ភ្នំពេញ៖ លោក វង សូត រដ្ឋមន្ត្រីក្រសួងសង្គមកិច្ច អតីតយុទ្ធជន និងយុវនីតិសម្បទា បានសម្ពោធដាក់ឱ្យដំណើរការ កម្មវិធីសហប្រតិបត្តិការអូស្ត្រាលី-កម្ពុជា ដើម្បីការផ្តល់សេវា ប្រកបដោយនិរន្តរភាព និងសមធម៌ (ហៅកាត់ ACCESS) នាថ្ងៃព្រហស្បតិ៍ ទី២១ ខែមីនា ឆ្នាំ២០១៩។
នាឱកាស នោះលោក វង សូត រដ្ឋមន្ត្រីក្រសួងសង្គមកិច្ច អតីតយុទ្ធជន និងយុវនីតិសម្បទា និងជាប្រធានក្រុមប្រឹក្សា សកម្មភាពជនពិការ បានមានប្រសាសន៍ថា ផ្តើមចេញពីការយកចិត្តទុកដាក់ របស់រាជរដ្ឋាភិបាលកម្ពុជា បានផ្តល់សច្ចាប័ន លើអនុសញ្ញា ស្តីពីសិទិ្ធជនមានពិការភាព និងបាន ក្លាយជារដ្ឋភាគី ជាផ្លូវការនៅថ្ងៃទី១៩ ខែមករា ឆ្នាំ២០១៣ ក្នុងនោះ កម្ពុជា ក៏ជាប្រទេសហត្ថលេខី អនុវត្តយុទ្ធសាស្ត្រ អ៊ីនឈាន់ “ធ្វើឱ្យសិទ្ធិក្លាយជាការពិត” សម្រាប់ជនមានពិការភាព ក្នុងតំបន់អាស៊ី និងប៉ាស៊ីហ្វិក ទសវត្សរ៍ ជនមានពិការភាព ឆ្នាំ២០១៣-២០២២ ផងដែរ។
លោករដ្ឋមន្ត្រីបានបន្ថែមថា គិតត្រឹមខែមករា ឆ្នាំ២០១៩ រាជរដ្ឋាភិបាល បានផ្តល់របបគោលនយោបាយជនពិការក្រីក្រ តាមសហគមន៍ ដល់ជនមានពិការភាព បានចំនួន ១០ខេត្ត សរុបចំនួន១១.៦២៨ នាក់ ។ លោករដ្ឋមន្ត្រី បានគូសបញ្ជាក់ថា រាជរដ្ឋាភិបាល បានកំណត់ជ្រើសរើស ជនមានពិការភាព ឱ្យចូលបម្រើការងារ នៅតាមក្រសួង-ស្ថាប័នរដ្ឋឱ្យគ្រប់២ភាគរយ និងវិស័យឯកជន ១ភាគរយ។ ជាក់ស្តែងក្នុងឆ្នាំ២០១៨ ជនមានពិការភាព សរុបចំនួន ២.៨៣៩ នាក់ ក្នុងនោះ ជនពិការកម្រិតធ្ងន់ មានចំនួន ១.៤៧៨ នាក់ បានចូលបម្រើការងារ នៅតាមក្រសួង ស្ថាប័នរដ្ឋចំនួន ៤០ ចំណែកវិស័យ ឯកជនចំនួន ៧៧ មានជនពិការចំនួន ៣.០៥៥ នាក់ បាននិងកំពុងបម្រើការងារ។ សរុបទាំងស្ថាប័នរដ្ឋ និងឯកជន មានចំនួនប្រមាណ ៥.៨៩៤ នាក់។
ចំណែកកម្មវិធីសហប្រតិបត្តិការអូស្ត្រាលី-កម្ពុជា ដើម្បីផ្តល់សេវាប្រកប ដោយនិរន្តរភាព និងសមធម៌ ហៅកាត់ថា អ៊ែកសេស (ACCESS) នឹងអាចជួយដល់ជនមានពិការភាព និងស្ត្រីដែលរងគ្រោះ ដោយអំពើហិង្សា ទាក់ទងនឹងយ៉េនឌ័រ (Gender Based Violent GBV) នឹងទទួលបានអត្ថប្រយោជន៍ ពីកម្មវិធី ACCESS ដែលមានសេវាកម្ម ប្រកបដោយនិរន្តរភាពគុណភាព ទាំងនៅថ្នាក់ជាតិ និងក្រោមជាតិ។ ក្នុងន័យនេះ ចាត់ទុកថាកម្មវិធី ACCESS គឺជាកាលានុវឌ្ឍភាពថ្មីមួយទៀត ក្នុងការបើកទំព័រ ជួយដល់វិស័យពិការភាព បន្ទាប់ពីរាជរដ្ឋាភិបាលកម្ពុជា បានអនុវត្តដោយជោគជ័យ នៃផែនការយុទ្ធសាស្ត្រជាតិស្តីពីពិការភាព ២០១៤-២០១៨ នាពេលកន្លងទៅនេះ៕ ដោយ៖បញ្ញាស័ក្តិ