តាកែវ ៖ ប្រធានសាខាកាំកុងត្រូលខេត្តតាកែវបានលើកឡើងថា ការក្លែងបន្លំ ទៅលើគុណភាព បរិមាណ និងតំលៃ វាជាកត្តាមួយដែលធ្វើឲ្យមានការប៉ះពាល់ដល់ សេដ្ឋកិច្ច របស់ប្រជាពលរដ្ឋ ដោយសារតែភាពមិនស្មោះត្រង់របស់អាជីវករមួយចំនួន។
ថ្លែងនៅក្នុងការធ្វើបទបង្ហាញ របស់លោក ប៉ោ លាងគង់ ប្រធានសាខាកាំកុងត្រូលខេត្ត ក្នុងសិក្ខាសាលាស្តីពី គុណភាពវេចខ្ចប់ ស្តង់ដារ ស្លាកសញ្ញា កម្មសិទ្ធិបញ្ញា នីតិវិធីនៃការនាំចូល និងសុវត្តិភាពចំណីអាហារ ដែលរៀបចំធ្វើឡើងនៅសាលប្រជុំទីចាត់ការ ផែនការ និងវិនិយោគខេត្ត កាលពីថ្ងៃម្សិលមិញនេះ លោកបានសម្តែងពីការព្រួយបារម្ភខ្ពស់ចំពោះការប៉ះពាល់សុខមាលភាពរបស់ ប្រជាពលរដ្ឋ ក្រៅតែពីការក្លែងបន្លំគុណភាព បរិមាណ និងតម្លៃ ព្រោះកន្លងមកមន្ត្រីជំនាញកាំកុងត្រូល បានចុះធ្វើការត្រួតពិនិត្យទំនិញជាគ្រឿងឧបភោគ បរិភាគ គ្រឿងទេស តូបលក់ចាប់ហ៊ួយ និងចំណីអាហារមួយចំនួនឃើញថា មានទំនិញមួយចំនួន មិនមានគុណភាព អនាម័យទៅតាមស្តង់ដារ បរិមាណមិនគ្រប់គ្រាន់ ទំនិញខ្លះហួសកាលបរិច្ឆេទប្រើប្រាស់ ហើយនៅតាមដេប៉ូប្រេងសាំងមួយចំនួននៅក្នុងខេត្តរបស់យើង មានការក្លែងបន្លំគុណភាព និងលក់មិនគ្រប់លីត្រ ដែលជាហេតុនាំឲ្យបងប្អូនប្រជាពលរដ្ឋ ខាតបង់ច្រើន និងប៉ះពាល់យ៉ាងធ្ងន់ធ្ងរចំពោះសេដ្ឋកិច្ចនៅក្នុងគ្រួសារ ដោយក្នុងនោះពួកគាត់បានចំណាយហើយ តែបានមកវិញបែរជាមិនគ្រប់ ដូចជាចាក់ ១០០លីត្រ បាត់អស់១0ទៅ១១លីត្រ តាមការពិនិត្យឃើញជាក់ស្តែង ។
លោកប្រធានកាំកុងត្រូលរូបនេះបន្តទៀតថា ប្រសិនបើពួកគាត់នៅតែធ្វើទង្វើបែបនេះតទៅទៀត វាប្រាកដជាធ្វើឲ្យប៉ះពាល់សេដ្ឋកិច្ចប្រជាពលរដ្ឋនីមួយៗ ពិសេសសេដ្ឋកិច្ចជាតិ នឹងមានការធ្លាក់ចុះ តាមរយៈការក្លែងបន្លំគុណភាព បរិមាណនិងតំលៃនេះ ដូច្នេះហើយប្រសិនបើការចុះពិនិត្យបន្តទៀត ពួកគាត់នៅតែមិនអនុវត្តតាមនោះទេ គឺមានតែចាត់វិធានការតាមផ្លូវច្បាប់ ទើបមានការរាងចាល លែងហ៊ានប្រព្រឹត្តតទៅទៀត ។
ជាមួយគ្នានេះដែរ ទន្ទឹមនឹងការធ្វើបទបង្ហាញ លោក ប៉ោ លាងគង់ ក៏បានធ្វើការអំពាវនាវទៅដល់បងប្អូនអាជីវករ ពាណិជ្ជករទាំងអស់ សូមបញ្ឈប់ការក្លែងបន្លំគុណភាព បរិមាណ និងតំលៃតទៅទៀត ព្រោះការធ្វើបែបនេះវាមិនត្រឹមតែប៉ះពាល់សុខភាព និងសេដ្ឋកិច្ចដល់ប្រជាពលរដ្ឋខ្មែរនោះទេ វាអាចនឹងបង់ខាតប្រយោជន៍បងប្អូនអាជីវករដូចគ្នា ដូច្នោះសូមអនុវត្តឲ្យបានទាំងអស់គ្នា នូវការលក់ដោយភាពស្មោះត្រង់ ដើម្បីឲ្យទីផ្សាររបស់យើង មានទំនិញដែលមានតែគុណភាពល្អ មានអនាម័យ និងមានស្តង់ដារត្រឹមត្រូវ ៕ ដោយ ៖ តាកែវ
