ភ្នំពេញ ៖ នៅព្រឹកថ្ងៃអង្គារ ទី១៩ ខែមីនា ឆ្នាំ២០១៩ លោក នាយឧត្តមសេនីយ៍ វង្ស ពិសេន អគ្គមេបញ្ជាការនៃកងយោធពលខេមរភូមិន្ទ បានទទួលជួបសំណេះសំណាលសម្ដែងការគួរសម និងពិភាក្សាការងារជាមួយ លោកវរសេនីយ៍ឯក អ៊ី ញ៉ម៉ាន់ សូកាសាណា (I Nyoman Sukasana) ប្រធានការិយាល័យអនុព័ន្ធយោធាឥណ្ឌូណេស៊ី ប្រចាំព្រះរាជាណាចក្រកកម្ពុជា ។
នៅក្នុងកិច្ចសំណេះសំណាលនេះលោក នាយឧត្ដមសេនីយ៍ អគ្គមេបញ្ជាការ បានលើកឡើង អំពីកិច្ចសហប្រតិបត្តិការល្អ រវាងកងទ័ព នៃប្រទេសទាំងពីរ ជាអាទិ៍ ការចុះអនុស្សរណៈយោគយល់គ្នា ស្ដីអំ ពីកិច្ចសន្ទនាកងទ័ពជើងគោក និងកងទ័ពជើងគោក ដែលរក្សាបាននូវការសន្ទនា ជារៀងរាល់ឆ្នាំ។ ម្យ៉ាងវិញទៀត ប្រទេសទាំងពីរ តែងតែមានការផ្លាស់ប្ដូរទស្សនកិច្ច យោធាជាន់ខ្ពស់ តាមរយៈការស្នើសុំ និងការអញ្ជើញ ដោយភាគីទាំងពីរ។
ក្នុងខណៈនោះដែរ នាយឧត្ដមសេនីយ៍ អគ្គមេបញ្ជាការ បានថ្លែងអំណរគុណ ដល់ប្រទេសឥណ្ឌូណេស៊ី ដែលបានផ្ដល់ជំនួយជាសម្ភារៈ និងវគ្គហ្វឹកហ្វឺនបណ្ដុះបណ្ដាល ដល់នាយទាហានកម្ពុជា ជារៀងរាល់ឆ្នាំ៕ ដោយ ៖ កូឡាប
