មហាសង្ក្រាន្តឆ្នាំកុរ សុភមស្តុ! វរមង្គលាជយាតិបក , សង្ក្រាន្តឆ្នាំនេះ នឹងចូលមកដល់នៅថ្ងៃអាទិត្យ ១០ កើតខែចែត្រ ត្រូវនឹងថ្ងៃទី ១៤ ខែមេសា គ.ស ២០១៩ វេលាម៉ោង ១៥ និង ១២ នាទីរសៀល ។
ទេពធីតាដែលនឹងយាងចុះមកបន្តវេនរក្សាមនុស្សលោកនៅក្នុងឆ្នាំនេះគឺព្រះនាម ធុង្សៈទេវី បុត្រីទី១ នៃកវិលមហាព្រហ្ម តំណាងឲ្យថ្ងៃអាទិត្យ ។ ព្រះនាងសៀតផ្កាទទឹមនៅព្រកាព៌ (ត្រចៀក) អភរណៈបទុមរាត ភក្សាហារឧទុម្ពរ (ផ្លែល្វា) ព្រះហស្ថស្តាំប្រដាប់ដោយកងចក្រ ព្រះហស្ថឆ្វេងប្រដាប់ដោយខ្យងស័ង្ខ ទ្រង់សម្តែងកិរិយាសប្បាយចិត្តយានជំនិះសត្វគ្រុឌ ព្រះអម្ពររាស្ត្រាពណ៌ ក្រហម ។
– ថ្ងៃទី១ វារៈមហាសង្ក្រាន្ត ថ្ងៃអាទិត្យ ១០ កើត ខែចែត្រ ត្រូវនឹងថ្ងៃទី ១៥ ខែមេសា គ.ស ២០១៩ វេលាម៉ោង ១៥ និង ១២ នាទីរសៀល ជាថ្ងៃចូលឆ្នាំកុរ ឯកស័ក។
– ថ្ងៃទី ២ វារៈវ័នបត ថ្ងៃច័ន្ទ ១១ កើត ខែចែត្រ ត្រូវនឹងថ្ងៃទី ១៥ ខែមេសា គ.ស ២០១៩ ។
– ថ្ងៃទី ៣ ជាថ្ងៃវរៈឡើងស័ក ថ្ងៃអង្គារ ១២ កើត ខែចែត្រ ត្រូវនឹងថ្ងៃទី ១៦ ខែមេសា គ.ស ២០១៩ នៅវេលាម៉ោង ១៩ និង ១២ នាទី គម្រប់ជាសង្ក្រាន្តបីថ្ងៃ ស្រេចបរិបូណ៍ចូលជាសកល ឯកស័ក មហាសករាជ ១៩៤១ , ចលសករាជ ១៣៨១ តរៀងទៅ ។
ចំពោះរណ្តាប់ទទួលទេវតា
តាមទំនៀមទម្លាប់ពីបុរាណរៀងមកត្រូវរៀបរានទេវតានៅខាងមុខផ្ទះមួយសម្រាប់តាំងគ្រឿងពលិការផ្សេងៗ… ៖
– ក្រាលសំពត់ពណ៌ស
– បាយសី ៩ ថ្នាក់ មួយគូ
– បាយសី ៧ ថ្នាក់ មួយគូ
– បាយសី ៥ ថ្នាក់ មួយគូ
– បាយសី ៣ ថ្នាក់ មួយគូ
– បាយសី ប៉ាឆាម មួយគូ
– ស្លាធម៌ មួយគូ , ទឹកអប់ មួយគូ , ទៀន ៥ ធូប ៥ លាច ៥ ផ្កា ៥ ដាក់លើជើងពាន ចេកនួន ចេកណាំវ៉ា មួយ , ផ្លែឈើ ១១ មុខ ៥ មុខ ឬ ៣ មុខ , ដូងឡៅ មួយគូ , ទឹកស្អាត ៣ កែវ ។
ចំពោះបាយសី ៩ ថ្នាក់ ៧ ថ្នាក់ ជាទំនៀមមានចែងក្នុងសៀវភៅព្រះរាជពិធីទ្វារទសមាស និងមានអនុវត្តនៅព្រះបរមរាជវាំង តែចំពោះប្រជារាស្ត្រគួរធ្វើត្រឹម ៥ ថ្នាក់ចុះមក ឬរៀបត្រឹមគ្រោះសក្ការៈបូជាដែលមានទៀន ៥ ធូប ៥ ស្លាធម៌ កូនចេក ក៏ល្មមគួរសមដែរ ។
ចំពោះផ្លែឈើសម្រាប់ប្រជារាស្ត្រគួររៀបឲ្យបានត្រឹម ៣ ឬ ៥មុខ ទៅតាមធនធានរបស់ខ្លួន ត្រូវដាក់ផ្កាម្លិះភួងពីលើគ្រប់ដង្វាយ នៅលើជើងពាន និងនៅលើបាយសី ត្រូវដោតទៀន ហើយដុតបំភ្លឺ ។
នៅវេលាម៉ោងទេវតាចុះមក ត្រូវជួបជុំក្រុមគ្រួសារដើម្បីថ្វាយបង្គំព្រះនមស្សការព្រះរតនត្រ័យសមាទានសីល ហើយតាំងចិត្តឲ្យបានល្អស្អាតបរិសុទ្ធជ្រះស្រឡះនូវមន្ទិលទាំងពួង តម្កល់ចិត្តរំពឹងគិតទៅលើព្រះពុទ្ធ ព្រះធម៌ ព្រះសង្ឃ ជាទីពឹងទីរឭក លុះចប់ពិធីទទួលទេវតា ៕ ដោយ ៖ ស្រីនាថ
ដកស្រង់ពីក្បួនមហាសង្ក្រាន្ត ឯកឧត្តម អ៊ឹម បុរិន្ទ គ.ស ២០១៩ ។