នៅថ្ងៃទី ២០ ខែ មីនា ២០១៩ នេះ សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃកម្ពុជា បានមានប្រសាសន៍ជម្រាបដល់បងប្អូនជនរួមជាតិទូទាំងប្រទេសបានជ្រាបថា កម្ពុជានឹងប្រឈមនូវកង្វះខាតភ្លើងប្រើប្រាស់ ដោយសារតម្រូវការកាន់តែខ្ពស់ដូចជានៅទីក្រុងភ្នំពេញ, សៀមរាប និងក្រុងព្រះសីហនុជាដើម ដែលពីមុនប្រើប្រាស់តែជាង២០ មេហ្កាវ៉ាត់ ប៉ុន្តែពេលនេះគឺត្រូវការភ្លើងជាង ១០០ មេហ្កាវ៉ាត់។ ជាក់ស្តែងវិស័យសំណង់គឺបានកើនឡើងជាង ៧០០% បើប្រៀបធៀបក្នុងខែ មករា និង កុម្ភះ ឆ្នាំទៅ។ ចំណុចហ្នឹងហើយដែលយើងការភ្លើងប្រើប្រាស់កាន់តែច្រើន ដែលខុសពីការព្យាករណ៍របស់រាជរដ្ឋាភិបាលកាលពីមុន។
ចំពោះដំណោះស្រាយបន្ទាន់ក្នុងការផ្គត់ផ្គង់ភ្លើងនៅទីក្រុងជាបណ្តោះអាសន្ននៅពេលនេះ សម្តេចតេជោ ហ៊ុន សែន បានរៀបចំអោយនាំចូលកប៉ាល់ផលិតអគ្គីសនីពីប្រទេសតួគី ដែលអាចផ្តល់ភ្លើងប្រើប្រាស់បានប្រមាណ ២០០មេហ្កាវ៉ាត់ មកផ្គត់ផ្គង់ក្នុងទីក្រុង ទម្រាំយើងមានរោងចក្រផលិតអគ្គីសនីថ្មីថែមទៀត ចាំដកកប៉ាល់តួគីចេញវិញ។ ទោះបីយើងទិញកប៉ាល់ផលិតអគ្គីសនីពីតួគីថ្លៃបន្តិចមែន ប៉ុន្តែប្រជាពលរដ្ឋមិនទទួលផលប៉ះពាល់ដោយសារថ្លៃភ្លើងទេ។
សម្តេចតេជោ ហ៊ុន សែន បានជំរុញអោយក្រសួងរ៉ែ និងថាមពល សហការជាមួយអាជ្ញាធរអគ្គិសនីកម្ពុជា ជ្រើសរើសយករោងចក្រផលិតអគ្គិសនីដែលមានលក្ខណៈបច្ចេកវិទ្យាទំនើបដូចជារោងចក្រដែលប្រើប្រាស់ហ្គាស (Gas) ដែលប្រសើរជាងធ្យូងថ្ម ព្រោះយូរទៅវាមានតម្លៃកាន់តែខ្ពស់ដែលបង្កការលំបាក។ ដូច្នេះយើងត្រូវការរោងចក្រផលិតអគ្គិសនីបែបទំនើបសម្រាប់កម្ពុជានាពេលអនាគត។
សម្តេចតេជោ ហ៊ុន សែន នាយករដ្ឋមន្ត្រីនៃកម្ពុជា បានបញ្ជាក់ឲ្យដឹងថា លោក កែវ រតនៈ រដ្ឋមន្ត្រីប្រតិភូអមនាយករដ្ឋមន្ត្រី និងជាអគ្គនាយកអគ្គិសនីកម្ពុជា នឹងចាកចេញពីប្រទេសកម្ពុជា ឆ្ពោះទៅកាន់ប្រទេសតួកគី ដើម្បីចរចានាំយកនូវនាវាផ្ទុកថាមពលអគ្គិសនី អនុភាព២០០មេហ្កាវ៉ាត់មកកាន់កម្ពុជា។
សម្តេចតេជោបានថ្លែងទៀតថា ការនាំយកនាវាផ្ទុកថាមពលអគ្គិសនីពីប្រទេសតួកគីមកកម្ពុជានេះ គឺជាដំណោះស្រាយបន្ទាប់មួយ សម្រាប់នាំយកអគ្គិសនីមកផ្គត់ផ្គង់ក្នុងទីក្រុង ទម្រាំកម្ពុជាមានរោងចក្រផលិតអគ្គីសនីថ្មីថែមទៀត ទើបដកនាវារបស់តួគីចេញទៅវិញ។
សម្តេចតេជោ ហ៊ុន សែន បានថ្លែងថា «បញ្ហាអគ្គិសនី យើងក៏កំពុងអំពាវនាវឲ្យបញ្ចេញម៉ាស៊ីនភ្លើងទាំងអស់មកប្រើប្រាស់ ព្រោះយើងមានកង្វះ។ ឥលូវនេះ ឯកឧត្តម ស៊ុយ សែម ឯកឧត្តម កែវ រតនៈបានរាយការណ៍ប្រហែលជា ឯកឧត្តម កែវ រតនៈ នឹងហោះទៅតួកគីភ្លាម ដើម្បីនាំកប៉ាល់មួយ ដែលផ្ទុកនូវម៉ាស៊ីនភ្លើងប្រមាណ២០០មេហ្គាវ៉ាត់ ចូលមកទីក្រុងភ្នំពេញ បើសិនជាត្រូវថ្លៃគ្នាចូលមកទីក្រុងភ្នំពេញ ផ្គត់ផ្គង់ក្នុងរយៈកាលប៉ុន្មានឆ្នាំ ដើម្បីយើងរង់ចាំថាមពលបន្ថែម»។
ជាមួយគ្នានេះ សម្តេចតេជោប្រមុខរាជរដ្ឋាភិបាលបញ្ជាក់ថា ទោះបីកម្ពុជានាំយកនាវាផលិតអគ្គីសនីពីប្រទេសតួកគីក្នុងថ្លៃបន្តិចមែន ប៉ុន្តែប្រជាពលរដ្ឋមិនទទួលផលប៉ះពាល់ដោយសារថ្លៃភ្លើងទេ ៕ ដោយ : កូឡាប
