រាជធានីភ្នំពេញ ៖ សម្ដេចអគ្គមហាសេនាបតីតេជោ ហ៊ុន សែន នាយករដ្ឋមន្ដ្រី នៃព្រះរាជាណាចក្រកម្ពុជា បានចេញអនុក្រឹត្យតែងតាំងអភិបាលរងខេត្ដព្រះសីហនុ ចំនួន២រូប ជំនួស លោក ស្រ៊ុន ស្រ៊ន់ និងលោក ផៃ ប៊ុនវណ្ណៈ អតីតអភិបាលរងខេត្តព្រះសីហនុ ដែលត្រូវបញ្ចប់តួនាទី ។
អនុក្រឹត្យសម្ដេចតេជោ ហ៊ុន សែន បានបញ្ជាក់ថា មន្ដ្រីទាំង២រូប ដែលត្រូវបានតែងតាំងជាអភិបាលរងខេត្តព្រះសីហនុនោះ រួមមាន៖ លោក ម៉ាង ស៊ីណេត និង លៀម សុដា ។
មុនចេញអនុក្រឹត្យតែងតាំង លោក លៀម សុដា ជាអភិបាលរងខេត្តឧត្តរមានជ័យ និងលោក ម៉ាង ស៊ីណេត ជាប្រធានសាខាកាំកុងត្រូលខេត្តព្រះសីហនុ ។
យោងតាមអនុក្រឹត្យរបស់រាជរដ្ឋាភិបាលកម្ពុជា បានឲ្យដឹងស្តីពី ការផ្ទេរភារកិច្ច និងតែងតាំងមន្ត្រីរាជការ ដោយសម្រេច ៖
មាត្រា ១. ផ្ទេរភារកិច្ចលោក លៀម សុដា ឋានន្តរស័ក្តិឧត្តមមន្ត្រី ថ្នាក់លេខ២ ពីអភិបាលរង នៃគណៈអភិបាលខេត្តឧត្តរមានជ័យ ឲ្យមកកាន់តំណែងជាអភិបាលរង នៃគណៈអភិបាលខេត្តព្រះសីហនុ ។
មាត្រា ២. តែងតាំងលោក ម៉ាង ស៊ីណេត ឋានន្តរស័ក្តិវរមន្ត្រី ថ្នាក់លេខ១ នៃក្របខ័ណ្ឌមន្ត្រីគ្រប់គ្រងរដ្ឋបាលក្រសួងពាណិជ្ជកម្ម ឲ្យកាន់មុខតំណែងជាអភិបាលរង នៃគណៈអភិបាលខេត្តព្រះសីហនុ ។
សូមរំលឹកថា សម្ដេចតេជោ ហ៊ុន សែន នាយករដ្ឋមន្ដ្រីកម្ពុជា កាលពីថ្ងៃទី០១ ខែមីនា ឆ្នាំ២០១៩ បានចេញអនុក្រឹត្យបញ្ចប់មុខតំណែង អភិបាលរងខេត្តព្រះសីហនុ ២រូប គឺលោក ស្រ៊ុន ស្រ៊ន់ និងលោក ផៃ ប៊ុនវណ្ណៈ ។
សម្ដេច ហ៊ុន សែន បានចាត់ទុក ការដកតំណែងអភិបាលរងខេត្តព្រះសីហនុទាំង២រូបនេះ គឺជាការ កាត់សាច់ស្អុយ ឬជាការយកគ្រាប់គ្រូស និងគ្រាប់ខ្សាច់ ចេញពីស្បែកជើង ទើបអាចដើរទៅមុខទៀតបាន ដោយរលូន៕ ដោយ៖ ដែន សីមា