តាកែវ ៖ សំនួរជាច្រើនត្រូវបានលើកយកមកសួរ នៅក្នុងការប្រារព្ធពិធីផ្សព្វផ្សាយការងារជាតិប្រយុទ្ធប្រឆាំងគ្រឿងញៀន ដល់មន្ត្រីរាជការ និស្សិត សិស្ស អង្គការសង្គមស៊ីវិល និងម្ចាស់ភោជនីយដ្ឋាន ម្ចាស់ផ្ទះសំណាក់ នៅសាលប្រជុំសាលាខេត្តតាកែវ នាព្រឹកថ្ងៃទី ២៥ ខែមីនា ២០១៩ យុវជន យុវនារីដែលតំណាងអោយបងប្អូនប្រជាពលរដ្ឋដែលរស់នៅក្នុងខេត្តាកែវ បានឡើងមកសួរ ជាសំនួរជាច្រើនដោយក្តោបរួម អំពីការព្រួយបារម្មណ៏លើបញ្ហាគ្រឿងញៀន គឺកាន់តែមានការកើនឡើង និងរីកសាយភាយដល់ទីជនបទដាច់ស្រយ៉ាល ដែលក្នុងនោះពួកគាត់បានស្នើសុំអោយសមត្ថកិច្ចពាក់ព័ន្ធជួយអន្តរាគមន៍ លើការបង្ក្រាប និងបោសសំអាតអោយអស់ ចំពោះអ្នកចែកចាយ និងអ្នកប្រើប្រាស់គ្រឿងញៀន ដើម្បីភូមិឃុំរបស់យើងមានសុវត្ថិភាព ។
ឆ្លើយតបជាមួយនិងសំនួរដែលចោទសួរពាក់ព័ន្ធលើសមត្ថកិច្ច ឯកឧត្តមឧត្តមសេនីយ៍ទោ សុខ សំណាង ស្នងការនគរបាលខេត្តតាកែវ បានឡើងធ្វើការពន្យល់និងធ្វើការណែនាំដល់ក្រុមនិស្សិត សិស្ស អង្គការសង្គមស៊ីវិល និងម្ចាស់ភោជនីយដ្ឋាន ម្ចាស់ផ្ទះសំណាក់ អោយយល់ដឹងកាន់តែច្បាស់ ចំពោះបញ្ហាគ្រឿងញៀន ដែលកើតមានឡើងនៅក្នុងមូលដ្ឋានរបស់យើង ។ លោកស្នងការបានបញ្ជាក់ថា គ្រឿងញៀនមិនមែនកើតមានឡើងនៅក្នុងតែមូលដ្ឋានរបស់យើងនោះទេ សម្បីតែប្រទេសគេដទៃក៏មានដូចគ្នា ដូច្នេះវិធានការដែលអាចទប់ស្កាត់ និងបង្ក្រាបការចែកចាយ និងអ្នកប្រើប្រាស់គ្រឿងញៀននោះ លុះត្រាតែ មានការសហការល្អរវាងសមត្ថកិច្ច អាជ្ញាធរ ពិសេសគឺពលរដ្ឋផ្ទាល់ ទើបអាចសម្រេចបាននូវ ប្រធានបទ (ចូលរួមទាំងអស់គ្នាដើម្បីជីវិត និងសហគមន៍យើងគ្មានគ្រឿងញៀន) ព្រោះថា ការចរាចរណ៏គ្រឿងញៀន និងអ្នកប្រើប្រាស់គ្រឿងញៀន គឺមិនមែនអោយសមត្ថកិច្ចយើងបានដឹងមុនឬឃើញរូបភាពភ្លាមៗនោះទេ ក្រោមរូបភាពកេចវេសនេះ ទើបធ្វើអោយសមត្ថកិច្ចមានការលំបាកក្នុងការបង្ក្រាប និងតាមដានមុខសញ្ញា ដូច្នេះដើម្បីទទួលបានជោគជ័យគឺ ទល់តែមានការចូលរួមសហការពី អាជ្ញាធរមូលដ្ឋាន សមត្ថកិច្ច ជាពិសេសបងប្អូនប្រជាពលរដ្ឋផ្ទាល់តែម្តង ទើបការបង្ក្រាបរបស់យើងទទួលបានជោគជ័យ ។
ទន្ទឹមនិងមានការឆ្លើយតបរបស់ស្នងការនគរបាលខេត្តរួច ឯកឧត្តម អ៊ូច ភា អភិបាលខេត្តតាកែវ បានជំរុញដល់អាជ្ញាធរភូមិ-ឃុំ-ស្រុក-ក្រុង ត្រូវ ធ្វើបច្ចុប្បន្នភាពជនប្រើប្រាស់គ្រឿងញៀន និងកំណត់មុខសញ្ញាឲ្យបានច្បាស់លាស់ ក្នុងការងារទប់ស្កាត់ការជួញដូរ និងប្រើប្រាស់ គ្រឿងញៀន ហើយត្រូវបង្កើតគណៈកម្មាធិការតាមគោលដៅនៅមូលដ្ឋានគ្រប់ទីកន្លែង សម្រាប់ទទួលខុសត្រូវការងារជំនាញគ្រឿងញៀននេះ។ មួយវិញទៀតអាជ្ញាធរមូលដ្ឋាន ក៏ដូចជាសមត្ថកិច្ចជំនាញពាក់ព័ន្ធត្រូវធ្វើការផ្សព្វផ្សាយជាប្រចាំ នៅតាមគោលដៅដូចជា នៅតាមសណ្ឋាគារ ផ្ទះសំណាក់ ក្លឹបកំសាន្ត សាលារៀន ឬកន្លែងផ្សេងទៀត ពិសេសជាមួយប្រជាពលរដ្ឋ ដោយឲ្យពួកគាត់ ចូលរួមកិច្ចសហការនេះទាំងអស់គ្នា ទើបការងារទប់ស្កាត់ការងារជួញដូរ និងប្រើប្រាស់ គ្រឿងញៀននេះ ទទួលបានប្រសិទ្ធភាពខ្ពស់ ៕ ដោយ ៖ តាកែវ