ក្រសួងរតនាគារអាមេរិច នៅថ្ងៃអង្គារម្សិលមិញនេះ បានដាក់ទណ្ឌកម្មប្រឆាំងនឹងក្រុមហ៊ុនរ៉ែមាសរបស់វេណេហ្ស៊ុយអេឡា និងប្រធានក្រុមហ៊ុននេះ ដោយចោទប្រកាន់ពួកគេថា បានគាំទ្រមេដឹកនាំវេណេហ្ស៊ុយអេឡា Nicolas Maduru។
នៅក្នុងសេចក្តីប្រកាស បានបញ្ជាក់ថា ទណ្ឌកម្មនោះបានដាក់ទៅលើក្រុមហ៊ុន CVG Compania General de Mineria de Venezuela CA និងប្រធានក្រុមហ៊ុនឈ្មោះ Adrian Antonio Perdomo Mata។
ក្រសួងរតនាគារអាមេរិចបានចោទប្រកាន់ពួកគេថា បានធ្វើប្រតិបត្តិការមាសខុសច្បាប់ ដែលជាការបន្តជួយគាំទ្ររដ្ឋាភិបាលរបស់លោក Nicolas Maduru។
រដ្ឋមន្ត្រីក្រសួងរតនាគារ លោក Steven Mnuchin ថ្លែងនៅក្នុងសេចក្តីប្រកាសថា ទីក្រុងវ៉ាស៊ីនតោននឹងស្វែងរកអ្នកពាក់ព័ន្ធដែលធ្វើជំនួញមាសខុសច្បាប់ជាមួយនឹងលោក Nicolas Maduru។
ក្រោយពេលប្រកាសទណ្ឌកម្ម ទីកន្លែង និងទ្រព្យសម្បត្តិរបស់ក្រុមហ៊ុន ព្រមទាំងប្រធានរបស់ខ្លួន នៅសហរដ្ឋអាមេរិចត្រូវបានបិទទាំងអស់ ហើយប្រជាពលរដ្ឋអាមេរិច ត្រូវហាមឃាត់មិនឲ្យធ្វើជំនួញ ឬពាក់ព័ន្ធជាមួយនឹងពួកគេឡើយ។
សូមបញ្ជាក់ថា អាមេរិចបានប្រកាសដាក់ទណ្ឌកម្មជាច្រើនចាប់តាំងពីខែ មករាមក ដើម្បីដាក់សម្ពាធទៅលើរបបដឹកនាំរបស់លោក Nicolas Maduru។
រដ្ឋបាលរបស់ដូណាល់ ត្រាំ បានប្រកាសទទួលស្គាល់មេដឹកនាំបក្សប្រឆាំងវេណេហ្ស៊ុយអេឡា Juan Guaido ជាប្រធានាធិបតីបណ្តោះអាសន្ន៕
អត្ថបទប្រែសម្រួលដោយ៖ សុភ័ក្រ
ប្រភព៖ CGTN