ខេត្តព្រះសីហនុ៖ រដ្ឋបាលខេត្តព្រះសីហនុ សម្រេចបិទអាជីវកម្មមជ្ឈមណ្ឌលកំសាន្ត ជីន ទីង មានទីតាំងនៅសង្កាត់កោះរ៉ុងសន្លឹម ក្រុងព្រះសីហនុ ក្រោមហេតុផលបានសង់នៅលើដីចំណីឆ្នេរសមុទ្រប៉ះពាល់បរិស្ថាន បង្ហូរទឹកស្អុយចូលសមុទ្រ និងប៉ះពាល់ដល់សណ្តាប់ធ្នាប់សន្តិសុខជាដើម។
លិខិតចុះថ្ងៃទី១១ ខែមីនា ឆ្នាំ ២០១៩ ចុះហត្ថលេខាដោយលោក យន្ត មីន អភិបាលខេត្តព្រះសីហនុ បានជម្រាបទៅលោក Zhou Jianhua សញ្ជាតិចិន កាន់លិខិតឆ្លងដេនលេខ EC749131 ចុះថ្ងៃទី២៣ ខែមីនា ឆ្នាំ២០១៨ ប្រធានក្រុមហ៊ុន ១៦៨ ជីនទីង អ៊ិនធើណាសិនណល អេនធើធេនម៉ិន ទីស្នាក់ការ របស់សហគ្រាស ស្ថិតនៅភូមិកោះរ៉ុងសន្លឹម សង្កាត់កោះរ៉ុងសន្លឹម ក្រុងព្រះសីហនុ ខេត្តព្រះសីហនុ។
សេចក្តីជូនដំណឹង ឬស.ជ.ណ របស់លោក យន្ត មីន អភិបាលខេត្តព្រះសីហនុ បានសម្រេចបិទអាជីវកម្មមជ្ឈមណ្ឌលកម្សាន្ត ជីន ទីង ដោយអនុវត្តចាប់ពីថ្ងៃទី២២ ខែមីនា ឆ្នាំ២០១៩ខាងមុខនេះ។
នៅក្នុងលិខិតដដែលនេះ បានបញ្ជកក់ថា មូលហេតុនាំឲ្យរដ្ឋបាលខេត្តព្រះសីហនុ សម្រេចចុះបិទទីតាំងមជ្ឈមណ្ឌលកំសាន្តជីនទីង ឬកាស៊ីណូជីនទីង នៅលើសង្កាត់កោះរ៉ុង ក្រោមហេតុផលថា ទីតាំងខាងលើនេះ បានសាងសង់នៅលើដីឆ្នេរសមុទ្រ ពុំមានប្រព័ន្ធចម្រោះទឹកកខ្វក់ ដែលបង្កផលប៉ះពាល់បរិស្ថានឆ្នេរសមុទ្រ និងពុំបានអនុវត្តត្រឹមត្រូវតាមលិខិត របស់គណៈរដ្ឋមន្ត្រី ដែលបានណែនាំ ឲ្យទីតាំងសាងសង់នោះ ត្រូវមានការឯកភាពពីអាជ្ញាធរដែនដី និងស្ថាប័នពាក់ព័ន្ធឲ្យបានត្រឹមត្រូវតាមច្បាប់។
ចំណែកនៅក្នុងលិខិត របស់លោក ឈឺន ចន្ថា ចៅសង្កាត់កោះរ៉ុងសន្លឹម ក៏បានឲ្យដឹងដែរថា ទីតាំងអាជីវកម្មជីនទីង ដែលរដ្ឋបាលខេត្តព្រះសីហនុ បានបិទអាជីកម្មនេះ ពុំមានប្រព័ន្ធចំរោះទឹកកខ្វក់ ឬបង្ហូរទឹកស្អុយចូលសមុទ្រ។ ទីតាំងកាស៊ីណូនេះ បានសង់នៅលើដីឆ្នេរសមុទ្រ និងបាននាំយកម៉ាស៊ីនភ្លើង យកទៅដាក់នៅលើផែ បង្កឲ្យមានប្រេងហូរចូលសមុទ្រ និងប៉ះពាល់បរិស្ថានធ្ងន់ធ្ងរ។
លោក ឈឺន ចន្ថា បន្តឲ្យដឹងនៅក្នុងលិខិតដដែលថា អាជ្ញាប័ណ្ណប្រកបអាជីវកម្មល្បែងភ្នាល់អនឡាញ របស់កាស៊ីណូ ជីនទីង បានហួសសុពលភាព។ មានករណីអ្នកគ្រប់គ្រងសន្តិសុខប្រចាំការនៅកាស៊ីណូ នេះ បានបាញ់គម្រាម និងបង្កឲ្យមានរបួសស្នាមនៅថ្ងៃទី០៩ ខែកុម្ភៈ ឆ្នាំ២០១៩ ព្រមទាំងមានការបំពងសំលេងខ្លាំងៗ (ធុងបាស់) រាល់យប់រហូតទល់ៗភ្លឺ ធ្វើឲ្យរំខានដល់ការស្នាក់នៅ របស់ប្រជាពលរដ្ឋ និងភ្ញៀវទេសចរដែលមកកម្សាន្តឆ្នេរកោះរ៉ុងសន្លឹម មានទីតាំងនៅក្បែរនោះជាដើម។
ទាក់ទិនបញ្ហានេះ អាជីវករ និងប្រជាពលរដ្ឋរស់នៅលើកោះរ៉ុងសន្លឹម ក៏ដូចជាភ្ញៀវទេសចរជាតិអន្តរជាតិ បានសាទរ និងគាំទ្រ ចំពោះចំណាត់ការ របស់រដ្ឋបាលខេត្តព្រះសីហនុ ដែលបានសម្រេចបិទអាជីវកម្មមជ្ឈមណ្ឌលកំសាន្តជីនទីង មានទីតាំងនៅលើសង្កាត់កោះរ៉ុងសន្លឹម ក្រុងព្រះសីហនុ ដែលកន្លងមកទីតាំងនេះ តែងបានប្រព្រឹត្តិសកម្មភាពល្មើសច្បាប់ជាបន្តបន្ទាប់ ជាពិសេសមិនស្តាប់តាមការណែនាំ របស់ក្រសួងស្ថាប័នពាក់ព័ន្ធ ដាក់ឲ្យអនុវត្តនោះទេ។
ផ្តើមពីបញ្ហានេះ រដ្ឋបាលខេត្តព្រះសីហនុ បានសម្រេចបិទឈអាជីវកម្មមជ្ឈមណ្ឌលកំសាន្ត ជីន ទីង ស្ថិតនៅភូមិកោះរ៉ុងសន្លឹម សង្កាត់កោះរ៉ុងសន្លឹម ក្រុងព្រះសីហនុ ខេត្តព្រះសីហនុ ចាប់ពីថ្ងៃទី២២ ខែមីនា ឆ្នាំ២០១៩ខាងមុខនេះ ជាកំហិត។
ជាងនេះទៀត ក៏សូម លោក Zhou Jianhua សញ្ជាតិចិនប្រធានក្រុមហ៊ុន ១៦៨ ជីនទីង អ៊ិនធើណាសិនណល អេនធើធេនម៉ិន ត្រូវអនុវត្តតាមខ្លឹមសារខាងលើនេះ ឲ្យមានប្រសិទ្ធភាព៕ ដោយ ៖ ដែន សីមា
ខាងក្រោម នេះ ជាលិខិតរបស់រដ្ឋបាលខេត្តព្រះសីហនុ ចុះថ្ងៃទី១១ ខែមីនា ឆ្នាំ២០១៩ ៖