ព្រៃវែង ៖ សម្តេចក្រឡាហោមស ខេង បានអំពាវនាវពលរដ្ឋចូលរួមរាយការណ៍ មកសមត្ថកិច្ច និងអាជ្ញាធរ ដូចជានគរបាលប៉ុស្តិ៍រដ្ឋបាល មេភូមិ មេឃុំជាដើម ប្រសិនបើឃើញការលក់ ឬចែកចាយគ្រឿងញៀន និងការសេពគ្រឿងញៀន នៅគ្រប់ទីកន្លែទាំងអស់ ពិសេសនៅក្នុងភូមិរបស់បងប្អូន។
នៅព្រឹកថ្ងៃសៅរ៍ ទី១៦ ខែមីនា ឆ្នាំ២០១៩នេះ សម្ដេចក្រឡាហោម ស ខេង ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ បានអញ្ជើញជាអធិបតី ពិធីបញ្ចុះខណ្ឌសីមា ព្រះវិហារវត្តឧត្តមព្រឹក្សា ហៅវត្តជ័យមុនី ស្ថិតនៅភូមិជ័យមុនី ឃុំគោកគង់កើត ស្រុកកញ្ច្រៀច ខេត្តព្រៃវែង ។
ក្រោមអធិបតីភាពសម្ដេចក្រឡាហោមឧបនាយករដ្ឋមន្ត្រី អភិបាលស្រុកកញ្ច្រៀចបានឡើងថ្លែងរបាយការណ៍ស្ដីអំពីស្ថានភាពទូទៅរបស់រដ្ឋបាលស្រុកកញ្ច្រៀច និងអំពីសាវតារវត្តឧត្តមជ័យមុនី ដោយបានរំលឹកថាវត្តនេះ បង្កើតឡើងនៅឆ្នាំ១៩៥៧ ដោយមានភូមិចំណុះឲ្យវត្តចំនួន៥ភូមិ។ នៅក្នុងរបបខ្មែរក្រហម ទីអារាមមួយនេះបានក្លាយជាមន្ទីរពេទ្យ។
នៅក្រោយថ្ងៃ៧មករា វត្តជ័យឧត្តមមុនី ក៏មិនខុសពីទីអារាមផ្សេងទៀតនៅកម្ពុជាដែរ គឺប្រជាពុទ្ធបរិស័ទ និងអាជ្ញាធរ បានរួមសាមគ្គីគ្នាកសាងជាបន្តបន្ទាប់ ដោយមានការគាំទ្រពីឥស្សរជនជនថ្នាក់ដឹកនាំគណបក្សប្រជាជនកម្ពុជាជាច្រើនរូប ពិសេសសម្ដេចអគ្គធម្មពោធិសាល ជា ស៊ីម រួមជាមួយថ្នាក់ដឹកនាំរាជរដ្ឋាភិបាល រហូតឈានដល់ការចាប់ផ្ដើមសាងសង់ព្រះវិហារថ្មី តាំងពីឆ្នាំ២០១២មក។
បន្ទាប់មកនៅក្នុងបរិយាកាសប្រកបដោយសេចក្ដីជ្រះថ្លាយ៉ាងក្រៃលែង នៃពិធីបញ្ចុះខណ្ឌសីមា សម្ដេចក្រឡាហោម ស ខេង ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ បានអញ្ជើញថ្លែងសន្ទរកថា និងមានមតិសំណេះសំណាលទៅកាន់អង្គពិធី ដោយសម្ដេចបានសម្ដែងសេចក្ដីសប្បាយរីករាយជាទីបំផុត ដែលបានអញ្ជើញមកចូលរួមពិធីបុណ្យបញ្ចុះខណ្ឌសីមាដ៏មហាឡារិកនាថ្ងៃនេះ។
សម្ដេចក្រឡាហោម បានថ្លែងអំណរគុណប្រជាពុទ្ធបរិស័ទចំណុះជើងវត្ត សប្បុរសជន អាជ្ញាធរ និងថ្នាក់ដឹកនាំគ្រប់លំដាប់ថ្នាក់ ដែលបានចូលរួមគាំទ្រដំណើរការសាងសង់ព្រះវិហារវត្តជ័យឧត្តម ដោយសម្ដេចបានចាត់ទុកជាការស្ដែងឲ្យឃើញពីទឹកចិត្តសទ្ធាយ៉ាងមុតមាំក្នុងព្រះពុទ្ធសាសនា ហើយសម្ដេច ក្នុងនាមរាជរដ្ឋាភិបាល សូមសម្ដែងក្ដីមោទនភាពចំពោះសមិទ្ធិផលមួយនេះ។
សម្ដេចក្រឡាហោម ស ខេង បានរំលឹកជូនអង្គពិធី ដោយគូសបញ្ជាក់ថា ទម្រាំសង្គមជាតិ អាចឈានមកដល់ដំណាក់កាលនេះ យើងបានឆ្លងកាត់បទពិសោធន៍ជូរចត់ច្រើណាស់ តាំងពីសម័យសង្គ្រាម និងក្រោយសង្គ្រាម។ សម្ដេចបញ្ជាក់ថាប្រជាពលរដ្ឋវ័យចំណាស់ ពិតជាដឹងច្បាស់ ប៉ុន្តែសម្ដេចចង់ឲ្យយុវជនជំនាន់ក្រោយស្វែងយល់អំពីបញ្ហានេះ ហើយត្រូវប្រឹងប្រែងសិក្សារៀនសូត្រក្នុងឱកាសដែលប្រទេសជាតិមានសេចក្ដីសុខ និងសន្តិភាព។
សម្ដេចក្រឡាហោម ស ខេង ក៏បានមានប្រសាសន៍អំពីតម្លៃនៃការរក្សាសន្តិភាពប្រទេស ក្រោមម្លប់ព្រះមហាក្សត្រ និងតាមគន្លងលទ្ធិប្រជាធិបត្យេយសេរីពហុបក្ស។ សម្ដេចបានមានប្រសាសន៍ថាបើទោះបីជាកម្ពុជាមានគណបក្សច្រើន មានទស្សនៈផ្ទុយគ្នាច្រើន នៅក្នុងដំណើរការកសាង និងដឹកនាំជាតិ ប៉ុន្តែតាមរយៈរដ្ឋធម្មនុញ្ញ និងច្បាប់ យើងបានគ្រប់គ្រងប្រទេសប្រកបដោយសេចក្ដីសុខ និងសន្តិភាពទូទាំងប្រទេស។
សម្ដេចបានមានប្រសាសន៍ទៀតថា គ្រាន់តែនៅស្រុកកញ្ច្រៀចដែលមាន៩៩ភូមិ ពេលនេះមានភូមិ៩២រួចទៅហើយ ដែលកំពុងមានអគ្គិសនីប្រើប្រាស់ ដែលនេះគឺជាភស្តុតាងបញ្ជាក់យ៉ាងច្បាស់ថានៅពេលប្រទេសជាតិមានសន្តិភាព ការអភិវឌ្ឍនឹងមានល្បឿនកាន់តែលឿន ។ សម្ដេចបានអះអាងថាភូមិនៅសល់៧ទៀតនៃស្រុកកញ្ច្រៀច នឹងមានអគ្គិសនីប្រើឆាប់ៗនេះ។
ដោយឡែកឆ្លៀតក្នុងពិធីនេះដែរ សម្ដេចក្រឡាហោម ស ខេង ឧបនាយករដ្ឋមន្ត្រី បានមានប្រសាសន៍អំពីស្ថានភាពគ្រោះរាំងស្ងួតនៅឆ្នាំ២០១៩នេះ ដោយសម្ដេចបានសង្កត់ធ្ងន់អំពីហានីភ័យនៃការខ្វះខាតទឹកប្រើប្រាស់។ សម្ដេចបានណែនាំអាជ្ញាធរក្ដាប់ព័ត៌មានឲ្យបានពាក់ព័ន្ធនឹងបញ្ហានេះ ដើម្បីមានវិធានការជួយពលរដ្ឋឲ្យបានទាន់ពេលវេលា តាមរយៈការដឹកទឹកចែកពួកគាត់ ហើយត្រូវរៀបចំផែនការដោះស្រាយបញ្ហានេះក្នុងរយៈពេលវែង ដូចជាការជីកអណ្ដូង និងស្ដារស្រះជាដើម។
ក្នុងពិធីនេះដូចគ្នាដែរ សម្ដេចឧបនាយករដ្ឋមន្ត្រី បានក្រើនរំលឹកអាជ្ញាធរមូលដ្ឋាន ត្រូវខិតខំបំរើសេវាសាធារណៈជូនពលរដ្ឋឲ្យបានល្អ ត្រូវមានវិធានការដោះស្រាយឲ្យបានច្បាស់លាស់ និងអនុវត្តឲ្យមានប្រសិទ្ធភាព ក្នុងការប្រយុទ្ធប្រឆាំងគ្រឿងញៀន ដោយសម្ដេចបានសង្កត់ធ្ងន់ថាប៉ុន្មានឆ្នាំចុងក្រោយនេះ គ្រឿងញៀនដែលជនល្មើសធ្លាប់តែចែកចាកនៅទីក្រុង និងទីប្រជុំជននានានោះ វាបានហូរមកដល់តំបន់ជនបទខ្លះហើយ។
ជាមួយគ្នានេះ សម្ដេចបានអំពាវនាវពលរដ្ឋចូលរួមរាយការណ៍មកសមត្ថកិច្ច និងអាជ្ញាធរ ដូចជានគរបាលប៉ុស្តិ៍រដ្ឋបាល មេភូមិ មេឃុំជាដើម ប្រសិនបើឃើញការលក់ ឬចែកចាយគ្រឿងញៀន និងការសេពគ្រឿងញៀន នៅគ្រប់ទីកន្លែទាំងអស់ ពិសេសនៅក្នុងភូមិរបស់បងប្អូន។ សម្ដេចក៏បានលើកទឹកចិត្តពលរដ្ឋចូលរាយការណ៍ករណីគ្រឿងញៀន និងករណីដែលធ្វើឲ្យភូមិឃុំមិនមានសុវត្ថិភាព ទៅក្នុងបណ្ដាញទំនាក់ទំនងសង្គមថ្នាក់ដឹកនាំស្រុក ខេត្ត ហើយក៏អាចផ្ញើ ឬសរសេរក្នុងប្រអប់បញ្ចេញយោបល់ លើទំព័រហ្វេសប៊ុកផ្លូវការរបស់សម្ដេចបានដែរ។
ចំពោះដំណើរការសាងសង់ព្រះវិហារវត្តឧត្តមព្រឹក្សាដែលប្រារព្ធពិធីបញ្ចុះខណ្ឌសីមានាឱកាសដ៏នក្ខត្តឬក្សនេះ សម្ដេចក្រឡាហោម ស ខេង បានប្រកាសប្រគេនបច្ច័យ២៤.៣២៧ដុល្លារអាមេរិក ដើម្បីបង្គ្រប់ការចំណាយសាងសង់ព្រះវិហារ និងបានប្រគេនបច្ច័យតាមរោងទិស ក្នុងមួយរោងទិស២សែនរៀល ។ សម្ដេចក៏បានឧបត្ថម្ភថវិកា និងសម្ភារៈ ជូនអង្គពិធីដែលបានចូលរួម និងអង្គភាពចំណុះរដ្ឋបាលស្រុកកញ្ច្រៀចមួយចំនួនទៀតដែរ។
នាឱកាសនេះដែរ សម្ដេចក្រឡាហោម ស ខេង ក៏បានពិតទូលព្រះចៅអធិការ និងស្នើទៅកាន់អាចារ្យគណៈកម្មការវត្ត ពុទ្ធបរិស័ទ និងអាជ្ញាធរ បន្តរួមគ្នាថែរក្សា និងកែលម្អទីអារាមមួយនេះ ។ សម្ដេចចង់ឃើញមានការដាំដើមឈើឲ្យបានច្រើននៅក្នុងវត្ត ហើយដើម្បីជានិមិត្តរូប សម្ដេចបានអញ្ជើញដាំកូនឈើនៅក្នុងបរិវេណវត្តឧត្តមព្រឹក្សា មុននឹងអញ្ជើញប្រារព្ធពិធីកាត់សីមាក្នុងព្រះវិហារ ៕ ដោយ ៖ កូឡាប
