ភ្នំពេញ : លោក ទេសរដ្ឋមន្ត្រី លី ធុជ ស្នើសុំឲ្យគ្រប់ប្រតិបត្តិករទាំងអស់បង្កើនការយកចិត្តទុកដាក់ លើការអប់រំយល់ដឹងពីមីន និងស្នើសុំឲ្យនគរបាលជាតិ តាមមូលដ្ឋានផ្សព្វផ្សាយច្បាប់ស្តីពីគ្រប់គងគ្រឿងផ្ទុះ និងគ្រាប់រំសេវ នៅតាមភូមិ ឃុំ។
លោក ទេសរដ្ឋមន្ត្រី លី ធុជ អនុប្រធានទី១ អាជ្ញាធរមីន តំណាងដ៏ខ្ពង់ខ្ពស់សម្តេចតេជោ នាយករដ្ឋមន្ត្រី និងប្រធានអាជ្ញាធរមីន កាលពីថ្ងៃទី២០ ខែមីនា ឆ្នាំ២០១៩ បានអញ្ជើញជាអធិបតីក្នុងពិធីបើកកិច្ចប្រជុំគណៈកម្មាធិការសម្របសម្រួលវិស័យសកម្មភាពមីនដោយមានការចូលរួមពីតំណាងក្រសួង-ស្ថាប័នពាក់ព័ន្ធ និងប្រតិបត្តិករបោសសម្អាតមីនជាតិ និងអន្តរជាតិចំនួនប្រមាណ៤០នាក់ ។
ជាកិច្ចចាប់ផ្តើម លោក ទេសរដ្ឋមន្ត្រីបានមានប្រសាសន៍ថា សម្តេចតេជោ នាយករដ្ឋមន្ត្រី និងជាប្រធានអាជ្ញាធរមីន និងសម្តេចកិតិ្តព្រឹទ្ធបណ្ឌិត មានការសោកស្តាយ និងព្រួយបារម្មណ៍យ៉ាងខ្លាំងចំពោះការកើនឡើងនៃការគ្រោះថ្នាក់ដោយសារមីន និងសំណល់ជាតិផ្ទុះពីសង្គ្រាមដែលបានកើតមានឡើងជាបន្តបន្ទាប់ ដោយគិតចាប់ពីខែមករា ដល់ថ្ងៃទី១៨ ខែមីនា ឆ្នាំ២០១៩នេះ មានជនរងគ្រោះថ្នាក់ចំនួន ៣៥នាក់ បើប្រៀបធៀបរយៈពេលដូចគ្នា គឺកើនឡើងស្ទើរតែ ១០០ ភាគរយ។
លោក ទេសរដ្ឋមន្ត្រី បានបន្តលើកឡើងថា កិច្ចប្រជុំនេះនឹងផ្តល់ជាវេទិកាដល់ប្រតិបត្តិករជាតិ-អន្តរជាតិ និងភាគីពាក់ព័ន្ធបង្ហាញពីសមិទ្ធផលដែលសម្រេចបាន ក៏ដូចជាដោះស្រាយបញ្ហាប្រឈមនានាដែលកំពុងកើតមានឡើងនៅក្នុងវិស័យសកម្មភាពមីនទាំងមូល និងលើកទិសដៅបន្តឈានទៅរកការអនុវត្តការងារប្រកបដោយប្រសិទ្ធភាពខ្ពស់ និងប្រសិទ្ធផល។
នៅខែវិច្ឆិកា ឆ្នាំនេះដែរ កម្ពុជានឹងបញ្ចប់សំណើសុំពន្យារពេលដោះមីនលើកទី២ឆ្នាំ២០២០-២០២៥ ដើម្បីដាក់ជូនកិច្ចប្រជុំអន្តរជាតិមីននៅទីក្រុងអូស្លូ ប្រទេសណ័រវេស្ស និងគ្រោងប្រកាសភូមិគ្មានមីន (Known Mine Free Village)៕ ដោយ : បញ្ញាស័ក្តិ
