រថយន្ត១គ្រឿង បានបុកព្រលះម៉ូតូអស់ចំនួន ៥ គ្រឿង និងរថយន្ត២គ្រឿង នៅ Da Lat (វៀតណាម) កាលពីរសៀលថ្ងៃព្រហស្បតិ៍ បណ្តាលឲ្យរងរបួសមនុស្សយ៉ាងតិច ៥ នាក់ ។ នេះបើយោងតាមកាសែតវៀតណាម vnexpress.net ។
ប្រភពបានឲ្យដឹងថា រថយន្តបង្កម៉ាក Toyota Altis បានធ្វើដំណើរទៅកាន់ City Center ដំបូង បានបុក Sedan នៅលើផ្លូវ Nguyen Van Cu មុនពេលបុកម៉ូតូ ៥ គ្រឿង និងតាក់ស៊ី១គ្រឿង ។ រថយន្តបង្កនេះបានឈប់ បន្ទាប់ពីវាបានបុកផ្ទប់នឹងបង្គោលភ្លើង ។
ក្រោយហេតុការណ៍ដ៏រន្ធត់នេះកើតឡើង អ្នកបើកជាស្ទាវមិនស្គាល់ឈ្មោះ នៅបន្តអង្គុយនៅក្នុងរថយន្តរបស់ខ្លួន ដោយថែមទាំងរេរាំតាមចង្វាក់ភ្លេងឌឺដាក់ប៉ូលីស និងអ្នកចោមរោមមើល ដោយគ្មានការភ័យខ្លាចពីការប្រើអំពើហិង្សាដែលកើតឡើងនោះឡើយ ។ ទោះយ៉ាងណា បុរសជើងខ្លាំងរូបនេះ ក្រោយមក ត្រូវបាននាំយកទៅកាន់ប៉ុស្តិ៍ប៉ូលីស ។
មេប៉ូលីស Da Lat លោក Nguyen Van Hung បានបញ្ជាក់ឲ្យដឹងថា៖ «អ្នកបើកបរបានបង្ហាញសញ្ញាប្រើប្រាស់គ្រឿងញៀន ។ នៅពេលចូលចាប់ខ្លួន បុរសរូបនេះបានវាយមកលើមន្ត្រីប៉ូលីសទៀតផង» ៕ រក្សា