សៀមរាប ៖ នគរបាលព្រហ្មទណ្ឌ នៃអធិការដ្ឋាននគរបាល ក្រុងសៀមរាប បានឲ្យដឹងថា ករណីហិង្សាមានស្ថានទម្ងន់ទោស បណ្តាលឲ្យជនរងគ្រោះពិការជាអចិន្ត្រៃយ៍ដាច់ម្រាបដៃ និងរយះក្បាលដេរជាច្រើនថ្នេរ បង្កឡើងដោយជន សង្ស័យមួយក្រុមមានគ្នាចំនួន៤នាក់ នៅចំណុចភូមិវត្តដំណាក់ កាលពីយប់ថ្ងៃទី៩ ត្រូវបានស្រាវជ្រាវ និង បង្ក្រាបបានហើយ។
កាលពីថ្ងៃទី៩ខែមីនាឆ្នាំ ២០១៩នាទី វេលាម៉ោង២១:៤០ នាទី នៅចំណុចក្រុមទី២ ភូមិវត្តដំណាក់ សង្កាត់សាលាកំរើក ក្រុង/ខេត្តសៀមរាប មានករណី ហិង្សាមានស្ថានទម្ងន់ទោស លើជនរងគ្រោះឈ្មោះ ទ.ប.ញ.រ ភេទប្រុស អាយុ៤៧ឆ្នាំ បង្កឡើងដោយជនសង្ស័យមួយក្រុមមានគ្នាចំនួន ៤ នាក់ ជិះម៉ូតូចំនួន២ គ្រឿង ក្រោយធ្វើសកម្មភាពហើយ ពួកគេបានរត់គេចខ្លួនអស់ បណ្តាលអោយជនរងគ្រោះខាងលើ រូបរបួស រៃមាស ក្បាលផ្នែកខាងលើដីចំនួន ៥ សង់ទីម៉ែត្រ និង ដាច់ម្រាមមេដៃស្ដាំផងដែរ។
បន្ទាប់ពីទទួលបានពាក្យបណ្ដឹងពីជនរងគ្រោះ និងដោយមានការចង្អុលបង្ហាញពីលោកស្នងការ ស្នងការរងទទួលផែនព្រហ្មទណ្ឌ នៅព្រឹកថ្ងៃទី១១ខែឆ្នាំដដែល កម្លាំងនគរបាលផ្នែកព្រហ្មទណ្ឌ ដោយមានការចូលរួមសហការពី កម្លាំងនគរបាលប៉ុស្តិ៍រដ្ឋបាលសង្កាត់សាលាកំរើក និងកម្លាំងនគរបាលប៉ុស្តិ៍រដ្ឋបាលសង្កាត់ជ្រាវ ដឹកនាំដោយ លោកវរសេនីយ៍ឯក ណុប សារ៉ាក់ អធិការនៃអធិការដ្ឋាននគរបាលក្រុងសៀមរាប ដឹកនាំប្រតិបត្តការណ៍ផ្ទាល់ដោយ លោកវរសេនីយ៍ទោ នួន សក្តិ័ចំរើនរិទ្ធ អធិការងទទួលការងារព្រហ្មទណ្ឌ បានបើកការស្រាវជ្រាវ រហូតកំណត់បានមុខសញ្ញាជនសង្ស័យ ចំនួន១នាក់ ឈ្មោះ រុន ដារ៉ាល់ ហៅ នីត ភេទប្រុសអាយុ ២៤ ឆ្នាំ មុខរបរធ្វើស្រែ មានទីលំនៅបច្ចុប្បន្ន នៅភូមិវាល សង្កាត់ជ្រាវ ក្រុងសៀមរាប ខេត្តសៀមរាប ដែលជាមេខ្លោង និងជាជនដៃដល់ យកមកធ្វើការសាកសួរ ។
ជនសង្ស័យបានសារភាពថា ខ្លួននិងបក្ខពួកចំនួន៣នាក់ ផ្សេងទៀត បានយកកាំបិតដាវ មកកាប់ ទៅលើជនរងគ្រោះ ពិតប្រាកដមែន មូលហេតុ ដោយសារ ទំនាស់ពាក្យសម្តី ករណីស្ទះចរាចរ នៅខាងមុខហាងរបស់ជនរងគ្រោះ ហើយក៏ទៅហៅបក្ខពួក របស់ខ្លួន មកធ្វើសកម្មភាពខាងលើតែម្តង។
វត្ថុតាដកហូតបាន កាំបិតដាវប្រវ៉ែង៦០សង់ទីម៉ែត្រ ចំនួន១ដើម ម៉ូតូ ម៉ាកYAMAHA M-SLAZ សេរីឆ្នាំ២០១៦ ពាក់ស្លាកលេខ សៀមរាប 1AC-5683 ចំនួន១គ្រឿង។
យោងតាមពាក្យបណ្ដឹងរបស់ជនរងគ្រោះ និងចម្លើយសារភាព ជនសង្ស័យ និងវត្ថុតាង ត្រូវបាននគរបាលព្រហ្មទណ្ឌ នៃអធិការដ្ឋាននគរបាលក្រុងសៀមរាប កសាងសំណុំរឿង បញ្ជូនទៅតុលាការ ដើម្បីចាត់ការ តាមនិតិវិធីច្បាប់ ។ ចំណែក បក្ខពួកជនសង្ស័យចំនួន៣នាក់ផ្សេងទៀត កម្លាំងយើងបានធ្វើការ កំណត់អត្តសញ្ញាណ និងកសាងសាវតា រួចរាល់ដាក់ចូលសំណុំរឿង រួចហើយផងដែរ ៕ ដោយ ៖ កូឡាប
