ភ្នំពេញ ៖ បន្ទាប់ពីមានអត្ថបទនៃការបង្ហោះផ្សាយក្នុងផេកហ្វេសប៊ុក William Guang នៅថ្ងៃទី១២ខែមីនាឆ្នាំ២០១៩ កន្លងមកនោះ រដ្ឋបាលរាជធានីភ្នំពេញ បានបញ្ជាក់ថា ពាក្យពេចន៍របស់លោកសុខ សុវណ្ណ វឌ្ឍនាសាប៊ុង អសីលធម៌ គ្មានមូលដ្ឋានច្បាស់លាស់ និងមានចរិតមួលបង្កាច់ ជាន់ឈ្លីកិត្តិយសរហូតដល់ថ្នាក់ប្រៀបប្រដូចមនុស្សជាមួយសត្វធាតុ។
យោងតាមលិខិតរបស់រដ្ឋបាលរាជធានីភ្នំពេញ ដែលអ្នកសារព័ត៌មានទទួលបាននៅថ្ងៃទី១៤ខែមីនានេះ ដែលជម្រាបមកលោក សុខសុវណ្ណ វឌ្ឍនាសាប៊ុង ប្រធានគណបក្សខ្មែរក្រោក បានបញ្ជាក់ពីសំណើសុំធ្វើការកែតម្រូវ អត្ថបទនៃការបង្ហោះផ្សាយ ក្នុងបណ្តាញសង្គមហ្វេសប៊ុក កាលពីថ្ងៃទី១២ខែមីនា ឆ្នាំ២០១៩។
តាមរយៈលិខិតនេះ លោកសេង វណ្ណៈ នាយករដ្ឋបាលរាជធានីភ្នំពេញ បានថ្លែងថា “តាមរយៈផេក William Guang ដែលត្រូវបានស្គាល់ថា ជាផេក របស់លោកប្រធាន បានបង្ហោះផ្សាយអត្ថបទកាលពីខែ១២មីនា ឆ្នាំ២០១៩ សរសេរថា “…សួរថាតើស្តាប់សម្តីចៅហ្វាយក្រុង និងស្តាប់សំឡេង គីគី ព្រុសមួយណាល្អជាង…” ក្នុងន័យផ្សារភ្ជាប់ករណីគ្រោះថ្នាក់ចរាចរនៅលើផ្លូវ២១៧ សង្កាត់ស្ទឹងមានជ័យ ខណ្ឌមានជ័យ ជាមួយវិធានការគ្រប់គ្រងការចរាចរណ៍រថយន្តធុនធ្ងន់ចេញចូលក្រុង ដោយប្រើពាក្យពេចន៍អសីលធម៌ គ្មានមូលដ្ឋានច្បាស់លាស់ គ្រប់ជ្រុងជ្រោយ មានអត្ថន័យផ្ទុយទាំងស្រុងពីការពិត ប៉ុន្តែមានចរិតមួលបង្កាច់ ក្នុងចេតនាបង្ខូចកេរ្តិ៍ឈ្មោះធ្វើឲ្យមតិសាធារណៈមានការភាន់ច្រឡំ នាំឲ្យប៉ះពាល់ដល់កិតិ្តយស សេចក្តីថ្លៃថ្នូ របស់អ្នករាជការសាធារណៈ និងស្ថាប័នសាលារាជធានីភ្នំពេញ។ រដ្ឋបាលរាជធានីភ្នំពេញ ស្ថាគមន៍ និងរង់ចាំទទួលការរិះគន់ក្នុងន័យស្ថាបនាពីគ្រប់មជ្ឈដ្ឋាន ។ ប៉ុន្តែពុំមែនជាការប្រមាថមើលងាយ ជាន់ឈ្លីកិត្តិយសរហូតដល់ថ្នាក់ប្រៀបប្រដូចមនុស្ស ជាមួយសត្វធាតុជាច្រើនលើកច្រើនសារនោះទេ”។
លោកសេង វណ្ណៈ បានបន្ថែមថា “ក្នុងន័យនេះ ដើម្បីរក្សាតម្លៃតួនាទី ជាប្រធានគណបក្សមួយរូបផ្តល់តម្លៃជូនមន្ត្រីរាជការសាធារណៈ និងដើម្បីផ្តល់ជូនព័ត៌មានសុក្រឹត្យ និងត្រឹមត្រូវដល់សាធារណជន រដ្ឋបាលរាជធានីភ្នំពេញស្នើលោកប្រធានពិនិត្យខ្លឹមសារ កែតម្រូវអត្ថបទឡើងវិញ ចៀសវាងការពិចារណានូវចំណាត់ការតាមផ្លូវតុលាការ ក្នុងបទ “ការប្រមាថ និងការប្រឆាំងនឹងអ្នករាជការសាធារណៈ” ។
បើតាមការផ្សាយរបស់ផេក William Guang បានសរសេរ កាលពីថ្ងៃទី១២ ខែមីនា ឆ្នាំ២០១៩ថា និយាយតាមត្រង់ ខ្ញុំពិតជាខ្មាសគេ ជំនួសលោកចៅហ្វាយក្រុងខ្លាំងណាស់ បើជាខ្ញុំវិញ ខ្ញុំចុះពីតំណែងហើយ ! ថ្ងៃនេះឡានធំបុកគេស្លាប់ នៅស្ទឹងមានជ័យកាលពីព្រឹកមិញ ! នេះជាសម្ដីគ្មានប្រសិទ្ធភាព ៕ ដោយ ៖ កូឡាប
