ភ្នំពេញ ៖ សំបុកពងកូនសត្វកន្ធាយក្បាលកង្កែបចំនួន១សំបុក ត្រូវបានក្រុមអ្នកអភិរក្ស និងប្រជាសហគមន៍ រកឃើញជាលើកដំបូងនៅក្នុងរដូវកាលពងកូនឆ្នាំនេះនៅឆ្នេរខ្សាច់ដងទន្លេមេគង្គចន្លោះខេត្តក្រចេះ និងស្ទឹងត្រែងដែលជាទីកន្លែងពងកូនតែមួយគត់នៅក្នុងប្រទេសកម្ពុជា។
នៅក្នុងសេចក្តីប្រកាសព័ត៌មានរបស់ អង្គការWCS ចេញផ្សាយនៅថ្ងៃអង្គារ ២កើត ខែបុស្ស ឆ្នាំរកា នព្វស័ក ព.ស២០១៧ ថ្ងៃទី១៩ ខែធ្នូ ឆ្នាំ២០១៧ ប្រជាសហគមន៍បានការពារសំបុកកន្ធាយក្បាលកង្កែបនេះ រហូតដល់ពងកន្ធាយទាំងអស់នោះញាស់ ហើយកូនកន្ធាយនឹង ត្រូវលែងឲ្យទៅរកនៅក្នុងទន្លេវិញ។
សត្វកន្ធាយក្បាលកង្កែប (ឬរមិច) ស្ថិតនៅក្នុងបញ្ជីក្រហមរបស់អង្គការ IUCN ជាប្រភេទរងគ្រោះជិតផុតនៅលើសាកលលោក។ ពួកវាត្រូវបានគេគិតថាផុតពូជពីកម្ពុជាទៅហើយ រហូតដល់ឆ្នាំ២០០៧ពួកវាត្រូវបានគេរកឃើញម្តងទៀតនៅក្នុងបរិវេណ៤៨គីឡូម៉ែត្រនៅដងទន្លេមេគង្គចន្លោះខេត្តក្រចេះ និងស្ទឹងត្រែង។ រហូតមកដល់ពេលនេះ សំបុកពងចំនួន៣៧៨ត្រូវបានការពារ ហើយជាលទ្ធផលទទួលបានកូនញាស់ចំនួន៨៥២៨កូន។
លោក សោម ស៊ីថា ទីប្រឹក្សាបច្ចេកទេសគម្រោងអភិរក្សសត្វអណ្តើក បាននិយាយថា៖ “ចាប់ពីឥឡូវនេះ រហូតដល់ខែមិថុនា គឺជាកំឡុងពេលសត្វកន្ធាយក្បាលកង្កែបពងកូន។ នេះគឺជាសំបុកទី០១ដែលយើងបានរកឃើញនៅក្នុងឆ្នាំនេះ”៕ ដោយ ៖ កូឡាប