រាជធានីភ្នំពេញ៖ កម្លាំងនគរបាលនាយកដ្ឋានស៊ើបអង្កេត និងអនុវត្តនីតិវិធី នៃអគ្គនាយកដ្ឋានអន្តោប្រវេសន៍ ដឹកនាំដោយឧត្តមសេនីយ៍ទោ ហាស់ សុត្ថា អនុប្រធាននាយកដ្ឋាន នារសៀលថ្ងៃទី២១ ខែមីនា ឆ្នាំ២០១៩ បានសហការចូលរួមដោយកម្លាំងនគរបាលការិយាល័យស៊ើបអង្កេត និងអនុវត្តនិតិវិធីផែនអន្តោប្រវេសន៍ នៃស្នងការដ្ឋាននគរបាលរាជធានីភ្នំពេញ ដែលដឹកនាំដោយឧត្តមសេនីយ៍ទោ ទិត វិសិដ្ឋ ស្នងការរងទទួលផែនអន្តោប្រវេសន៍ និងកម្លាំងសមត្ថកិច្ចមូលដ្ឋានខណ្ឌច្បារអំពៅ ប៉ុស្តិ៍ច្បារអំពៅ២ ចុះត្រួតពិនិត្យ និងឃាត់ខ្លួនជនបរទេស ស្ថិតនៅតាមផ្ទះជួល ហាងអ៊ុតសក់ ហាងលក់កាហ្វេ តាមបណ្តោយផ្លូវលេខ៣៦៩ ភូមិដើមចាន់ សង្កាត់ច្បារអំពៅ២ ខណ្ឌច្បារអំពៅ២។
ក្នុងកិច្ចប្រតិបត្តិការនេះ បានពិនិត្យរកឃើញ ជនជាតិវៀតណាមសរុបចំនួន ១០នាក់ (ស្រី ០១នាក់) ប្រើប្រាស់ឯកសារមិនត្រឹមត្រូវ ហើយបានឃាត់ខ្លួន និងបញ្ជូនទៅអគ្គនាយកដ្ឋានអន្តោប្រវេសន៍ ដើម្បីអនុវត្តនីតិវិធីបន្តនៃច្បាប់ ៕ ដោយ៖បញ្ញាស័ក្តិ