ស្ត្រីម្នាក់ដែលត្រូវបានខាំត្របាក់សត្វឆ្មាខ្មៅ (jaguar) នៅសួន Arizona បន្ទាប់ពីបានទ្រោបលើរបាំងសន្តិសុខ ដើម្បីថតរូប selfie បាននិយាយថា នេះជាមេរៀនទី១ហើយសម្រាប់ជីវិតរបស់នាង ។
ស្ត្រីរងគ្រោះនេះដែលគ្រាន់តែប្រាប់ឈ្មោះខ្លី Leane បាននិយាយថា នាងពិតជាមានសំណាងខ្លាំងណាស់ ដែលនៅមានជីវិត បន្ទាប់ពីបានជួបប្រទះហេតុការណ៍ដ៏គួរឲ្យភ័យខ្លាច ជាមួយសត្វឆ្មាខ្មៅដ៏ធំនោះ នៅឯសួនសត្វព្រៃជិត Phoenix កាលពីថ្ងៃសៅរ៍ ។
ស្ត្រីអាយុ ៣០ ឆ្នាំ រូបនេះ បានបន្តឲ្យដឹងថា នាងបានឃើញសត្វឆ្មាព្រៃនោះ កំពុងនៅអែបនឹងទ្រុងរបស់វា និងនៅពេលនោះ នាងបានគិតថា វាជាឱកាសល្អមួយសម្រាប់នាងថតរូបដ៏ស្រស់ៗស្អាតជាមួយវា ។
នាងបានឡើងទ្រោបលើរបាំងសន្តិសុខ និងដាក់កាមេរ៉ានៅពីមុខឆ្មាខ្មៅនោះ ដោយបានរុញចូលកៀកនឹងក្រញ៉ាំរបស់វាតាមប្រឡោះទ្រុងសំណាញ់ដែក ប៉ុន្តែ ពេលនោះ ស្រាប់តែសត្វស្ទុះត្របាក់ដៃរបស់នាងតែម្តង ។ ជាលទ្ធផល Leane បានរងរបួសអស់សាច់១ដុំ នៅត្រង់ផ្អែកក្រោមកំភួនដៃរបស់នាង ។
ក្រោយហេតុការណ៍នេះកើតឡើងភ្លាមៗ Leane ត្រូវបានគេបញ្ជូនទៅព្យាបាលរបួសនៅឯមន្ទីរពេទ្យ ប៉ុន្តែ ត្រូវបានអនុញ្ញាតឲ្យវិលត្រឡប់ទៅផ្ទះវិញមួយថ្ងៃបន្ទាប់ ៕ រក្សា
