ភ្នំពេញ ៖ អភិបាលរាជធានីភ្នំពេញលោក ឃួង ស្រេងបាន ស្នើឲ្យធនាគារអភិវឌ្ឍន៍អាស៊ី (ADB) ជួយស្ថាបនាផ្លូវអមផ្លូវរថភ្លើងប្រវែងជាង១០គីឡូម៉ែត្រ ចាប់ពីក្រោយសាលាតិចណូដល់មហាវិថីវិមានឈ្នះ ឈ្នះ( អូឌឹម)។
ការស្នើសុំបែបនេះ ក្នុងពេលដែលលោកឃួង ស្រេង បានជួបពិភាក្សាការងារជាមួយលោកស្រី សាន់នីយ៉ា ឌូរ៉ានី ចាមែល (Sunniya Durrani-Jamal) នាយកតំបន់របស់ធនាគារអភិវឌ្ឍន៍អាស៊ី (ADB) កាលពីព្រឹកថ្ងៃទី ១៣ ខែមីនា ឆ្នាំ២០១៩នេះ នៅសាលារាជធានីភ្នំពេញ។
លោកឃួងស្រេងបានមានប្រសាសន៍លើកឡើងថា ក្រោមការដឹកនាំរបស់សម្ដេចអគ្គមហាសេនាបតីតេជោហ៊ុនសែន បានធ្វើឲ្យរាជធានីភ្នំពេញ មានការរីកចម្រើន យ៉ាងខ្លាំង ។ ទន្ទឹមនឹងការរីកចម្រើននេះ រាជធានីភ្នំពេញក៏បានប្រឈមនឹងបញ្ហាមួយចំនួនផងដែរ ដូចជាបញ្ហាការកកស្ទះចរាចរណ៍ និងបញ្ហាសំរាមជាដើម។ ជុំវិញបញ្ហាប្រឈមទាំង នេះលោកអភិបាលរាជធានី ក៏បានស្នើសុំឲ្យធនាគារអភិវឌ្ឍន៍អាស៊ីADB ជួយដើម្បីដោះស្រាយបញ្ហាទាំងនេះ ផងដែរ។
ដើម្បីដោះស្រាយនូវបញ្ហាប្រឈមទៅលើការកកស្ទះចរាចរណ៍នេះ លោកអភិបាលរាជធានីបានស្នើសុំឲ្យធនាគារអភិវឌ្ឍន៍អាស៊ី ជួយស្ថាបនាផ្លូវអមផ្លូវរថភ្លើងចាប់ពីក្រោយសាលាតិចណូរហូតដល់ផ្លូវវិមានឈ្នះឈ្នះ( ផ្លូវអូដឹម )ដែលមានប្រវែងជាង១០ គីឡូម៉ែត្រ ។ លោកបញ្ជាក់ថាផ្លូវនេះ ពិតជាមានសារសំខាន់ ក្នុងការដោះស្រាយបញ្ហាកកស្ទះចរាចរ លើបណ្តោយផ្លូវរុស្ស៊ី និងស្របពេលដែលរាជរដ្ឋាភិបាល គ្រោងនឹងបើកផ្លូវថ្មីមួយទៀតចាប់ពីមហាវិថីឈ្នះ ឈ្នះ (អូឌឹបកប់ស្រូវ)ផ្លូវរហូតទៅដល់ក្រុងព្រះសីហនុ ដែលជាប្រភេទផ្លូវ BOT ។
ដោយឡែកពាក់ព័ន្ធនឹងបញ្ហាសំរាម លោកអភិបាលរាជធានី ក៏បានស្នើសុំឲ្យធនាគារអភិវឌ្ឍន៍អាស៊ី ADB ជួយជ្រោមជ្រែងផងដែរ ខណៈដែលការដោះស្រាយបញ្ហាសំរាម នៅតែមានបញ្ហាប្រឈមនៅឡើយ។
ជាការឆ្លើយតបលោកស្រី សាន់នីយ៉ា ឌូរ៉ានី ចាមែល បានទទួលយកការស្នើសុំពីរដ្ឋបាលរាជធានីភ្នំពេញដោយរងចាំអោយ ក្រុមការងារធ្វើការចុះសិក្សា លើបញ្ហាកកស្ទះចរាចរ ដើម្បីរកវិធានការដោះស្រាយ ប៉ុន្តែទោះបីជាយ៉ាងណាក្តីលោកស្រីបានបញ្ជាក់ថា ការដោះស្រាយជួយជ្រោមជ្រែងទៅលើរដ្ឋបាលរាជធានីភ្នំពេញ នឹងធ្វើឡើងជាកញ្ចប់ធំមួយ ដោយមិនអាចធ្វើ ឡើងដាច់ដោយដុំនោះទេ ហើយការងារជាច្រើនខាង ធនាគារ ADB ក៏បានជួបពិភាក្សាជាមួយក្រសួងសេដ្ឋកិច្ចហិរញ្ញវត្ថុហើយដែរ។
ក្នុងជំនួបពិភាក្សាការងារនោះដែរលោកស្រីក៏បានសម្ដែងនូវការ កោតសរសើរចំពោះភាពរីកចម្រើនរបស់រាជធានីភ្នំពេញ ក្នុងអំឡុងពេលចុងក្រោយនេះ ដោយមានកំណើនយានយន្តកំណើនមនុស្សនិងកំណើនអចនទ្រព្យផងដែរ ។
បើយោងតាមលិខិតជូនដំណឹងរបស់រដ្ឋបាលរាជធានីអោយដឹងថា ជំនួបនេះធ្វើឡើងដើម្បីពិភាក្សា និងស្នើរសុំព័ត៌មានពាក់ព័ន្ធនិងគម្រោងនៃការអភិវឌ្ឍន៍សំខាន់ៗ ក្នុងរាជធានីភ្នំពេញពីឆ្នាំ២០២០ដល់ឆ្នាំ២០២២ សំរាប់ត្រៀមរៀបចំខ្លឹមសារសេចក្តីព្រៀងក្នុងបេសកកម្ម កម្មវិធីសំរាប់ប្រទេសជំនួយពីធនាគារអភិវឌ្ឍន៍អាស៊ី(ADB)។
គួរបញ្ជាក់ថាបច្ចុប្បន្នរដ្ឋបាលរាជធានីភ្នំពេញ កំពុងអនុវត្តគម្រោងជំនួយបច្ចេកទេស និង ការផ្លាស់ប្តូរព័ត៌មានស្ថានភាពគមនាគមន៍ក្នុងទីក្រុងជាមួយធនាគារអភិវឌ្ឍន៍អាស៊ី(ADB) ក្នុងចំនួនទឹកប្រាក់ប្រមាណ (១លាន៥រយ៤៥ពាន់ដុល្លារអាមេរិក) ដែលជាមូលនិធិជប៉ុនសំរាប់កាត់បន្ថយភាពក្រីក្រនឹងផ្តល់ចំនួន (១លាន៥រយពាន់ដុល្លារអាមេរិក )ហើយគម្រោងនេះចាប់អនុវត្តពីថ្ងៃទី០៦ មេសាឆ្នាំ២០១៨រហូតដល់ថ្ងៃទី៣០ ខែមិថុនា ឆ្នាំ២០២១ ៕ ដោយ ៖ កូឡាប
