ភ្នំពេញ ៖ ក្រសួងធនធានទឹកនិងឧតុនិយម នៅថ្ងៃទី២៥ខែមីនាឆ្នាំ២០១៩នេះ បានចេញសេចក្តីជូនដំណឹង ស្តីពី ស្ថានភាពអាកាសធាតុ ចាប់ពីថ្ងៃទី២៦ មីនា ដល់ទី២ មេសា ឆ្នាំ២០១៩ ដែលអាចកើតមានបាតុភូត ផ្គររន្ទះ និងខ្យល់កន្ត្រាក់ និងការកើនឡើងកម្តៅឡើងវិញ។
យោងតាមការតាមដាន និងសង្កេតលើលក្ខណៈអាកាសធាតុជាប្រចាំ សង្កេតឃើញថា នៅថ្ងៃទី២៦ ដល់ទី២៩ខែមីនា ឥទ្ធិពលនៃការប្រសព្វគ្នា រវាងសម្ពាធទាប (ទិសខាងលិខ និងពាយ័ព្យ) និងសម្ពាធខ្ពស់នៃតំបន់ខ្ពង់រាបចុះខ្សោយ ធ្វើឲ្យកម្រិតទឹកភ្លៀងកក់ខែ ក៏ធ្លាក់ខុះផងដែរ។ ទន្ទឹមនេះ កម្តៅនឹងកើនឡើងវិញ ដែលកម្រិតសីតុណ្ហភាពអតិបរមា មានពី៣៤ ទៅ៣៧អង្សាសេ។ ចាប់ពីថ្ងៃទី៣០ ខែមីនា ដល់ថ្ងៃទី២ ខែមេសា ឥទ្ធិពលនៃការប្រសព្វគ្នា រវាងសម្ពាធទាប និងសម្ពាធខ្ពស់ បន្តកើតឡើងវិញ សាជាថ្មី ម្តងទៀត ដែលបណ្តាលឲ្យមានភ្លៀងកើតឡើងវិញជាបន្តបន្ទាប់ ដែលនាំមកជាមួយនូវផ្គររន្ទះ និងខ្យល់កន្ត្រាក់ផងដែរ។ ឯសីតុណ្ហភាព ជាទូទៅ មានពី ៣០ទៅ៣៣អង្សាសេ។
ក្រសួងធនធានទឹក ក៏បានជម្រាបទៅដល់បងប្អូនប្រជាពលរដ្ឋ មានការប្រុងប្រយ័ត្នខ្ពស់ ចំពោះបាតុភូត ផ្គររន្ទះ និងខ្យល់កន្ត្រាក់៕ ដោយ ៖ កូឡាប
