រតនគិរី ៖ អនុប្រធានលេខាធិការដ្ឋានអចិន្ត្រៃយ៍ នៃអាជ្ញាធរជាតិទទួលបន្ទុក កិច្ចការព្រំដែន និងអភិបាលខេត្តរតនគិរី ចុះពិនិត្យ ការសាងសង់បង្គោលព្រំដែន បំពេញបន្ថែម និងផ្លូវក្រវ៉ាត់ព្រំដែនរវាង ខេត្តរតនគិរី ប្រទេសកម្ពុជា និងខេត្តកន្ទុម ខេត្តយ៉ាឡាយ សាធារណរដ្ឋសង្គមនិយមវៀតណាម ។
លោកស្រីបណ្ឌិត កុយ ពិសី អនុប្រធានលេខាធិកាដ្ឋាន អចន្ត្រៃយ៍ នៃអាជ្ញាធរជាតិ ទទួលបន្ទុកកិច្ចការព្រំដែន និងលោក ថង សាវុន អភិបាលខេត្តរតនគិរី នាព្រឹកថ្ងៃពុធ ទី២០ ខែធ្នូ ឆ្នាំ២០១៧ បានអញ្ជើញចុះពិនិត្យ ការងារសាងសង់ បង្គោលព្រំដែនបំពេញបន្ថែម និងផ្លូវក្រវ៉ាត់ព្រំដែន រវាងខេត្តរតនគិរី នៃព្រះរាជាណាចក្រកម្ពុជា និងខេត្តកន្ទុម ខេត្តយ៉ាឡាយ នៃសាធារណរដ្ឋសង្គមនិយមវៀតណាម ។ ក្នុងដំណើរបំពេញបេសកកម្មនេះ លោកស្រី កុយ ពិសី និងលោក ថង សាវុន បានអញ្ជើញ ចាក់គ្រឹះបង្គោលព្រំដែនបំពេញបន្ថែមលេខ ១៩/១ លេខ ១៩/៣ និងលេខ ១៩/៧ ដែលបង្គោលទាំង ៣ នេះបច្ចុប្បន្នកំពុងដំណើរការសាងសង់ ព្រមទាំងបានអញ្ជើញពិនិត្យ បង្គោលព្រំដែន បំពេញបន្ថែម ដែលបានសាងសង់រួច មានបង្គោលព្រំដែន លេខ ១៩/៥ លេខ ២០/១ ។ ត្រួតពិនិត្យ តំបន់ចន្លោះបង្គោលព្រំដែនលេខ២២ លេខ២៣ ត្រួតពិនិត្យផ្លូវក្រវ៉ាត់ព្រំដែន នៅទីតាំងបង្គោល លេខ១៩ និងបង្គោលលេខ២០ ។ ពិនិត្យមើលបង្គោលព្រំដែនបំពេញបន្ថែម ចាប់ពី បង្គោលលេខ ២៩/៣ លេខ ២៧/១ ។ ពិនិត្យមើលផ្លូវក្រវ៉ាត់ព្រំដែន នៅជិតបង្គោលលេខ២៩ លេខ២៧ ។ ពិនិត្យ ការជួសជុល បង្គោលព្រំដែន នៅច្រកទ្វាអន្តរជាតិអូរយ៉ាដាវ លេខ៣០ ព្រមទាំងបានពិនិត្យមើលផងដែរ ព្រំដែននៅភូមិសាស្ត្រ ចន្លោះបង្គោលលេខ ៤០ និង លេខ ៤១ ។
នៅគ្រប់ទីតាំងចំណុចបោះបង្គោលព្រំដែន ដែលបានចុះត្រួតពិនិត្យ លោកស្រីបណ្ឌិត កុយ ពិសី បានថ្លែងនូវការកោតសរសើរ និងវាយតម្លៃខ្ពស់ចំពោះក្រុមការងារបច្ចេកទេស នៃនាយកដ្ឋានបច្ចេកទេស និងវាស់វែងរបស់អាជ្ញាធរជាតិ ទទួលបន្ទុកកិច្ចការព្រំដែន កម្ពុជា ដែលបានខិតខំប្រឹងប្រែង អនុវត្តន៍តួនាទី ភារកិច្ចដែលថ្នាក់លើប្រគល់ជូនលើការងារសាងសង់ និងបោះបង្គោលខណ្ឌសីមា ព្រំដែនកម្ពុជា តាមខ្សែក្រវ៉ាត់ព្រំដែន ខេត្តរតនគិរី នៃព្រះរាជាណាចក្រកម្ពុជា និងខេត្តកន្ទូម ខេត្តយ៉ាឡាយ នៃសារណរដ្ឋសង្គមនិយមវៀតណាម ប្រកបដោយស្មារតី ទទួលខុសត្រូវខ្ពស់ ។ លោកស្រី បានជំរុញឲ្យក្រុមការងារបច្ចេកទេស ធ្វើយ៉ាងត្រូវអនុវត្តន៍ឲ្យត្រឹមត្រូវតាមបទដ្ឋានបច្ចេកទេស ដើម្បីធានាគុណភាព បង្គោលព្រំដែនបានរឹងមាំល្អ ជាពិសេសត្រូវពន្លឿន កិច្ចការងាររបស់ខ្លួន អោយបានតាមផែនការដែលរាជរដ្ឋាភិបាលប្រគល់ជូន ។
ក្នុងឱកាសនៃការចុះសួរសុខទុក្ខនៃផងដែរថ្នាក់ដឹកនាំគណៈកម្មាធិការចម្រុះកិច្ចការព្រំដែនិងអភិបាលខេត្តរតនគិរី បានថ្លែងនូវការកោតសរសើរចំពោះវីរភាពដ៏អង់អាចក្លាហានរបស់កងកម្លាំងទាំងអស់ និងនាំមកនូវបណ្តាំផ្ញើសាកសួរសុខទុក្ខពីសំណាក់សម្តេចតេជោ នាយករដ្ឋមន្ត្រី និងថ្នាក់ដឹកនាំជាន់ខ្ពស់ នៃរាជរដ្ឋាភិបាលកម្ពុជា ជូនចំពោះបងប្អូនកងកម្លាំងការពារព្រំដែន និងសូមឲ្យថែរក្សាសុខភាពឲ្យបានល្អនារដូវរងានេះ៕ ដោយ ៖ បញ្ញាស័ក្តិ