នាវាចម្លងមួយគ្រឿងដែលមានផ្ទុកមនុស្សយ៉ាងច្រើន បានលិចនៅទន្លេ Tigris River ស្ថិតក្បែរទីក្រុង Mosul ប្រទេសអ៊ីរ៉ាក់ បណ្តាលឲ្យមនុស្សលងទឹកស្លាប់ចំនួន ៩២នាក់។
ហេតុការណ៍នេះកើតឡើងកាលពីថ្ងៃព្រហស្បតិ៍ម្សិលមិញ ដែលជាថ្ងៃចូលឆ្នាំថ្មីប្រពៃណីអ៊ីរ៉ាក់ និងថ្ងៃបុណ្យអ្នកម្តាយផងដែរ។
ក្នុងចំណោមជនរងគ្រោះ មានកុមារ យ៉ាងហោចណាស់ចំនួន ១២នាក់។ នេះបើតាមអ្នកនាំពាក្យក្រសួងសុខាភិបាលអ៊ីរ៉ាក់។
មុនពេលកើតហេតុណ៍ មានមនុស្សចំនួនជិត ១៥០នាក់នៅលើនាវា។ មនុស្សចំនួន ៦០នាក់ក៏បានបាត់ខ្លួនផងដែរក្នុងគ្រោះអកុសលនោះ។
នាវាចម្លងនោះបានដឹកជញ្ជូនអ្នកទេសចរពីច្រាំងទន្លេឆ្ពោះទៅកាន់កោះទេសចរណ៍តូចមួយដែលមានឈ្មោះថា Umm al-Rabeein។
ប្រតិបត្តិការស្វែងរកកំពុងបន្ត ហើយក្រុមជួយសង្គ្រោះទើបតែអាចរកឃើញសាកសពមួយចំនួនប៉ុណ្ណោះ។
បើតាមការបញ្ជាក់របស់មន្ត្រីធនធានទឹកបានឲ្យដឹងថា នាវានោះលិចនៅពាក់កណ្តាលផ្លូវ ដោយសារតែកម្រិតទឹកក្នុងទន្លខ្ពស់ខ្លាំងពេក ខណៈដែលនាវាផ្ទុកមនុស្សលើសចំណុះហួសហេតុពេក៕
អត្ថបទប្រែសម្រួលដោយ៖ សុភ័ក្រ
ប្រភព៖ CNN
