ភ្នំពេញ ៖ ដើម្បីឲ្យទណ្ឌិត ដែលបានចេញពីគុកវិញ បានកែប្រែ និងយកចំណេះវិជ្ជាជីវៈ ដែលបានហាត់រៀន ពេលជាប់ទោស មកប្រកបមុខរបរ នៅក្នុងសង្គមដោយសុច្ចរិត មិនបន្តធ្វើសកម្មភាពប្រព្រឹត្តបទល្មើសច្បាប់បន្តទៀត មន្ត្រីអនុរក្សពន្ធនាគារ ត្រូវចេះអប់រំចិត្តសាស្ត្រដល់ទណ្ឌិតឲ្យបានល្អ ហើយពេលចេញមកវិញ អាជ្ញាធរមូលដ្ឋានត្រូវតាមដានមើលទណ្ឌិតនោះជាប់ជាប្រចាំ ថាតើពួកគេបានកែប្រែខ្លូនឬទេ?។
លោកមាន ចាន់យ៉ាដា អភិបាលរងរាជធានីភ្នំពេញ បានថ្លែងបែបនេះ ក្នុងកិច្ចប្រជុំវគ្គបណ្តុះបណ្តាលវិជ្ជាជីវៈ និងមុខរបរពិតប្រាកដ ដល់ទណ្ឌិត កាលពីព្រឹកថ្ងៃទី២១ ធ្នូ ២០១៧ នៅសាលារាជធានីភ្នំពេញ ដោយមានវត្តមានលោកឧត្តមអគ្គានុរក្សថ្នាក់លេខ១ ម៉ៅ សំបុណ្យ អគ្គនាយករង នៃអគ្គនាយកដ្ឋានពន្ធនាគារ ក្រសួងមហាផ្ទៃ ។
លោកមានចាន់យ៉ាដា អភិបាលរងរាជធានីភ្នំពេញ បានមានប្រសាសន៍លើកឡើងថា អ្នកជាប់ទោសតែងតែឡើងថ្នាក់បទល្មើសពេលចេញពីគុកវិញ ពោលគឺជាប់ទោសពីបទលួច តែពេលចេញពីគុកវិញ មកធ្វើសកម្មភាពប្លន់ ដែលជាចំណុចមួយដែលមន្ត្រីអនុរក្សត្រូវយកចិត្តទុកដាក់និងកែប្រែអោយបានល្អ។
លោកមានចាន់យ៉ាដា បានលើកឡើងទៀតថា កិច្ចប្រជុំនេះធ្វើឡើងដើម្បីបញ្ជ្រាបការយល់ដឹងដល់មន្ទីរពាក់ព័ន្ធរដ្ឋបាលរាជធានីភ្នំពេញ លើការបណ្តុះបណ្តាលវិជ្ជាជីវៈនិងមុខរបរពិតប្រាកដដល់ជនជាប់ឃុំនៅពេលពួកគេមានសេរីភាពនៅក្នុងសង្គម។
ការបង្រៀនដល់ទណ្ឌិតឲ្យយល់ដឹងពីពលកម្មនិងជៀសវាងការប្រព្រឹត្តបទល្មើសទៅថ្ងៃក្រោយ ពោលគឺក្រោយពីពួកគេធ្វើសមារណកម្មវិលចូលទៅក្នុងសហគមន៍មូលដ្ឋានវិញ។ ការស្នើសុំឲ្យរដ្ឋបាលរាជធានីនិងមន្ទីរជំនាញពាក់ព័ន្ធចូលរួមគាំទ្រដល់ការបណ្តុះបណ្តាលមុខវិជ្ជាជីវៈទណ្ឌិតស្ថិតនៅជាប់ឃុំ។
លោកមាន ចាន់យ៉ាដា អភិបាលរងរាជធានីបានចាត់ទុកការបើកវគ្គនេះគឺការផ្តល់តំលៃដល់អ្នកជាប់ទោសក្រោយពីបានអប់រំកែប្រែខ្លួននិងពួកគេបានធ្វើសមារណកម្មវិលចូលទៅក្នុងសហគមន៍ព្រមទាំងមានមូលដ្ឋានទៅប្រកបមុខរបរសុច្ចរិតនៅក្នុងសង្គមវិញនោះ។
លោកម៉ៅ សំបុណ្យ បានមានប្រសាសន៍ថា អ្នកទោសមួយចំនួនបានកែប្រែលខ្លួនបានយ៉ាងល្អ ដូច្នេះទេចង់ឲ្យក្រុមហ៊ុនដែលបានដេញថ្លៃពីស្ថាប័នរដ្ឋ អាចបញ្ជូនការរងារមួយ ទៅដល់ទណ្ឌិត ដែលបានបណ្តុះបណ្ដាលក្នុងពន្ធធនាគារ មានការងារធ្វើ និងទោះបីមានតម្លៃប្រាក់ខែទាបជាងស្តង់ដារដូចអ្វីដែលក្រុមហ៊ុនធ្វើក៏ដោយ ដើម្បីឲ្យពួកគេទទួលបានកម្រៃខ្លះពីការងារនេះ៕ ដោយ ៖ កូឡាប