ភ្នំពេញ : ការទន្ទឹងរង់ចាំ និងភាពរំភើបរីករាយរបស់សិស្សានុសិស្ស បុគ្គលិកការងារ មាតាបិតារបស់សិស្ស និងពីសំណាក់មហាជន ក្នុងការប្រារព្ធកម្មវិធីសប្បុរសធម៌ ក្នុងឱកាសចូលឆ្នាំប្រពៃណីខ្មែររបស់ សាលា ACE កាន់តែខិតជិតមកដល់ហើយ។ ក្រោមការរៀបចំរបស់គណៈកម្មការសង្គមរបស់ IDP និងACE និងចូលរួម ដឹកនាំដោយអគ្គរាជទូតសុឆន្ទៈសិស្ស និងបុគ្គលិករបស់សាលាACE ទាំង អស់ កម្មវិធីសប្បុរសធម៌ ក្នុងឱកាសចូលឆ្នាំប្រពៃណីខ្មែរនេះ នឹងធ្វើទ្បើងនៅថ្ងៃទី០៧ ខែមេសា ឆ្នាំ២០១៩ រយៈពេលមួយថ្ងៃពេញ (ចាប់ពីម៉ោង ៨និង៣០ ព្រឹក ដល់ ៥និង០០ ល្ងាច) នៅសាលា ACE ទីតាំងទួលទំពូង។
ការដើរបង្ហាញម៉ូតរបស់អគ្គរាជទូតសុឆន្ទៈសិស្សសាលា ACE ក្នុងកម្មវិធីសប្បុរសធម៌ក្នុងឱកាសចូលឆ្នាំប្រពៃណីខ្មែរ ២០១៧
គួរបញ្ជាក់ផងដែរថា កម្មវិធីសប្បុរសធម៌នេះមិនត្រឹមតែមានគោលបំណងរកមូលនិធិជួយ កសាងបង្គន់អនាម័យ និងអណ្ដូងទឹកដល់សាលារៀនតាមជនបទប៉ុណ្ណោះទេ តែក៏ជួយផ្សព្វផ្សាយ វប្បធម៌ប្រពៃណី និងគំនិតចែករំលែកទៅដល់ប្រជាពលរដ្ឋគ្រប់ស្រទាប់វណ្ណៈផងដែរ។
ការសម្ដែងរបស់សិស្សានុសិស្សកម្មវិធីសំរាប់កុមារ សាលាACE ក្នុងកម្មវិធីសប្បុរសធម៌ក្នុងឱកាសចូលឆ្នាំប្រពៃណីខ្មែរ ២០១៨
ដោយឡែកសំរាប់ព្រឹត្ដិការណ៍ឆ្នាំនេះ នឹងមានលក្ខណៈប្លែកជាងបណ្ដាឆ្នាំមុនៗបន្តិចដោយសិស្សានុសិស្ស និងអាណាព្យាបាលត្រូវបានអញ្ជើញឲ្យចូលរួមកម្មវិធីសូត្រមន្ដនិងរាប់បាត្រនៅពេលព្រឹកចាប់ពីម៉ោង ៨:៣០ ដល់ ១០:២០ ដោយសេរី។ សម្រាប់កម្មវិធីនៅពេលព្រឹកនេះដែរ នឹងមានការទេសនាផ្ដល់ឱវាទដោយ ព្រះភិក្ខុ សត្យមុនីបុត្តោ ជា សុមាលា (ព្រះអគ្គនាយកវិទ្យុមាលា) និងពិធីប្រគេនទេយ្យទាននិងរាប់បាត្រព្រះសង្ឃចំនួន ៧០ អង្គផងដែរ។ ដោយទ្បែកសម្រាប់កម្មវិធីនៅពេលរសៀល (តម្រូវឲ្យមានសំបុត្រចូលរួម) អ្នកចូលរួមទាំងអស់អាចទទួលទានអាហារថ្ងៃត្រង់ និងភ្លក់រសជាតិម្ហូបអាហារបែបខ្មែរដែលមានរសជាតិឈ្ងុយឆ្ងាញ់ ជុំគ្នា។ លើសពីនេះទៀត អ្នកចូលរួមនឹងមានឱកាសបានទស្សនានូវម៉ូតសំលៀកបំពាក់របស់ខ្មែរយើង ទៅតាមសម័យកាល នីមួយៗ (ចាប់ពីសម័យមុនអង្គរ រហូតដល់សម័យឧដ្តុង្គ) និងឧបករណ៍តន្ដ្រីបុរាណផងដែរ។ ហើយអ្វីដែលកាន់តែពិសេសនោះ គឺអ្នកចូលរួមទាំងអស់ក៏អាចទទួលបាននូវអារម្មណ៍មួយដែលពួកគេហាក់ដូចជាកំពុងស្ថិតនៅក្នុងសម័យកាលណាមួយ ដោយពួកគេអាចស្លៀកសំលៀកបំពាក់ របស់សម័យកាលនីមួយៗដែលខ្លួនពេញចិត្ត។ លើសពីនេះទៅទៀតអ្នកចូលរួមនឹងមានឱកាស រាំលេងកំសាន្ដទៅតាមចង្វាក់ប្រពៃណី និងលេងល្បែងប្រជាប្រិយជាច្រើនទៀត។
ការលេងល្បែងប្រជាប្រិយរបស់អ្នកចូលរួមក្នុងកម្មវិធីសប្បុរសធម៌ក្នុងឱកាសចូលឆ្នាំប្រពៃណីខ្មែរ ២០១៨
មួយវិញទៀត សំរាប់អ្នកដែលចូលចិត្ត ឬអ្នកដែលចង់ហាត់ Yoga អាចអញ្ជើញចូលរួម បានណា ព្រោះយើងក៏មានបន្ទប់សំរាប់ហាត់ Yoga ដែលបង្រៀនដោយគ្រូជំនាញផងដែរ។ ជាចុងក្រោយ ក៏នឹងមានការតាំងពិព័រណ៍ស្ដង់ជាច្រើន រួមមានស្តង់មកពីស្ថាប័នដែលបានឧបត្ថម្ភកម្មវិធី ស្តង់លក់ម្ហូបអាហារបែបខ្មែរ ភេសជ្ជៈ និងវត្ថុអនុស្សារីយ៍ ដើម្បីជួយគាំទ្រដល់សកម្មភាពសប្បុរសធម៌នេះផងដែរ។
សំបុត្រចូលរួមកម្មវិធីមានលក់នៅគ្រប់ទីតាំងសាលា ACE ទាំងអស់នៅភ្នំពេញ (ទីតាំងសម្ដេចប៉ាន ទីតាំងសន្ធរម៉ុក ទីតាំងទួលទំពូង និងទីតាំងទួលគោក) ឬទំនាក់ទំនងតាមរយៈ ០២៣ ២២២ ៣២៥ / ០៩៦ ៧៣០០ ៩២១ ឬ Facebook page: ACE Charity។
សំបុត្រចូលរួមមួយតម្លៃតែ ២០ ០០០រៀល ប៉ុណ្ណោះ (មានអាហារថ្ងៃត្រង់ជូន)
ថវិកាដែលទទួលបានពីកម្មវិធីនឹងយកជួយកសាងបង្គន់អនាម័យ និងអណ្ដូងទឹកដល់សាលារៀនតាមជនបទ។
នៅចាំអីទៀត កុំភ្លេចចូលរួមទាំងអស់គ្នាណា!៕ ដោយ ៖ កូឡាប
