ភ្នំពេញ ៖ ក្នុងជួបសួរសុខទុក្ខបងប្អូនកូនក្មួយកម្មករ កម្មការិនី នៅរោងចក្រតំបន់ទួលពង្រ ក្នុងខណ្ឌពោធិ៍សែនជ័យ ថ្ងៃទី២០ ខែធ្នូ ឆ្នាំ២០១៧ សម្តេចតេជោ ហ៊ុន សែន នាយករដ្ឋមន្ត្រី បានបញ្ជាក់ថា “ខ្ញុំសូមបញ្ជាក់ជូនជនរួមជាតិទូទាំងប្រទេសជ្រាបថា កាលបរិច្ឆេទនៃការបោះឆ្នោតសាកលឆ្នាំ ២០១៨ (២៩ កក្កដា) គឺនឹងធ្វើឡើងទៅតាមថ្ងៃកំណត់ ដោយគ្មានការកែប្រែឡើយ។ ការចូលរួមប្រកួតប្រជែងរបស់ គណបក្សនយោបាយ ទាំងអស់ នៅក្នុងការបោះឆ្នោតខាងមុខ គឺជាសិទ្ធិរបស់គណបក្សនីមួយៗ។
សម្តេចតេជោ ហ៊ុន សែន បានថ្លែងថា “ខ្ញុំសូមបញ្ជាក់បន្ថែមផងដែរថា “កម្ពុជា” ជាប្រទេសមានឯករាជ្យ និង អធិបតេយ្យភាព។ ប្រទេសកម្ពុជា មិនមែនជាចំណាប់ខ្មាំងរបស់ប្រទេសណា ឬអ្នកណាទេ។ ជាពិសេសទៀតនោះ គឺខ្ញុំផ្ទាល់ និងរាជរដ្ឋាភិបាលកម្ពុជា ក៏គ្មានអ្វីត្រូវនិយាយជាមួយមនុស្សក្រៅច្បាប់មួយចំនួនទាំងនោះដែរ”។
សម្តេចបន្តថា ធនាគារថ្មីនឹងបង្កើតឡើងជាមួយទឹកប្រាក់ប្រមាណ ១០០លានដុល្លារ ខ្ញុំសូមជម្រាបជូនម្ចាស់ក្រុមហ៊ុននានា នៅទូទាំងប្រទេសជ្រាបថា រាជរដ្ឋា ភិបាលនឹងបង្កើតធនាគារខ្នាតតូចនិងមធ្យមដែលមានគម្រោងទឹកប្រាក់ប្រមាណ ១០០លានដុល្លារ សម្រាប់ជួយក្រុមហ៊ុនតូច និងមធ្យមអោយមានសមត្ថភាព និងលទ្ឋភាពផលិត និងកែឆ្នៃវត្ថុធាតុដើមក្នុងស្រុកអោយកាន់តែមានគុណភាព និងតម្លៃខ្ពស់ សម្រាប់នាំចេញទៅទីផ្សារបរទេស។
ធនាគារថ្មីនេះ នឹងចូលរួមដោះស្រាយបញ្ហាប្រឈមនានា ការប្រកួតប្រជែង លើទីផ្សារ និងសម្រាប់ផ្តល់ការងារ ដល់ពលរដ្ឋប្រមាណពី ២៥ម៉ឺន នាក់ទៅ ៣០ ម៉ឺននាក់។ កម្ពុជាត្រូវតែរៀនរស់ និងដកដង្ហើមដោយខ្លួនឯង ដូច្នេះការបង្កើតធនាគារនេះ គឺនឹងជួយពង្រឹងសេដ្ឋកិច្ចជាតិយើងអោយកាន់តែរឹងមាំ និងពលរដ្ឋមានការងារធ្វើ។
សម្តេចបញ្ជាក់ថា ប្រាក់ឈ្នួលផ្ទះកម្មករ ឆ្នាំ ២០១៨ គឺអត់ឡើងទេ ។ សម្តេចប្រកាសប៉ាវជូនកូនក្មួយកម្មករកម្មការិនីថា កន្លងទៅនេះ គឺក្រសួងរាជរដ្ឋាភិបាល បានជួបពិភាក្សាជាមួយម្ចាស់ផ្ទះជួលស្នើសុំកុំអោយតម្លើងថ្លៃឈ្នួលផ្ទះឆ្នាំ ២០១៨ ។ ប៉ុន្តែប្រសិនបើម្ចាស់ផ្ទះបែរជាតម្លើងថ្លៃឈ្នួលផ្ទះនៅឆ្នាំ ២០១៨ នេះ គឺកូនក្មួយបង់តែតម្លៃឆ្នាំ ២០១៧ ទៅបានហើយ ក្រៅពីនោះគឺពូជាអ្នកជួយចេញអោយកូនក្មួយ។ ប៉ុន្តែពូសង្ឃឹមថា បងប្អូនម្ចាស់ផ្ទះនឹងមិនតម្លើងថ្លៃជួលផ្ទះឆ្នាំ ២០១៨ ឡើយ។
សម្តេចលើកឡើងថា អត្រាអ្នកជក់បារីនៅកម្ពុជាត្រូវបានកាត់បន្ថយ។ ពិតជាមានមោទនៈភាពខ្លាំងណាស់ ដែលបានសង្កេតឃើញថា កូនក្មួយកម្មករ ទាំងយុវជន និងយុវនារី គឺអត់មានធំក្លិនផ្សែងបារីទេ តាមរយៈជំនួបជាមួយកូនក្មួយប្រមាណជិត ៣០ម៉ឺននាក់រួចមកហើយ។ មិនត្រឹមតែអត្រាយុវវ័យទេ គឺសូម្បីអត្រាមនុស្សចាស់ជក់បារីក៏បានថយចុះដែរ។ យើងបន្តរួមគ្នាទប់ស្កាត់ និងកាត់បន្ថយការជក់បារី ដើម្បីសុខភាពពលរដ្ឋល្អ ហើយនឹងជួយដល់ការកាត់បន្ថយគ្រោះថ្នាក់ដោយសារការជក់បារីទៀតផង។
សម្តេចតេជោ ហ៊ុន សែន មកជួបជុំជាមួយបងប្អូន កូនក្មួយកម្មករកម្មការិនីក្នុងការចុះជួបសំណេះសំណាលនាពេលនេះដើម្បីស្វែងយល់ពីសុខទុក្ខរបស់កម្មករនិងដើម្បីដោះស្រាយបញ្ហាប្រឈមនានាមួយចំនួនរបស់កម្មករនិងជំរុញនូវគោលនយោបាយអភិវឌ្ឍន៍វិស័យឧស្សាហកម្ម(២០១៥-២០២៥) ឲ្យកាន់តែមានប្រសិទ្ធភាពខ្ពស់ដើម្បីពង្រឹងសេដ្ឋកិច្ចជាតិ និងលើកកម្ពស់ជីវភាពរស់នៅរបស់ ពលរដ្ឋអោយកាន់តែល្អប្រសើរ។
នៅក្នុងថ្ងៃនេះផងដែរ សម្តេចតេជោ ហ៊ុន សែន បានស្នើសុំថៅកែរោងចក្រអនុញ្ញាតឲ្យ កម្មករកម្មការិនីទាំងអស់ទទួលបានការឈប់សម្រាកមួយថ្ងៃក្រោយពីចប់កម្មវិធីសំណេះសំណាលនេះ។ សម្តេចតេជោ ហ៊ុន សែន ក៏បានអរគុណចំពោះក្រសួងការងារ និងបណ្តុះបណ្តាលវិជ្ជាជីវៈ តំណាងម្ចាស់ក្រុមហ៊ុន រោងចក្រ សហគ្រា និងកូនក្មួយកម្មករកម្មការនីទាំងអស់ដែល បានគោរពស្រលាញ់សម្តេច។
សម្តេចតេជោ ហ៊ុន សែន នាយករដ្ឋមន្ត្រី ក៏បានថ្លែងអំណរគុណដល់បណ្តាលរោងចក្រ សហគ្រានានា ដែលអនុញ្ញាតដោយមិនរើសអើងដល់បងប្អូនជនពិការ និងអ្នកដែលមានផ្ទុកមេរោគអេដសន៍ ចូលបម្រើការងារផងដែរ។
សម្តេចតេជោ ហ៊ុន សែន បានមានប្រសាសន៍ថាដោយសារតែរដូវនេះជារដូវធ្លាក់ខ្យល់ត្រជាក់ បានឲ្យប្រជាពលរដ្ឋមានការប្រុងប្រយ័ត្នថែទាំសុខភាពជាពិសេសត្រៀមអាវរងារសម្រាប់ការពារ ភាពត្រជាក់នេះ ហើយឪពុកម្តាយតាមទីជនបទសូមមើលថែកូន និង ឪពុកម្តាយចាស់ក្នុងរដូវរងារ នេះហើយថ្មីៗនេះរាជរដ្ឋាភិបាលក៏បានបញ្ជូនអាវរងារជាច្រើនដល់បងប្អូនកងទ័ពផងដែរ។
សម្តេចតេជោ ហ៊ុន សែន ក៏បានបញ្ជាក់ផងដែរថា សម្តេចនឹងបន្តដឹកនាំប្រទេសជាតិមិនតិចជាង ១០ ឆ្នាំទៀត ដើម្បីការពារសន្តិភាព ការពារពាររោងចក្រ ការពារផលប្រយោជន៍បងប្អូនកូនក្មួយកម្មករ និងសូមអោយបងប្អូនកូនក្មួយកម្មករបន្តគាំទ្រនិងបោះឆ្នោតជូនគណបក្សប្រជាជនកម្ពុជាជាបន្តទៀត។សម្តេចតេជោ ហ៊ុន សែន បានអំពាវនាវសុំឲ្យកម្មករ និងប្រជាពលរដ្ឋកម្ពុជាទាំងអស់ ចូលរួមថែក្សា សន្តិភាព និងការអភិវឌ្ឍដើម្បីឲ្យប្រទេសជាតិកាន់តែរីកចម្រើន។ បើគ្មានសន្តិភាពគឺមិនមែនការអភិវឌ្ឍនោះទេ ហើយការអភិវឌ្ឍក៏មិនអាចខ្វះបាននូវសន្តិភាពនោះទេ៕ ដោយ ៖ កូឡាប