ខេត្តព្រះសីហនុ ៖ អគ្គនាយកដ្ឋានពន្ធដារ នៃក្រសួងសេដ្ឋកិច្ច និងហិរញ្ញវត្ថុ បានរៀបចំសិក្ខាសាលាស្តីពី “កាតព្វកិច្ចលើប្រាក់ចំណូល និងប្រព័ន្ធគ្រប់គ្រងការបង្វិលសង និងការប្រើប្រាស់ឥណទានអាករលើតម្លៃបន្ថែម តាមប្រព័ន្ធអនឡាញ”។
កម្មវិធីនេះ រៀបចំដោយអគ្គនាយកដ្ឋានពន្ធដារ ព្រឹកថ្ងៃសុក្រ ទី១៥ ខែមីនា ឆ្នាំ២០១៩ នាសណ្ឋាគារសុខា ខេត្តព្រះសីហនុ ក្រោមអធិបតីភាព លោក កែន សម្បត្តិ អគ្គនាយករង នៃអគ្គនាយកដ្ឋានពន្ធដារ និងលោក គង់ វិតណៈ អភិបាលរងខេត្តព្រះសីហនុ ប្រធានពន្ធដារខេត្ត មន្ត្រីពន្ធដារ និងអាជីវករតំណាងក្រុមហ៊ុនសហគ្រាស មានចំនួនជិត ៣០០ក្រុមហ៊ុនសហគ្រាសបានចូលរួម។
នាឱកាសនោះ លោក គង់ វិតណៈ អភិបាលរងខេត្តព្រះសីហនុ ដែលចូលរួមជាអធិបតី បើកសិក្ខាសាលាស្តីពី “កាតព្វកិច្ចលើប្រាក់ចំណូល និងប្រព័ន្ធគ្រប់គ្រងការបង្វិលសង និងការប្រើប្រាស់ឥណទានអាករលើតម្លៃបន្ថែម តាមប្រព័ន្ធអនឡាញ”។
លោកបានកោតសរសើរថ្នាក់ដឹកនាំ អគ្គនាយកដ្ឋានពន្ធដារ ដែលបានបង្កើតឲ្យមានសិក្ខាសាលាដ៏មានសារៈសំខាន់ ដោយបើកឱកាសដល់ម្ចាស់ក្រុមហ៊ុនសហគ្រាស ឬអាជីវករទាំងអស់ ប្រកបរបរផ្សេងៗ នាខេត្តព្រះសីហនុ ដែលមានកាតព្វកិច្ច ត្រូវបំពេញកិច្ចការងារផ្សេងៗ ឲ្យស្របតាមច្បាប់សារពើពន្ធ នៃព្រះរាជាណាចក្រកម្ពុជា។
លោក គង់ វិតណៈ បន្តថា កិច្ចការងារប្រមូលពន្ធ គឺជាកិច្ចការងារដ៏សំខាន់ របស់រាជរដ្ឋាភិបាល ដែលធានាដល់ការទប់ទល់ការចំណូលចំណាយ របស់រដ្ឋ។ ហើយថា ការងារនេះ មានកាតព្វកិច្ចចំនួន ២ដាច់ដោយឡែកពីគ្នា គឺ ទី១/ មន្ត្រីជំនាញពន្ធដារ ជាអ្នកមានកាតព្វកិច្ចក្នុងការប្រមូលពន្ធឲ្យស្របទៅតាមច្បាប់សារពើពន្ធ និងទី២/ បណ្តាសហគ្រាស អាជីវកម្ម និង ក្រុមហ៊ុនទាំងអស់ ក៏ត្រូវមានកាតព្វកិច្ចបង់ពន្ធជូនរដ្ឋ ឲ្យស្របតាមច្បាស់សារពើពន្ធកម្ពុជាផងដែរ។ មានន័យថា ម្ចាស់អាជីវកម្ម សហគ្រាស និងក្រុមហ៊ុនទាំងអស់ ត្រូវចូលរួមបង់ពន្ធឲ្យបានទាំងអស់គ្នា និងស្របតាមច្បាប់បានកំណត់។
លោក គង់វិតណៈ បន្ថែមទៀតថា កិច្ចការងារប្រមូលពន្ធនេះ គឺមានអគ្គនាយករដ្ឋានចំនួន ២ ដែលមានកាតព្វកិច្ចក្នុងការប្រមូលពន្ធរួមមាន៖ អគ្គនាយកដ្ឋានពន្ធដារ និងអគ្គនាយកដ្ឋានគយនិងរដ្ឋាករ។ ហើយថា កិច្ចការនេះ អាចមានដំណើរការទៅបានរលូន លុះត្រាមានការគាំទ្រពីអាជ្ញាធរខេត្ត ដែលជារដ្ឋបាលថ្នាក់ក្រោមជាតិ និងទាល់តែមានការចូលរួមយ៉ាងពេញទំហឹងពីបណ្តាអាជីវករទាំងអស់ ដែលត្រូវចូលរួមបំពេញកាតព្វកិច្ចបង់ពន្ធជូនរដ្ឋនេះ។ លោកជូនពរប្រតិភូ និងមន្ត្រីជំនាញពន្ធដារ និងតំណាងក្រុមហ៊ុនសហគ្រាស ដែលបានមកជួបពិភាក្សាគ្នា នៅក្នុងសិក្ខាសាលា ដ៏មានសារៈសំខាន់ ទាក់ទងកាតព្វកិច្ច នៃការបង់ពន្ធជូនរដ្ឋ នាឱកាសនេះ ឲ្យទទួលបានជោគជ័យតាមការគ្រោងទុក។
ទាក់ទិបញ្ហានេះដែរ លោក កែន សម្បត្តិ អគ្គនាយករង នៃអគ្គនាយកដ្ឋានពន្ធដារ ក៏បានជម្រាបជូនសិក្ខាកាម ក្នុងសិក្ខាសាលាថា រយៈពេល ៥ឆ្នាំកន្លងមកនេះ ដោយអនុវត្តតាមយុទ្ធសាស្ត្រចតុកោណ ដំណាក់កាលទី៣ របស់រាជរដ្ឋាភិបាលកម្ពុជា ដឹកនាំដោយសម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា ដែលក្នុងនោះរួមមាន៖ «អភិបាលកិច្ចល្អ» ជាស្នូលយុទ្ធសាស្ត្រ និងដោយអនុវត្តស្របតាម «កម្មវិធីកែទម្រង់ការគ្រប់គ្រង និងហិរញ្ញវត្ថុសាធារណៈ (PFMRP) » ព្រមទាំង «យុទ្ធសាស្ត្រកៀរគរចំណូលរយៈពេលមធ្យម ២០១៤-២០១៨» និងក្រោមការចង្អុលបង្ហាញណែនាំដោយផ្ទាល់ពី លោកអគ្គនាយកពន្ធដារ បានខិតខំពង្រឹងនូវ «អភិបាលកិច្ចល្អ» ដោយផ្តោតសំខាន់លើ ៖
១/ រដ្ឋបាលកិច្ចល្អ (Good Administration)
២/ ប្រសិទ្ធភាព នៃភាពជាអ្នកដឹកនាំ (Effective Leadrship and Management) និង ៣/គុណូបធិបតេយ្យ Meritocracy) និងសម្រេចបាននូវលទ្ធផល និងសមិទ្ធផលល្អប្រសើរជាច្រើនប្រកបដោយប្រសិទ្ធភាព និងស័ក្តសិទ្ធភាព ជូនរាជរដ្ឋាភិបាល និងប្រទេសជាតិ។ ជាក់ស្តែងសម្រាប់ឆ្នាំ២០១៨កន្លងទៅនេះ ចំណូលពន្ធ-អាករ ដែលអគ្គនាយកដ្ឋានពន្ធដារប្រមូលបានមានចំនួន ៨៧៩១,៤០ ប៊ីលានរៀល (ប្រមាណ ២១៩៧,៨៥ លានដុល្លារអាមេរិក) ស្មើនឹង ១១៤,២៧% នៃផែនការច្បាប់។
ចំណូលនេះ មិនទាន់គិតដល់ចំណូលអាករលើតម្លៃបន្ថែម ដែលរតនាគារកាត់ទុកពីក្រុមហ៊ុន ដែលផ្គត់ផ្គង់ទំនិញ ឬសេវាដោយប្រើប្រាស់ថវិការជាតិ។ ប៉ុន្តែបើបូកទាំងចំណូលអាការលើតម្លៃបន្ថែមនេះ ថែមទៀត ចំណូលពន្ធនឹងអាចលើសផែនការប្រមាណ ១៥% ប្រហាក់ប្រហែល ឆ្នាំ២០១៧ដែរ។
ទន្ធឹមគ្នានេះ លោក កែន សម្បត្តិ ក៏បានបញ្ជាក់ថា អគ្គនាយករដ្ឋានពន្ធដារ ក៏បានធ្វើទំនបើកម្មក្នុងរយៈពេល ៥ឆ្នាំចុងក្រោយនេះ ដោយបានលើកទឹកចិត្តដល់អ្នកជាប់ពន្ធទាំងអស់ ចូលរួមប្រើប្រាស់នូវប្រព័ន្ធ និងកម្មវិធី របស់អគ្គនាយករ្ដឋានពន្ធដារ ក្នុងន័យទទួលបានសេវាអ្នកជាប់ពន្ធ ដែលមានភាពសាមញ្ញងាយស្រួល មានគុណភាព ប្រកបដោយតម្លាភាព និងមានសភាពឆាប់រហ័ស ។ ជាពិសេសថ្មីៗនេះ អគ្គនាយកដ្ឋានពន្ធដារ បានដាក់ចេញ នូវប្រព័ន្ធអនឡាញ សម្រាប់គ្រប់គ្រងងអាករលើតម្លៃបន្ថែម។
ដោយឡែកសហគ្រាសទាំងឡាយ ដែលពុំទាន់បានធ្វើបច្ចុប្បន្នភាព ព័ត៌មានសហគ្រាស ត្រូវមកធ្វើបច្ចុប្បន្នភាព ដើម្បីជាប្រយោជន៍ ទទួលបាននូវសេវា ដូចបានរៀបរាប់ខាងលើ។
លោក កែន សម្បត្តិ បន្តថា ក្នុងនាមជាអ្នកគ្រប់គ្រងប្រមូលពន្ធជូនរាជរដ្ឋាភិបាល អគ្គនាយកដ្ឋានពន្ធដារ គឺចង់ឃើញសហគ្រាស និងក្រុមហ៊ុនទាំងអស់ មានការរីកចម្រើន លូតលាស់ ធំធាត់ ហើយប្រកាស មានប្រាក់ចំណេញបង់ពន្ធជូនរដ្ឋ ដោយមិនចង់ឃើញសហគ្រាសប្រកាសខាត បង់ពន្ធខ្វះ មានបញ្ជីគណនេយ្យ ២ ឬ៣នោះទេ ដោយរំពឹងថា នឹងមិនមានការកិបកេងបន្លំពន្ធ ហើយរងការកំណត់ពន្ធឡើងវិញ ទទួលរងពិន័យ ទោសទណ្ឌ ព្រមទាំងការប្រាក់នោះទេ។
គួររំលឹកផងដែរថា រាជរដ្ឋាភិបាល ក៏បានដាក់ចេញ នូវវិធានការដ៏មុតស្រួចមួយចំនួន ក្នុងនីតិកាលទី៦ នៃរដ្ឋសភានេះ ដើម្បីជួយលើកកម្ពស់ភាព្រកួតប្រជែង និងការកែលម្អបរិយាកាសធុរកិច្ច (Ease of Doing Business) ដែលជាអាទិ៍មានដូចជា ៖
១/ កាត់បន្ថយថ្លៃអគ្គិសនី ចាប់ពីឆ្នាំ២០១៩ សម្រាប់អ្នកប្រើប្រាស់ ២/បញ្ចប់តួនាទីអចិន្ត្រៃយ៍ អគ្គនាយក ដ្ឋានកាំកុងត្រូល នៅតាមមាត់ច្រកអន្តរជាតិ
៣/ លុបចោលអង្គភាពកម្ពុជាភ្នាក់ងារនាវាចរ (កាំសាប)
៤/ ការកែសម្រួលការផ្តល់សេវាសាធារណៈ របស់អគ្គនាយកដ្ឋានគយ និងរដ្ឋាករកម្ពុជា និងការកាត់ថ្លៃ Scan Container 50%
៥/ ការៀបចំការធ្វើវិសោធនកម្មច្បាប់ ស្តីពីការវិនិយោគ និងច្បាប់ស្តីពីតំបន់សដ្ឋកិច្ច ពិសេសព្រមទាំងវិធានការនានាជាច្រើនទៀត។
តាមរយៈសិក្ខាសាលានេះ លោក កែន សម្បត្តិ មានជំនឿថា សិក្ខាកាម ដែលបានចូលរួម នឹងទទួលបានចំណេះដឹង ចំណេះធ្វើ ជាបទប្បញ្ញតិ និងជាបទពិសោធ ពាក់ព័ន្ធដល់ការបំពេញកាតព្វកិច្ចពន្ធដារ របស់អ្នកចាប់ពន្ធ ហើយក៏ជាប្រយោជន៍ យកទៅអនុវត្តឲ្យបានត្រឹមត្រូវ ស្របតាមបទប្បញ្ញត្តិ និងលិខិតបទដ្ឋានស្តីពីពន្ធដារជាធរមាន។ ជាពិសេស ការដាក់លិខិតប្រកាសពន្ធលើប្រាក់ចំណូល និងការបំពេញនីតិវិធី នៃពាក្យស្នើសុំបង្វិលសង និងការប្រើប្រាស់ ឥណទានអាករ លើតម្លៃបន្ថែម តាមប្រព័ន្ធអនឡាញ។
ត្រង់ចំណុចនេះ លោកអគ្គនាយករង នៃអគ្គនាយកដ្ឋានពន្ធដារ ក៏បានសំណូមពរឲ្យអ្នកជាប់ពន្ធទាំងអស់ ត្រូវរូតរះ ក្នុងការដាក់លិខិតប្រកាសបង់ពន្ធ លើប្រាក់ចំណូល ដែលនឹងដល់ឱសានវាទ នៅបំណាច់ខែមីនា ឆ្នាំ២០១៩នេះ និងស្នើសូមធ្វើការប្រកាសឲ្យមានភាពស្មោះត្រង់៕ ដោយ ៖ ដែន សីមា