ភ្នំពេញ ៖ ប្រធានធនាគារមួយ នៅរាជធានីភ្នំពេញ ដែលគ្រោងនឹងបើកសម្ពោធជាផ្លូវការ នាពេលឆាប់ៗខាងមុខនេះ បានបង្ហាញជាសាធារណៈ នូវជំនឿទុកចិត្ត ចំពោះបុគ្គលិកឆ្នើមមួយរូប ដែលបានបំពេញការងារ នៅក្នុងធនាគារបានយ៉ាងល្អ និងធ្វើឲ្យប្រធានធនាគារ ពេញចិត្ត និងមានទំនុកចិត្តយ៉ាងខ្លាំងចំពោះភាពស្មោះត្រង់របស់បុគ្គលិករូបនេះ។
ក្នុងកិច្ចសម្ភាសន៍ ជាមួយអ្នកសារព័ត៌មានកាសែតកម្ពុជាថ្មី នារសៀលថ្ងៃទី២៣ ខែមីនា ឆ្នាំ២០១៩នេះ ប្រធានធនាគាររូបនេះ បានឲ្យអ្នកសារព័ត៌មានយើងដឹងថា ខាងធនាគារ គឺពិតជាមានការពេញចិត្ត ពេញថ្លើមយ៉ាងខ្លាំងចំពោះបុគ្គលិកឆ្នើមមួយរូប គឺលោកគួច ផល់លី អាយុ៣៤ឆ្នាំ។ លោកស្រី បានបញ្ជាក់ថា លោកគួច ផល់លី កាលពីមុន គាត់ជាបុគ្គលិកបម្រើការងារ ឲ្យធនាគារមួយ នៅរាជធានីភ្នំពេញ ហើយក្រោយមកក៏បានចូលមកបម្រើការងារ ឲ្យធនាគាររបស់លោកស្រី ហើយកាលណោះលោកស្រី ហាក់ដូចជាមិនទាន់មានការជឿទុកចិត្តប៉ុន្មានឡើយ ប៉ុន្តែក្រោយពេលបម្រើការងារ ជាមួយលោកស្រី បានប្រមាណ១ឆ្នាំ លោកស្រីបានមើលឃើញថា បុគ្គលិករូបនេះ បានបម្រើការងារបានល្អ និងមានភាពស្មោះត្រង់ ជាមួយធនាគារ រហូតលោកស្រី បានផ្តល់ភាពជឿទុកចិត្ត និងបានផ្តល់តួនាទីទទួលបន្ទុកផ្នែកគ្រប់គ្រង់មួយ នៅក្នុងធនាគារនេះ។ ទន្ទឹមនឹងការបម្រើការងារ បានយ៉ាងល្អ និងទទួលបានការជឿទុកចិត្ត ពីធនាគារ លោកស្រី តែងតែទំនុកបម្រុងសម្ភារ និងថវិកា ជាដើម ដល់លោកគួច ផល់លី និងក្រុមគ្រួសារថែមទៀត។
ក្នុងកិច្ចសម្ភាសន៍នោះដែរ លោកស្រី ក៏បានធ្វើការអំពាវនាដល់បុគ្គលិកផ្សេងៗទៀត គួរយកគំរូតាមបុគ្គលិកឆ្នើម គួច ផល់លី បើបុគ្គលិកធនាគារបម្រើការងារល្អ និងស្មោះត្រង់ ធនាគារនឹងផ្តល់នូវការតបស្នង មានន័យថា បើធនាគាររីកចម្រើន បុគ្គលិកដែលបម្រើក្នុងធនាគារ នឹងមានជីវភាពធូធារ។ ដូច្នេះទេ សុំឲ្យបុគ្គលិក ក្នុងធនាគារទាំងអស់ សហការ សាមគ្គីគ្នា លើកកម្ពស់ការទទួលខុសត្រូវខ្ពស់ បង្កើនភាពស្មោះត្រង់ នោះនឹងធ្វើឲ្យធនាគាររីកចម្រើន ស្ថិតស្ថេរជារៀងរហូត ។
ឆ្លៀតឱកាសនោះដែរ លោកស្រី ក៏បានថ្លែងអំណរគុណយ៉ាងជ្រាលជ្រៅ ដល់បុគ្គលិកគ្រប់ជាន់ថ្នាក់ នៅក្នុងធនាគារទាំងអស់ ដែលខិតខំប្រឹងប្រែង ក្នុងរយៈកាលកន្លងមក ដើម្បីឲ្យធនាគារអាចដំណើរការសម្ពោធនាពេលឆាប់ៗខាងមុខនេះ ហើយក៏សូមជូនពរ ឲ្យបុគ្គលិកទាំងអស់មានសុខភាពល្អ មានសំណាងល្អ ក្នុងឱកាសបុណ្យចូលឆ្នាំថ្មីប្រពៃណីជាតិខ្មែរនេះផងដែរ ៕ ដោយ ៖ កូឡាប
