រដល់ការធ្វើតេស្តអភិវឌ្ឍន៍គំរោង និងមីស៊ីលបាញ់ចេញពីដែនគោក”។ នេះបើតាមការបញ្ជាក់របស់អ្នកនាំពាក្យមន្ទីរបញ្ចាកោណឈ្មោះ Michelle Baldanza ។
អ្នកស្រីបន្ថែមថា ការស្រាវជ្រាវ និងអភិវឌ្ឍន៍ទាំងនោះអាចនឹងត្រូវផ្អាកវិញ នៅពេលរុស្សីត្រឡប់ទៅរកការ អនុវត្តតាមសន្និសញ្ញាវិញ មុនពេលពួកយើ់ងដកខ្លួនចេញពីសន្និសញ្ញានៅខែសីហា ឆ្នាំ ២០១៩ខាងមុខនេះ ។
សន្និសញ្ញានុយក្លេអ៊ែររយៈចំងាយឆ្ងាយគឺជាការព្រមព្រៀងគ្នារវាងសហរដ្ឋអាមេរិច និងរុស្សីនៅក្នុងឆ្នាំ ១៩៨៧ ដើម្បីឈានទៅដល់ការបំផ្លាញចោលនូវ មីស៊ីលរយៈចំងាយពី ៥០០ ទៅ ៥.៥០០ គីឡូម៉ែត្រ ។ បើតាមសន្និសញ្ញា ប្រទេសទាំងពីរត្រូវបានហាមមិនអោយ ធ្វើការអភិវឌ្ឍន៍មីស៊ីលរយៈចំងាយឆ្ងាយឡើយ ៕
អត្ថបទប្រែសម្រួលដោយ៖ សុភ័ក្រ
ប្រភព៖ CNN
