ខេត្តស្វាយរៀង ៖ ស្ត្រីមេម៉ាយកូន៣នាក់ទីទាល់ក្រម្នាក់បានដង្ហើយរកសប្បុរសជនឱ្យ ជួយខណៈពេលដែលកូនស្រីពៅរបស់គាត់មានអាយុទើបតែ៧ឆ្នាំ បានរងរបួសមេដៃឆ្វេងដោយសារតែសត្វកណ្តុរខាំ ហើយកំពុងមានជម្ងឺក្តៅខ្លួនមិនបានទៅរៀនអស់រយៈពេលមួយសប្តាហ៍មកហើយ ។
បើតាមស្ត្រីជាម្តាយក្មេងស្រីរងគ្រោះឈ្មោះមាស ផល្លា អាយុ ៤២ឆ្នាំសព្វថ្ងៃមានទីលំនៅភូមិសួនថ្មីសង្កាត់ព្រៃឆ្លាក់ក្រុងស្វាយរៀងខេត្តស្វាយរៀងបានឱ្យដឹងថាៈកូនស្រីរបស់គាត់ដែលត្រូវសត្វកណ្តុរខាំហើយរងរបួសគ្មានថ្នាំព្យាបាលនោះជាកូនពៅឈ្មោះសៅ ស៊ីណាត មានអាយុ៧ឆ្នាំ សព្វថ្ងៃរៀននៅថ្នាក់ទី១ នៃសាលាបឋមសិក្សា២ធ្នូ ។
ប្រភពខាងលើបានឱ្យដឹងទៀតថា ៖ កាលពីយប់ថ្ងៃទី១០ ខែមីនា ឆ្នាំ២០១៩នេះ រូបគាត់ទាំង៤នាក់ ម្តាយនិងកូនបានគេងក្នុងមុងជាមួយគ្នាតែចៃដន្យកូនស្រីរងគ្រោះបានដាក់ដៃចេញក្រៅមុងហើយក៏ត្រូវសត្វកណ្តុរខាំចំមេដៃខាងឆ្វេងតែម្តងបណ្តាលឱ្យរងរបួសហើយក្រោយពីត្រូវសត្វកណ្តុរខាំបានមួយយប់កូនរបស់គាត់ក៏កើតមានអាការៈក្តៅខ្លួនរួចរូបគាត់ក៏បាននាំកូនទៅសំរាកព្យាបាលមុខរបួសនៅមន្ទីរពេទ្យខេត្តបានរយៈពេល៣ថ្ងៃក៏សុំគ្រូពេទ្យត្រឡប់មកផ្ទះវិញដោយសារពេទ្យមិនមានថ្នាំសំរាប់ព្យាបាលប្រភេទមុខរបួសខាងលើនោះទេ ។
ស្ត្រីដដែលបានបន្តថា ៖ នៅពេលដែលកូនគាត់សំរាកនៅមន្ទីរពេទ្យខេត្តស្វាយរៀងនោះគ្រូពេទ្យបានឱ្យរូបគាត់នាំកូនទៅភ្នំពេញដើម្បីព្យាលបាលទៅពីព្រោះនៅមន្ទីរពេទ្យខេត្តគ្មានថ្នាំវ៉ាក់សាំងសំរាប់ចាក់ឱ្យទេ។
ដោយសាររូបគាត់គ្មានមុខរបរអ្វីក្រៅពីដើរស៊ីឈ្នួលលាងចានឆ្នាំងឱ្យគេហើយកូនតូចៗនៅក្នុងបន្ទុករហូតដល់ទៅ៣នាក់ផង ទីទាល់ក្ររកតែអង្ករច្រកឆ្នាំងស្ទើរមិនបានផងគាត់ក៏សំរេចចិត្តយកកូនមកផ្ទះដេកមើលតាមយថាកម្មតែម្តងទៅ ។ ឥលូវរូបគាត់មានតែលើកម្រាមដៃ ១០ ប្រណមសុំដល់សប្បុរសជនទាំងទីជិតឆ្ងាយជួយគ្រួសារគាត់យកតែបុណ្យទៅចុះ។
ពាក់ព័ន្ធទៅនឹងករណីខាងលើនេះលោកគ្រូពេទ្យនៅមន្ទីរពេទ្យខេត្តស្វាយរៀងបានឱ្យដឹងថា ៖ ក្មេងស្រីរងគ្រោះខាងលើពិតជាបានចូលមកសំរាកព្យាបាលមុខរបួសនៅមន្ទីរពេទ្យខេត្តស្វាយរៀង កាលពីថ្ងៃទី១១ ខែមីនា ឆ្នាំ២០១៩ប្រាកដមែន ហើយក៏បានសុំចេញទៅវិញផងដែរ ក្រោយពេលដែលគ្រូពេទ្យបានលាងមុខរបួសនិងចាក់ថ្នាំផ្សះរួមនិងថ្នាំបញ្ចុះកំដៅរួច ។
ប្រភពដដែលបានបន្តថា ៖ នៅមន្ទីរពេទ្យខេត្តមិនមានវ៉ាក់សាំងសំរាប់ចាក់ការពារសត្វខាំនោះទេ មានតែនៅភ្នំពេញទើបមាន ដូច្នេះត្រូវយកជនរងគ្រោះទៅព្យាបាលនៅភ្នំពេញទើបបាន។
សូមបញ្ជាក់ផងដែរថា កាលពីជាង១០ឆ្នាំមុនស្ត្រីជាម្តាយក៏ធ្លាប់ត្រូសត្វឆ្កែខាំបណ្តាលឱ្យរូបគាត់កើតជំងឺតេតាណូសចេះតែប្រកាច់ហើយត្រូវបានបងស្រីរបស់គាត់ជួយយកអាសាកុំអីរូបគាត់ត្រូវស្លាប់ចោលកូនអស់ទៅហើយ។
គ្រាន់តែសត្វកណ្តុរខាំមន្ទីរពេទ្យខេត្តពុំមានវ៉ាក់សាំងចាក់ការពារទៅហើយ តើនៅថ្ងៃខាងមុខគួរមានថ្នាំវ៉ាក់សាំងនៅតាមខេត្តរឺអត់ចាំបាច់អីឡើងទៅដល់ភ្នំពេញ? ដោយ ៖ វ៉ៃកូ