ភ្នំពេញ-មជ្ឈមណ្ឌលសម្រាប់ការការពារនិងការថែទាំរថយន្តបែបលក្ខណៈស្តង់ដារ ស៊ីធីអេស (C.T.S) បានបើកសម្ពោធជាផ្លូវការហើយនៅរាជធានីភ្នំពេញ ប្រទេសកម្ពុជា នាព្រឹកថ្ងៃទី២០ ធ្នូ ឆ្នាំ២០១៧នេះ ក្នុង ទិសដៅបំពេញតម្រូវការរបស់អតិថិជនដែលមានប្រើប្រាស់នូវរថយន្តទំនើបៗ។
មជ្ឈមណ្ឌលថែទាំ ការពាររថយន្តកម្រិតស្តង់ដា (C.T.S) នៃក្រុមហ៊ុន ខេប៊ី ស៊ីធីអេស គ្រីស្តាល់ អូតូ សឺវីសប្រចាំកម្ពុជា ដែលចំណាយដើមទុនរាប់លានដុល្លារ ត្រូវបានដាក់សម្ពោធហើយ ខណៈដែលស្លាកយីហោមួយនេះត្រូវបានអតិថិជនទទួលស្គាល់ក្នុងបណ្តាប្រទេសអាស៊ី និងអាស៊ីអាគេ្នយ៍។ នេះជាការលើកឡើងរបស់ លោក លីម សុខឃាង អគ្គនាយក ក្រុមហ៊ុនខេប៊ី ស៊ីធីអេសគ្រីស្តាល់អូតូសឺវីស។
ថ្លែងក្នុងពិធីសម្ពោធលោក អគ្គនាយក បានមានប្រសាសន៍ថា ដោយមើលឃើញថា នៅ ប្រទេសកម្ពុជានៅខ្វះមជ្ឈមណ្ឌលថែទាំរថយន្តដែលមានស្តង់ដារ និងស្របពេលដែលក្រុមហ៊ុនរបស់លោកទទួលបានជោគជ័យខ្លាំងលើ ឡូហ្គោ ស៊ីធីអេស នៅប្រទេសថៃជាង១០ឆ្នាំ ទើបលោកសម្រេចបើក មជ្ឈមណ្ឌលនេះឡើងនៅប្រទេសកម្ពុជា ដើម្បីបំពេញបំណង ដល់អតិថិជនដែលប្រើប្រាស់រថយន្តទំនើប និងត្រូវការ ការថែរក្សាសម្រស់រថយន្តរបស់ខ្លួន ឲ្យដូចទៅនឹងការថែរក្សាសម្ភស្សរបស់មនុស្សស្រីអីចឹងដែរ។
លោកអគ្គនាយកបានលើកឡើងបន្តថា ស៊ីធីអេស គឺជាមជ្ឈមណ្ឌលតែមួយនៅក្រុងភ្នំពេញ សម្រាប់ ការការពារនិងការថែទាំរថយន្តដើម្បីភ្លឺចាំងជាមួយថ្នាំកូត ការបាញ់ថ្នាំជាមួយនិងសារធាតុស៊ីលិកាដែលមាន គុណភាពខ្ពស់ បង្កើតគ្រីស្តឆាល់ ដើម្បីការពាររថយន្តយ៉ាងពិសេស។ លោកឲ្យដឹងទៀតថា ក្រុមហ៊ុនមាន សេវាដើម្បីការពារពាក់ព័ន្ធនឹងកញ្ចក់នៅក្រោមនាយកដ្ឋាន អូតូ ហ្វៀម ស្ទីឌីយ៉ូ មួយសន្លឹកសម្រាប់កញ្ចក់ ខាងមុខ ជាមួយនឹងការបង្កើតសន្លឹកការពារ ដែលទទួលបានពន្លឺខាងក្រៅដោយផ្ទាល់។
ចំណែក ឯកឧត្តម នួន ផារ័ត្ន អភិបាលរង រាជធានីភ្នំពេញ បានសម្តែងការសាទរជាមួយនឹងវត្តមានថ្មីរបស់មជ្ឈមណ្ឌលថ្មីនេះ ដោយបានបង្ហាញពីភាពរីកចម្រើនរបស់ ប្រទេសកម្ពុជាពីមួយឆ្នាំទៅមួយឆ្នាំនិងគ្រប់វិស័យ ជាពិសេសវិស័យខាងផ្នែកសេវាកម្មតែម្តង។ ឯកឧត្តម មានជំនឿជឿជាក់ថា នាពេលខាងមុខនឹងមានការបើកសម្ពោធហាង និងក្រុមហ៊ុនដទៃផ្សេងទៀត ខណៈ ដែលសេដ្ឋកិច្ចនៅកម្ពុជាមានភាពល្អប្រសើរឡើង។
សូមរំលឹកថា ផ្លាកសញ្ញា C.T.S នៃមណ្ឌលថែទាំរថយន្ត មានដើមកំណើតចេញពី ប្រទេសជប៉ុន បន្តមក ហុងកុង ថៃ សិង្ហបុរី ម៉ាឡេ កូរ៉េ និងប្រទេសអាស៊ីអាគ្នេយ៍ ។ លោកថា ប្រសិនបើថ្ងៃខាងមុខ មានអតិថិជនរងចាំសេវាកម្មមួយនេះច្រើន លោកនឹងមានគម្រោងពង្រីកសាខា បន្ថែមទៀតមិនថានៅតាមបណ្តាខេត្តឬក្រុងភ្នំពេញនោះទេ៕ ដោយ-ក្រុមហ៊ុន
