ខេត្តស្វាយរៀង ៖ រថយន្តដឹកជ្រូក ៣ គ្រឿង ត្រូវបានគេសង្ស័យថា ជាជ្រូកបានលួចឆ្លងដែនពីវៀតណាមត្រូវបានសមត្ថកិច្ចចម្រុះចុះបង្ក្រាបនិងឃាត់រថយន្តដឹកជ្រូកប្រគល់ឲ្យមន្ត្រីជំនាញការិយាល័យផលិតកម្មនិងបសុព្យាបាល នៃមន្ទីរកសិកម្មរុក្ខាប្រម៉ាញ់និងនេសាទខេត្ត ដើម្បីចាត់ការតាមនីតិវិធីច្បាប់។
ប្រភពព័ត៌មានពីសមត្ថកិច្ចបានឱ្យដឹងថា ៖ រថយន្តដឹកជ្រូកទី១រថយន្តម៉ាកហ៊ីយិនដាយពាក់ស្លាកលេខ ភ្នំពេញ 3C.2460 មានជ្រូក ៣៥ ក្បាល។ ទី ២ រថយន្តម៉ាក TOYOTA HiLuX ពាក់ស្លាកលេខកំពង់ចាម 2C.2207 មានជ្រូក ៧ ក្បាល។ រួចបញ្ជូនទៅមន្ទីរកសិកម្មរុក្ខាប្រម៉ាញ់និងនេសាទ ខេត្តស្វាយរៀង ដើម្បីពិនិត្យចំណែកមន្ត្រីអគ្គនាយដ្ឋានសុខភាពសត្វនិងផលិតកម្មសត្វក្រសួងកសិកម្មសហការជាមួយមន្ត្រីជំនាញមន្ទីរកសិម្មខេត្តនិងទី៣ចាប់ឃាត់រថយន្តមួយគ្រឿងម៉ាក FUSO ពាក់ស្លាកលេខស្វាយរៀង 3A.0906 របស់ក្រុមហ៊ុនស៊ីភី CP មានជ្រូកចំនួន ១០៤ ក្បាលសង្ស័យថាជ្រូកវៀតណាមបានចាប់បញ្ជូនទៅមន្ទីរកសិកម្មខេត្តដែរហើយបានធ្វើការបូមឈាមយកទៅពិនិត្យនៅមន្ទីរពិសោទរាជធានីភ្នំពេញដើម្បីធ្វើតេសឈាម។
ប្រភពខាងលើបានឱ្យដឹងទៀតថា ៖ ករណីចាប់ឃាត់រថយន្តដឹកជ្រូកនេះកើតឡើងកាលពីវេលាម៉ោង៣និង៤០នាទីរសៀលថ្ងៃទី២២ខែមីនាឆ្នាំ២០១៩នៅចំណុចក្លោងទ្វារវត្តត្រពាំងធំស្ថិតនៅភូមិត្រពាំងធំឃុំអង្គប្រស្រែស្រុករមាសហែកចំនួន ២ គ្រឿងសត្វជ្រូករស់ចំនួន ៤២ ក្បាល ក្នុងនោះរថយន្តម៉ាកហ៊ីយិនដាយពាក់ស្លាកលេខភ្នំពេញ 3C.2460 ដឹកជ្រូក ៣៥ ក្បាលរថយន្តម៉ាក TOYOTA ហីលុចពាក់ស្លាកលេខកំពង់ចាម 2C2207 ដឹកជ្រូក ៧ ក្បាល។ ដោយឡែកនៅផ្លូវជាតិលេខ១ ត្រង់ចំណុចភូមិធ្មល់សង្កាត់ចេកក្រុងស្វាយរៀងសមត្ថកិច្ចបានឃាត់រថយន្តម៉ាក FUSO ពាក់ស្លាកលេខស្វាយរៀង 3A0906 ដឹកជ្រូក ១០៤ ក្បាល។
បើតាមមន្ត្រីនគបាលមូលដ្ឋានឃុំអង្គប្រស្រែបានឲ្យដឹងថា ដោយមានក្រុមឈ្មួញខិលខូចបាននាំជ្រូកពីប្រទសវៀតណាម ឆ្លងដែនចូលមកតាមរដ្ឋបាលឃុំអង្គប្រស្រែស្រុករមាសហែកដឹកតាមម៉ូតូរួចមកសាងដាក់ម៉ូតូរ៉ឺម៉កនិងរថយន្តក្នុងមួយយប់ៗដោយក្នុង១គ្រឿង១០ក្បាល បើកូនជ្រូក ៣០ ក្បាល និង រថយន្តចំនួន ៦ទៅ៧ គ្រឿង ក្នុង ១ គ្រឿង ៣៥ ក្បាល ទៅ ៤០ ក្បាល ដាក់សាងនៅចំណុចខាងកើតវត្តត្រពាំងធំ និងកែងវត្តត្រពាំងព្រីង គឺចាប់ពី ៣០០ ក្បាលទៅ ៤០០ ក្បាល (មានជ្រូកតូចសម្រាប់ខ្វៃនិងជ្រូកធំ) ហើយចាប់ផ្តើមនាំជ្រូកវៀតណាម ចូលមកតាមរដ្ឋបាលឃុំអង្គប្រស្រែនេះ រយៈពេល ៤ ថ្ងៃមកហើយចាប់ពីថ្ងៃទី១៩ មីនា ២០១៩ មក។
រីឯបុរស់ម្នាក់បានឲ្យដឹងថា ខ្លួននិងមនុស្សផ្សេងទៀតជាអ្នកស៊ីឈ្នួលដឹកជ្រូកឲ្យឈ្មួញពីព្រំដែនវៀតណាមមកដល់រថយន្តគឺមួយក្បាលតម្លៃ១ម៉ឺនរៀល។
ទាក់ទិនករណីឃាត់រថយន្តដឹកជ្រូកត្រួតពិនិត្យនេះ លោក ហ៊ុន សារ៉េតថន មន្ត្រីចល័តការិយាល័យផលិតកម្ម និងបសុព្យាបាលមន្ទីរកសិកម្មខេត្តមានប្រសាសន៍ ការចាប់ឃាត់រថយន្តដឹកជ្រូកនេះ ដោយមានការសង្ស័យថា នាំជ្រូកពីប្រទេសវៀតណាម ចូលមកកម្ពុជាក្នុងរដ្ឋបាលខេត្តស្វាយរៀង ដែលជ្រូកវៀតណាមមានផ្ទុះជម្ងឺប៉េសអាហ្វ្រិកធ្ងន់ធ្ងរ ហើយឯកឧត្តម ម៉ែន វិបុល អភិបាល នៃគណអភិ បាលខេត្តស្វាយរៀង បានចេញសេចក្តីណែនាំស្តីពីវិធានការបន្ទាន់ដើម្បីត្រួតពិនិត្យនិងទប់ស្កាត់ការឆ្លងរាលដាលជម្ងឺប៉េសជ្រូកអាហ្វ្រិកដោយឲ្យគ្រប់ស្ថាបន័មានសមត្ថកិច្ចក្នុងខេត្តសហការគ្នាផ្សព្វផ្សាយនិងទប់ស្កាត់បញ្ឈប់ការនាំជ្រូកពីវៀតណាមនិងផលិត ផលមានដើមកំណើតពីសត្វជ្រូកត្រូវអនុវត្តឲ្យមានប្រសិទ្ធិភាពទើបមន្ត្រីជំនាញសហការជាមួយមន្ត្រីគយនិងរដ្ឋាករសាខាខេត្តស្វាយ រៀង និងមន្ត្រីនគបាលស្រុកប៉ុស្តិ៍រដ្ឋបាលឃុំចុះល្បាតតាមព្រំដែន ដើម្បីឃ្លាំមើលទប់ស្កាត់ និងបង្ក្រាប។
ប្រភពដដែលបន្តទៀតថា បើតាមអជីវករម្ចាស់ជ្រូកបានអះអាងថា គាត់ទិញពីប្រជាពលរដ្ឋក្នុងស្រុកក៏ប៉ុន្តែជ្រូកមួយចំនួនគឺទិញតាមម៉ូតូទើបមានការសង្ស័យថា នាំជ្រូកពីប្រទេសវៀតណាម ទើបឃាត់យកទៅពិនិត្យ បើទិញជ្រូកតាមផ្ទះត្រូវមានសំណើរពីម្ចាស់ជ្រូកនិងមានចុះហត្ថលេខាពីលោកមេភូមិ, មន្ត្រីពេទ្យសត្វភូមិ ពេទ្យសត្វស្រុកនិងការិយាល័យផលិតកម្មនិងបសុព្យាបាលពិនិត្យទើបអនុញ្ញាតឲ្យនាំចេញបាន។ ហើយជ្រូកក្រុមហ៊ុន CP១០៤ ក្បាល នោះគឺដឹកមកពីកសិដ្ឋាន CP ខេត្តត្បូងឃ្មុំ ដែលមានច្បាប់ដឹកជញ្ជូនតែ ៩០ ក្បាល គឺដឹកលើស ១៤ ក្បាល សង្ស័យបង្កប់ជ្រូកនាំចូលពីប្រទេសវៀត ដោយក្នុងច្បាប់ដាក់នៅខេត្តស្វាយរៀង ៤៥ ក្បាល ដាក់នៅខេត្តព្រៃវែង ២៥ ក្បាលដាក់នៅខេត្តកណ្តាល២០ក្បាល។ហើយនៅព្រឹកថ្ងៃទី២៣មិនា២០១៩នេះមន្ត្រីជំនាញបានបូមឈាម ជ្រូកទាំងអស់យកទៅពិនិត្យមេរោគនៅមន្ទីរពិសោធន៍រាជធានីភ្នំពេញបើរកឃើញលទ្ធផលមានជម្ងឺយើងនិងកំទេចចោលហើយបើគ្មានជម្ងឺនិងធ្វើការផាកពិន័យតាមច្បាប់និងប្រគល់ឲ្យម្ចាស់វិញ។ ហើយនិងដាក់មន្ត្រីចុះអង្កេតឡើងវិញថាតើឈ្មួញអះអាងថា ទិញពីប្រជាពលរដ្ឋក្នុងស្រុកនោះមានពិតមែនឬអត់គឺចុះដល់ផ្ទះតែម្តងដោយមានការសង្ស័យចម្លើយអ្នកដឹកជ្រូកឆ្លើយទិញកន្លែងផ្សេងរីឯអ្នករត់ការឆ្លើយផ្សេងហើយថៅកែរជ្រូកឆ្លើយផ្សេង ក្រោយមកពេទ្យសត្វភូមិឆ្លើយផ្សេងទៀតខុសគ្នា ទីតាំងមួយចំនួនដែលប្រាប់ថា ទិញពីប្រជាពលរដ្ឋឈ្មោះនោះគឺគ្មានចិញ្ចឹមជ្រូកសោះ។ដូច្នេះការសន្និដ្ឋានរបស់មន្ត្រីចម្រុះគឺ៖ជ្រូកខ្លះមានច្បាប់ជ្រូកមួយចំនួនគ្មានច្បាប់ទិញតាមម៉ូតូសង្ស័យជាជ្រូកវៀតណាមមានវីសាចូលមកកម្ពុជា។
លោក ខៀវ សារឿន ប្រធានសាខាគយ និងរដ្ឋាករខេត្តស្វាយរៀង បានប្រាប់អ្នកសារព័ត៌មានតាមទូរស័ព្ទថា ៖ បញ្ហាជ្រូកនេះគឺបានបញ្ជូនទៅខាងមន្ទីរកសិកម្មខេត្តដើម្បីពិនិត្យសំណុំលិខិតផ្សេងៗ និងបូមឈាមសត្វជ្រូកទាំងនោះយកទៅធ្វើការពិសោធន៍បើរក ឃើញ ថា ៖ វាមានភាពមិនប្រក្រតីនោះត្រូវធ្វើតាមច្បាប់(បើជ្រូកមានជំងឺត្រូវធ្វើការកំទិចចោលបើជ្រូកគ្មានលិខិតស្នាមច្បាស់លាស់ត្រូវធ្វើការផាកពិន័យបង់ពន្ធជូនរដ្ឋ)៕ ដោយ ៖ វ៉ៃកូ