ខេត្តព្រះសីហនុ៖ ប្រជាពលរដ្ឋ និងអាជីវករភាគច្រើន រស់នៅទីប្រជុំជន ក្នុងក្រុងព្រះសីហនុ បានបន្តរិះ អាជ្ញាធររដ្ឋបាលក្រុង-ខេត្តព្រះសីហនុថា មិនទាន់អាចគ្រប់គ្រងកាកសំណល់សំរាម ឲ្យបានល្អទេ និងស្នើឲ្យអាជ្ញាធរ ជួយជម្រុញទៅក្រុមហ៊ុនវិនិយោគប្រមូលសំរាម KSWM ឲ្យបង្កើនសកម្មភាពប្រមូលសំរាម របស់ខ្លួន ឲ្យបានទៀងទាត់។
ប្រជាពលរដ្ឋ ឲ្យដឹងថា បញ្ហាអសកម្ម ដែលកើតមានពីការគ្រប់គ្រងកាកសំណល់សំរាម នាទីប្រជុំជនក្រុងព្រះសីហនុ គឺបានបន្តកើតមានមិនចេះចប់ មិនចេះហើយ ក្នុងប៉ុន្មានឆ្នាំចុងក្រោយនេះ។
ប្រជាពលរដ្ឋរស់នៅក្រុងព្រះសីហនុ ថ្លែងថា រាល់ថ្ងៃនេះ ពួកគាត់មានផលវិបាកជាច្រើនក្នុងការរស់នៅ គមានដូចជា៖ ភាពយឺតយ៉ាវ របស់ក្រុមហ៊ុនប្រមូលសំរាម KSWM ដើរប្រមូលសំរាមមិនបានទៀងទាត់ និងមិនទាន់រាប់បញ្ចូល មូលដ្ឋាននេះ ខ្ចះទឹកស្អាត និងខ្វះចរន្តអគ្គិសនី ប្រើប្រាស់មិនគ្រប់ចំនួនជាដើម។
ចំណុចអសកម្មភាពទាំងនេះ ត្រូវបាន ប្រជាពលរដ្ឋ មន្ត្រីរាជការ និងអាជីវករភាគច្រើន រស់នៅក្រុងព្រះសីហនុ បានរអ៊ូរទាំថា មិនគួរទីប្រជុំជនក្រុងព្រះសីហនុ ដែលមានឈ្មោះជាក្រុងទេសចរណ៍ជាប់ឆ្នេរសមុទ្រ ល្បីល្បាញនៅលើពិភពលោក ប៉ុន្តែបែរជា អាជ្ញាធរពាក់ព័ន្ធមិនអាចគ្រប់គ្រងកាកសំណល់សំរាម និងមានទឹកស្អាត ព្រមទាំងចរន្តអគ្គិសនី សម្រាប់ផ្តល់ជូនប្រជាពលរដ្ឋ និងភ្ញៀវទេសចរ ប្រើប្រាស់ប្រចាំថ្ងៃ ឲ្យបានគ្រប់ចំនួនបែបនេះទេ។
ក្រុមប្រជាពលរដ្ឋ បានរអ៊ូរទាំដូច្នេះ រួចបញ្ជាក់ថា រាល់ថ្ងៃនេះ ក្រុមហ៊ុនKSWM ដែលទទួលបានសិទ្ធិវិនិយោគប្រមូលសំរាម ក្នុងក្រុងទេសចរណ៍មួយនេះ ហាក់មិនទាន់បានទទួលខុសត្រូវលើកិច្ចការងារ របស់ខ្លួន ឲ្យបានត្រឹមត្រូវតាមកុងត្រាទេ ហើយតែង បានបង្កផលវិបាកដល់ប្រជាពលរដ្ឋដដែលៗ។ ព្រោះក្រុមហ៊ុនប្រមូលសំរាម មិនបានទៀងទាត់ទេ ដោយទុកឲ្យកាកសំណល់សំរាមគររាយប៉ាយ នៅតាមចិញ្ចើមផ្លូវយូរថ្ងៃ និងមានក្លឹនស្អុយ។
ផ្តើមពីបញ្ហានេះ ប្រជាពលរដ្ឋ រស់នៅទីប្រជុំជនក្រុងព្រះសីហនុ បានសំណូមពរដល់ លោក អ៊ី សុខឡេង អភិបាលក្រុងព្រះសីហនុ និងលោក យន្ត មីន ជាអភិបាលខេត្ត ឲ្យជួយជម្រុញ និង ពន្លឿនទៅក្រុមហ៊ុនប្រមូលសំរាម ឈ្មោះ KSWM ឲ្យបង្កើនសកម្មភាពចុះប្រមូលសំរាម ដែលគរទុកចោលនៅមុខផ្ទះ របស់ប្រជាពលរដ្ឋ តាមចិញ្ចឹមផ្លូវសាធារណៈនានា ឲ្យបានឆាប់ ព្រោះកាកសំណល់សំរសមគរទុកចោលយូរថ្ងៃ បង្កើតឲ្យមានក្លឹនស្អុយខ្លាំង។
ពលរដ្ឋបន្តថា ក្លឹនស្អុយភាយចេញពីកាកសំណល់សំរាម បានជះក្លឹនស្អុយ នាំឲ្យប៉ះពាល់ដល់ការរស់នៅ របស់ប្រជាពលរដ្ឋ ពួកគាត់ ជាពិសេសប៉ះពាល់ដល់អារម្មណ៍ ភ្ញៀវទេសចរជាតិ-អន្តរជាតិ ដែលចូលមកកម្សាន្តខេត្តព្រះសីហនុ។
ចំណុចនេះ ប្រជាពលរដ្ឋ ថ្លែងហួសចិត្តកាលបើ សូម្បីតែកាកកំណល់សំរាម បែរជារដ្ឋបាលក្រុង-ខេត្តព្រះសីហនុ គ្រប់គ្រងមិនទាន់បានល្អ ដោយទុកឲ្យរឿងអសកម្មនេះ កើតមានដដែលៗបន្តអូសបន្លាយពេលរាប់ឆ្នាំ ហើយគ្មានដំណោះស្រាយនោះទេ។
បញ្ហាកាកសំណល់សំរាម ដែលគរទុកចោលយូរថ្ងៃ នៅតាមចិញ្ចើមផ្លូវសាធារណៈ នាទីប្រជុំជនក្រុងព្រះសីហនុនេះ គឺបានកើតមានតាំងពីឆ្នាំ២០១៨មកម្ល៉េះ។ ហើយចូលមកដល់ឆ្នាំ២០១៩នេះទៅហើយ អាជ្ញាធររដ្ឋបាលក្រុង-ខេត្តព្រះសីហនុ នៅមិនទាន់គ្រប់គ្រងកាកសំណល់សំរាមនេះបាននៅឡើយ ដោយឃើញគំនរសំរាមត្រូវបានគេគរទុកចោល នៅតាមចិញ្ចើមផ្លូវសាធារណៈ គ្មានសណ្តាប់ធ្នាប់ នាំឲ្យប៉ះពាល់ដល់អនាម័យបរិស្ថាន និងសោភ័ណភាពមកដល់ពេលនេះ។
ភាពអសកម្ម ដែលកើតមានដដែលៗនេះ ប្រជាពលរដ្ឋភាគច្រើន រស់នៅក្រុងព្រះសីហនុ បានសំណូមពរយ៉ាងទទូចម្តងហើយម្តងទៀតទៅ លោក អ៊ី សេខឡេង អភិបាលក្រុងព្រះសីហនុ និងលោក យន្ត មីន អភិបាលខេត្តព្រះសីហនុ ស្នើឲ្យជួយមានវិធានការដោះស្រាយ ឲ្យមានប្រសិទ្ធភាព ដោយមិនត្រូវទុកឲ្យភាពអសកម្មរឿងសំរាមនេះ បន្តអូសបន្លាយពេលរាប់ឆ្នាំ ហើយគ្មានដំណោះស្រាយនោះទេ។
ចំណុចនេះ ក្រុមប្រជាពលរដ្ឋ បានស្នើទៅ លោកអភិបាលក្រុង និងអភិបាលខេត្តព្រះសីហនុ ឲ្យជួយជម្រុញទៅក្រុមហ៊ុនប្រមូលសំរាម KSWM ឲ្យបង្កើនសកម្មភាពចុះប្រមូលសំរាម ឲ្យបានទៀងទាត់ ព្រោះការទុកឲ្យកាកសំណល់សំរាមគរទុកចោលយូរថ្ងៃ បណ្តាលឲ្យមានក្លឹនស្អុយ នាំប៉ះពាល់ដល់សុខភាព និងប៉ះពាល់ដល់អារម្មណ៍ភ្ញៀវទេសចរជាតិ-អន្តរជាតិ ដែលចូលមកទស្សនាខេត្តនេះ។
ឆ្លើយតបបញ្ហាសំរាមនេះ មន្ត្រីរដ្ឋបាលក្រុងព្រះសីហនុ បានសរសេរសារបង្ហោះ តាមបណ្តាញសង្គម ឬប្រព័ន្ធ Telegram របស់រដ្ឋបាលក្រុងថា ចំពោះការលើកឡើង របស់មហាជន ដែលថាមួយរយៈចុងក្រោយនេះ ឃើញមានសំរាមកកស្ទះច្រើនស្ទើរគ្រប់កន្លែងក្នុងក្រុងព្រះសីហនុនោះ គឺអាជ្ញាធរក្រុង មិនព្រងើយកន្តើយលើរឿងនេះទេ ។
បញ្ហានេះ មន្ត្រីរដ្ឋបាលក្រុងព្រះសីហនុ ពន្យល់ថា ករណីសំរាមកកស្ទះជាបន្តបន្ទាប់មកនេះ ខាងក្រុមហ៊ុនប្រមូលសំរាម (KSWM) បានអះអាងថា ដោយសារខាងក្រុមហ៊ុននេះ ជួបវិបត្តិខ្វះកម្លាំងពលកម្ម ឬខ្វះបុគ្គលិកកម្មករ។ ក្នុងនោះកម្មករមួយចំនួន របស់ក្រុមហ៊ុននេះ ក៏បានសុំច្បាប់ឈប់សម្រាកទៅស្រុក នារដូវធ្វើស្រែជិតចូលមកដល់ ។ ចំណែកកម្មករខ្លះទៀត បានសុំឈប់ធ្វើការ ពីក្រុមហ៊ុននេះ ដោយត្រូវប្តូរទៅធ្វើការងារ នៅតាមក្រុមហ៊ុនផ្សេងៗវិញ។
ត្រង់ចំណុចនេះ មន្ត្រីរដ្ឋបាលក្រុងព្រះសីហនុ បានបកស្រាយជំនួសក្រុមហ៊ុន KSWM ថា រាល់ថ្ងៃនេះ ការជ្រើសរើសកម្មករប្រមូលសំរាមមកធ្វើការ គឺពិបាករកបំផុត គឺស្របពេលទីផ្សារការងារ នៅក្រុងព្រះសីហនុ នាពេលបច្ចុប្បន្ន មានជម្រើសការងារដ៏សម្បូរបែប និងមានប្រាក់បៀវត្ស ឬតម្លៃពលកម្មខ្ពស់។
ទោះជាបែបនេះក្តី តំណាងក្រុមហ៊ុន KSWM បានឲ្យដឹងថា កំពុងស្វះស្វែងរកកម្មករបន្ថែម ពីតាមបណ្តាខេត្តផ្សេងៗ មកបំពេញកន្លែងខ្វះខាត បូករួមក្រុមហ៊ុនមានគោលការណ៍បង្កើនប្រាក់ឧបត្ថម្ភផ្សេងៗ ជូនដល់កម្មករប្រមូលសំរាម និងបង្កើនសមត្ថភាពបច្ចេកទេសដល់កម្មករផងនោះ នឹងអាចជម្រុញឲ្យដំណើរការប្រមូលសំរាម នាទីប្រជុំជនក្នុងក្រុងព្រះសីហនុ បានប្រសើរឡើងវិញនៅថ្ងៃខាងមុខ។
បន្ថែមលើនេះ មន្ត្រីរដ្ឋបាលក្រុងព្រះសីហនុ ក៏បានផ្សព្វផ្សាយដល់ប្រជាពលរដ្ឋថា ក្នុងករណីមានកាកសំណល់សំរាមកកស្ទះ ឬគរទុកចោលយូរថ្ងៃ នៅទីតាំងណាមួយអូសបន្លាយពេលយូរថ្ងៃ គឺ អាចទាក់ទងទៅកាន់សាលាសង្កាត់ក្នុងមូលដ្ឋានខ្លួន ដែលកំពុងរស់នៅ ដើម្បីឲ្យជួយអន្តរាគមន៍ប្រមូលសំរាមទាំងនោះ។ ព្រោះថា បច្ចុប្បន្ននេះ ខាងក្រុមហ៊ុន KSWM បានបែងចែករថយន្តដឹកសំរាម ឲ្យទៅប្រចាំការដឹកសំរាម នៅតាមសង្កាត់នីមួយៗជាអ្នកទទួលខុសត្រូវ។
ក្រៅពីនេះ មន្ត្រីរដ្ឋបាលក្រុងព្រះសីហនុ ក៏អំពាវនាវ ដល់ប្រជាពលរដ្ឋ ត្រូវចូលរួមវេចខ្ចប់ទុកដាក់សំរាមជាដុំៗឲ្យបានត្រឹមត្រូវ ដោយមិនត្រូវបោះចោលរាយប៉ាយ បង្កផលវិបាកដល់បុគ្គលិកប្រមូលសំរាមទេ។ ព្រោះការវេចខ្ចប់កាកសំណល់សំរាម ឲ្យមានរបៀបរៀបរយល្អ គឺអាចជួយពន្លឿនដល់សកម្មភាពប្រមូលសំរាម ចេញពីទីក្រុង ឆ្ពោះទៅកាន់ទីលានចាក់សំរាម ដែលមានចម្ងាយឆ្ងាយ ស្ថិតនៅស្រុកព្រៃនប់ឲ្យមានភាពឆាប់រហ័យ៕ ដោយ ៖ ដែន សីមា
