ភ្នំពេញ ៖ អគ្គនាយកអគ្គិសនីកម្ពុជា បានពិភាក្សាជម្រើសដាក់នាវារោងចក្រថាមពល របស់ក្រុមហ៊ុនប្រទេសតួរគី ជាវិធានការបន្ទាន់បន្ថែមដើម្បីដោះស្រាយបញ្ហាខ្វះអគ្គិសនី សម្រាប់រដូវប្រាំងនៅកម្ពុជា។
ជម្រើសនេះ មានថ្លៃដើមខ្ពស់ជាងជម្រើសដទៃ ប៉ុន្តែអាចឆាប់បានប្រើ ក្នុងខណៈកម្ពុជារង់ចាំការបញ្ចប់ការសាងសង់ប្រភពផ្សេងទៀត ដែលកំពុងតែអនុវត្ត។
លោកស្រី Ayda Unlu ឯកអគ្គរដ្ឋទូតតួរគី និងក្រុមហ៊ុន នឹងរៀបចំសំណើថ្លៃជូនរាជរដ្ឋាភបាល ពិនិត្យក្នុងសប្តាហ៍ក្រោយនេះ។ ការខ្វះថាមពល ក្នុងរដូវប្រាំងនេះ ដោយសារកត្តាអាកាសធាតុក្តៅខុសប្រក្រតី និងកំណើនតម្រូវការថាមពលខ្ពស់គំហុកក្រោយការបោះឆ្នោត ២០១៨។
សូមបញ្ជាក់ថា នៅទីស្តីការក្រសួង ថ្ងៃពុធ ទី១៤ ខែមីនា ឆ្នាំ២០១៩ លោក ស៊ុយ សែម រដ្ឋមន្ត្រីក្រសួងរ៉ែនិងថាមពល បានអនុញ្ញាតឲ្យលោកជំទាវ Ayda Unlu ឯកអគ្គរដ្ឋទូតនៃសាធារណរដ្ឋតួគីប្រចាំព្រះរាជាណាចក្រកម្ពុជា ចូលជួបសម្តែងការគួរសម និងពិភាក្សាការងារ។
ក្នុងជំនួបពិភាក្សាការងារនេះ លោក រដ្ឋមន្ត្រី បានជូនពរដល់លោកជំទាវ ដែលបានទទួលភារកិច្ចបំពេញ ការងារការទូតនៅព្រះរាជាណាចក្រកម្ពុជា ហើយបានស្វាគមន៍ និងត្រៀមសហការជាមួយតួគីទាំងវិស័យរដ្ឋ និងឯកជន។
ក្នុងឱកាសនេះផងដែរ លោកជំទាវអគ្គរដ្ឋទូត បានឧទ្ទេសនាមក្រុមហ៊ុន Karadeniz Holding ដែលជាក្រុមហ៊ុន នាំមុខគេផ្នែកថាមពលនៅតួរគី ដើម្បីបានធ្វើបទបង្ហាញ ពីរោងចក្រអគ្គិសនីនៅលើនាវា ដែលក្រុមហ៊ុននេះ បានសម្រេចផលិតនាវាអគ្គិសនី ដែលមានសមត្ថភាព ផលិតថាមពលអគ្គិសនី ២៨០០មេហ្គាវ៉ាត់រួចហើយ នៅទូទាំងពិភពលោក និងកំពុងតម្លើងនាវាថ្មី ដែលមានសមត្ថភាព ផលិតថាមពលអគ្គិសនីរហូតដល់ទៅ ៥០០០មេហ្គាវ៉ាត់ តាមការបញ្ជាទិញបន្ថែមទៀត លើសពីនេះ លក្ខខណ្ឌក្នុងការវិនិយោគ គឺមានភាពងាយស្រួលទាំងតម្លៃសមរម្យ មិនប៉ះពាល់បរិស្ថានធ្ងន់ធ្ងរ និងប្រើប្រាស់រយៈពេលខ្លីក្នុងការ តម្លើង។ល៕ ដោយ ៖ កូឡាប