ព្រះរាជអាជ្ញាម៉ាឡេស៊ីបានបដិសេធចំពោះការស្នើសុំឲ្យទម្លាក់ចោលការចោទប្រកាន់លើស្ត្រីជនជាតិវៀតណាមម្នាក់ដែលរងការចោទប្រកាន់ពីបទធ្វើឃាតបងប្រុសម្តាយទីទៃរបស់មេដឹកនាំកូរ៉េខាងជើង គីម ជុងអ៊ុន ក្រោយពេលសម្រេចទម្លាក់ចោទការចោទប្រកាន់ និងដោះលែងស្ត្រីឥណ្ឌូនេស៊ីម្នាក់ ឲ្យមានសេរីភាពវិញ។
ការបដិសេធនោះមានន័យថា ស្ត្រីវៀតណាមឈ្មោះ Doan Thi Huong នឹងក្លាយជាជនជាប់ចោទម្នាក់គត ក្នុងករណីឃាតកម្មលើលោក គីម ជុងណាម។
Doan Thi Huong គឺជាស្ត្រីម្នាក់ក្នុងចំណោម ២នាក់ដែលរងការចោទប្រកាន់ពីបទឃាតកម្ម កាលពីខែកុម្ភៈ ឆ្នាំ ២០១៧ ជុំវិញការធ្វើឃាតបងប្រុសរបស់គីម ជុងអ៊ុន។ បើរងឃើញថាមានទោស ស្ត្រីរូបនោះអាចប្រឈមនឹងទោសប្រហារជីវិតដោយព្យួករ។
ចំណែកស្ត្រីឥណ្ឌូនេស៊ី ដែលធ្លាប់រងការចោទប្រកាន់ដូចស្ត្រីវៀតណាមខាងលើ ត្រូវតុលាការសម្រេចដោះលែងកាលពីថ្ងៃច័ន្ទសប្តាហ៍នេះ និងបានត្រឡប់ទៅកាន់ប្រទេសវិញហើយ។
ក្រុមមេធាវីការពារក្តីឲ្យស្ត្រីវៀតណាមនោះបានដាក់ញ្ញាតិទៅព្រះរាជអាជ្ញាដើម្បីទាមទារឲ្យដោះលែងកូនក្តីរបស់ពួកគេ ដូចការដោះលែងស្ត្រីឥណ្ឌូនេស៊ីដែរ ប៉ុន្តែត្រូវបានព្រះរាជអាជ្ញាបដិសេធ ដោយពួកគេលើកឡើងថា វាអយុត្តិធម៌ណាដែលជនជាប់ចោទម្នាក់ត្រូវដោះលែង ប៉ុន្តែម្នាក់ទៀត មិនទទួលបានការដោះលែង។
សូមបញ្ជាក់ថា លោក គីម ជុងណាម ត្រូវបានគេធ្វើឃាតនៅព្រលានយន្តហោះទីក្រុងកូឡាឡាំពួរ កាលពីឆ្នាំ ២០១៧។ ក្នុងករណីនោះ ស្ត្រីវៀតណាមម្នាក់ និងឥណ្ឌូនេស៊ីម្នាក់រងការចោទប្រកាន់ថា បានប៉ាតសារធាតុគីមី VX ទៅលើមុខលោកគីម ជុងណាម។
ក្នុងសវនាការកន្លងទៅ អ្នកទាំងពីរបានបដិសេធរាល់ការចោទប្រកាន់ ហើយបញ្ជាក់ថា ពួកគេគិតថា ពួកគេត្រូវបានជ្រើសរើសឲ្យចូលរួមលេងក្នុងកម្មវិធីកំសាន្តទូរទស្សន៍ ៕
អត្ថបទប្រែសម្រួលដោយ៖ សុភ័ក្រ
ប្រភព៖ CNN
