ខេត្តព្រៃវែង ៖ សមត្ថកិច្ច មួយចំនួនដែលបានដេញស្ទាក់បាញ់សម្លាប់បុរសម្នាក់ចោទថាចោរលួចរថយន្ត និងរបួសម្នាក់ នៅស្រុកបាភ្នំ គិតមកដល់យប់ថ្ងៃទី២៥ខែមីនាឆ្នាំ២០១៩ ការស្រាវជ្រាវឈានដល់ឃាត់ខ្លួនជនពាក់ព័ន្ធរហូតដល់៨នាក់ ក្នុងនោះ រួមមានម្ចាស់ឡាន ដែលផ្ដល់ព័ត៌មានកុហក់ថា ចោរលួច អ្នកប្ដឹង អ្នកទទួលបណ្ដឹង អ្នករួមដំណើរ អ្នកដឹកនាំកំលាំង បូករួមទាំងជនដៃដល់ម្នាក់ ខណៈខ្មាន់កាំភ្លើងម្នាក់ទៀតកំពុងរត់គេចខ្លួន ជាកូនលោកឧកញ៉ា ជឹម សុខ ។
បើយោងតាមប្រភពបង្ហើកប្រាប់ថាជន សង្ស័យត្រូវឃាត់ខ្លួនទាំង៨នាក់ ក្រុមទី១គឺភាគីម្ចាស់ឡានអ្នកលក់ ក្រុមទី២ ជាដៃជើងបក្ខពួកមេការលោកឧកញ៉ាជឹម សុខ និងក្រុមទី៣សុទ្ធតែជាសមត្ថកិច្ច នគរបាលខេត្តព្រៃវែង ហើយមកដល់ព្រឹកថ្ងៃទី២៦ខែមីនាឆ្នាំ២០១៩នេះ ជនដែលត្រូវឃាត់ខ្លួនរួមមាន៖
ទី១ឈ្មោះ សេង ឈិន ជាម្ចាស់បណ្ដឹងផ្ដល់ព័ត៌មានមកឈ្មោះ ផាន់ សុឌី ឲ្យជួយចាប់ចោរលួចឡាន។
២ឈ្មោះ ឈុន ឡាយ អ្នករួមដំណើរ។
៣ឈ្មោះ ផាន់ សុឌី ភេទប្រុស នៅភូមិតាម៉ៅ ឃុំកំពង់សឹង ស្រុកព្រះស្ដេច ខេត្តព្រៃវែង បច្ចុប្បន្តជាជាងជួសជុលឡាននៅភ្នំពេញ។ដែលជួលរថយន្តនោះ ឲ្យទៅជនជាតិចិន សម្រាប់ជិៈ និងជាម្ចាស់ដើម។
៤ឈ្មោះ វ៉ែន ប៊ុនសារៈ អ្នករួមដំណើរ។
៥ លោកអនុសេនីយ៍ឯក ជា ឡាឌីន មេប៉ុស្តិ៍កំពង់សឹង ជាអ្នកដឹកនាំកម្លាំងនិងផ្ដល់មធ្យោបាយសម្រាប់ប្រព្រឹត្តបទល្មើស។
៦ឈ្មោះ អ៊ូ ប៊ុតទីឃីយ៉ាត់ ជាមេការបេនទួលខ្លូត របស់លោកឧកញ៉ាជឹមសុខ។
៧អនុសេនីយ៍ទោ ជឹម វិន មន្ត្រីប៉ុស្តិ៍កំពង់សឹង ស្រុកព្រះស្ដេច ត្រូវជាក្មួយលោកឧកញ៉ា ជឹម សុខ និងជាជនដៃដល់។
៨ ភាព ផានី ជាពលរដ្ឋដែលផ្ដល់ព័ត៌មានមកប៉ុស្តិ៍ថា ចោរលួចឡាន។
ដោយឡែកក្មាន់កាំភ្លើងឈ្មោះ ជឹម រតន: ប្រធានផ្នែកអន្តោប្រវេសន៍ស្រុកព្រះស្ដេច ត្រូវជាកូនប្រុសលោកឧកញ៉ា ជឹម សុខ កំពុងរត់គេចខ្លួន។ បើតាមប្រភព បានលួចបង្ហើបថា ជនពាក់ព័ន្ធ អាចនឹងចាប់ខ្លួនជាបន្តបន្ទាប់ទៀត គឺមិនទាន់អស់ទេ ។ខណៈសមត្ថកិច្ចបានរៀបចំឯកសារ ទៅព្រះរាជអាជ្ញា ដើម្បីសុំគោលការឃាត់បន្ត។
នាយប៉ុស្តិ៍នគរបាលឃុំកំពង់សឹង នៃស្រុកព្រះស្តេច ខេត្តព្រៃវែង បានរងការឃាត់ខ្លួនសាកសួរ ក្រោយហេតុការណ៍ពាក់ព័ន្ធអំពើបាញ់សម្លាប់ជាច្រើនគ្រាប់លើមនុស្សម្នាក់ក្នុងរថយន្ត ក្រោមហេតុផលបង្ក្រាបអំពើលួចរថយន្ត។ ការឃាត់ខ្លួនមេប៉ុស្តិ៍នគរបាលឈ្មោះ ជា ឡាឌីន នៅថ្ងៃទី២៥មីនានេះ បាននាំអោយការឃាត់ខ្លួនចំនួនមន្ត្រីនគរបាលដែលសង្ស័យពាក់ព័ន្ធនឹងអំពើបាញ់សម្លាប់កាលពីយប់ថ្ងៃទី២៣មីនា នៅភូមិគោកសណ្តែក ឃុំរក្សជ័យ ស្រុកបាភ្នំ ខេត្តព្រៃវែង ពាក់ព័ន្ធនឹងអំពើចោទប្រកាន់លួចរថយន្ត បានកើនដល់ចំនួន២នាក់ហើយ។
អគ្គអគ្គស្នងការនគរបាលជាតិលោក នាយឧត្តមសេនីយ៍ សន្តិបណ្ឌិត នេត សាវឿន បានថ្លែងនៅថ្ងៃទី២៥មីនានេះប្រាប់អ្នកកាសែតក្នុងស្រុកថា មន្ត្រីប៉ុស្តិ៍នគរបាលឈ្មោះ ជា ឡាឌីន កំពុងរងការសាកសួរ ចំណែកមន្ត្រី នគរបាលសង្ស័យម្នាក់ដទៃទៀត កំពុងស្វែងរកដើម្បីឃាត់ខ្លួនផងដែរ។ នាយប៉ុស្តិ៍នគរបាលឈ្មោះ ជា ឡាឌីន ត្រូវគេពណ៌នាថា គឺជាអ្នកបញ្ជាអោយសមត្ថកិច្ចក្រោមបង្គាប់ចុះធ្វើកិច្ចការដែលនាំអោយ មានការបាញ់សម្លាប់ មនុស្ស។
សម្តេចតេជោបានបង្ហើបអោយដឹងថា មានករណីបាញ់សម្លាប់មនុស្សមួយទៀត ដោយមនុស្ស២នាក់ ដែលម្នាក់ត្រូវបានចាប់ខ្លួនហើយ គឺនៅសល់ម្នាក់ទៀតកំពុងគេចខ្លួន។ ប្រតិបត្តិការប្រដាប់អាវុធ (ការពារខ្លួន) កាត់ក្តីដោយយកអាវុធបាញ់សម្លាប់មនុស្ស គឺមិនមែនជាអំពើល្អទេ។ នៅពេលដែលចាប់ខ្លួនជនសង្ស័យបានហើយ គ្នាបានលើកដៃសំពះអង្វរហើយ ហើយក៏គ្មានអាវុធនឹងខ្លួនទៀត គឺត្រូវបានជន២នាក់បាញ់សម្លាប់ជាច្រើនគ្រាប់ ដែលក្នុងនោះក៏មានកូនមេប៉ូលីសចូលរួមដែរ។ សម្តេចតេជោនាយករដ្ឋមន្ត្រី បានបញ្ជាក់ច្បាស់ៗថា “គឺត្រូវតែតាមរកកូនអោយឃើញ បើមិនអញ្ចឹងទេ គឺទៅទាំងមេប៉ូលីស”។
សម្តេចតេជោនាយករដ្ឋមន្ត្រីបានមានប្រសាសន៍រំឮកច្បាស់ៗថា “មិនថាអ្នកឯងមានអំណាចប៉ុណ្ណា ធាតុជាមនុស្សត្រូវមានគុណធម៍ និងសីលធម៍ក្នុងខ្លួន។
គួររំលឹកថា អគ្គអគ្គស្នងការនគរបាលជាតិលោក នាយឧត្តមសេនីយ៍ សន្តិបណ្ឌិត នេត សាវឿន បានមានប្រសាសន៍មុននេះ ដាក់បញ្ជាអោយតាមចាប់ខ្លួនមន្ត្រីនគរបាលស្រុកព្រះស្តេច ដែលប្រព្រឹត្តអំពើបាញ់សម្លាប់នោះ។ ចំណែកសម្តេចក្រឡាហោម ស ខេង ឧបនាយករដ្ឋមន្ត្រី និងជារដ្ឋមន្ត្រីក្រសួងមហាផ្ទៃ បានមានប្រសាសន៍ដែរថា នឹងស្វែងរកយុត្តិធម៌ជួនក្រុមគ្រួសារដែលរងគ្រោះ និងសម្តេចតេជោហ៊ុនសែន នៅថ្ងៃដដែលនេះផងទៀតបានមានប្រសាសន៍ ជម្រុញអោយមានការស៊ើបអង្កេតនិងមានការចាត់វិធានការផ្លូវច្បាប់ ចំពោះករណីបាញ់សម្លាប់នៅក្នុងឃុំរក្សជ័យ ស្រុកបាភ្នំ ខេត្តព្រៃវែងនោះ។
សូមបញ្ជាក់ថា ករណីឃាតកម្មបាញ់សម្លាប់ ជនរងគ្រោះដោយចោទថាចោរលួចឡាន។ អ្នកស្លាប់ឈ្មោះ ម៉ន រ៉ាវុធ ភេទប្រុសអាយុ៣២ឆ្នាំ មុខរបរជាងម៉ៅការសំណង់ មានស្រុកកំណើតនៅ ឃុំឈើកាច់ ស្រុកបាភ្នំ ខេត្តព្រៃវែង បច្ចុប្បន្នស្នាក់នៅខណ្ឌពោធិ៍សែនជ័យ រាជធានីភ្នំពេញ។
អ្នករួមដំណើរឈ្មោះ វ៉ាន ខេមរិន ភេទប្រុសអាយុ២៧ឆ្នាំ នៅភូមិឈើកាច់ ឃុំឈើកាច់ ស្រុកបាភ្នំ ខេត្តព្រៃវែង រងរបួសស្រាល។
ហេតុការណ៍នេះបានកើតឡើង កាលពីវេលាម៉ោង២៣យប់ ថ្ងៃទី២៣មីនាឆ្នាំ២០១៩ នៅចំណុចភូមិគោកសណ្តែក ឃុំរក្សជយ័ ស្រុកបាភ្នំ ខេត្តព្រៃវែង។ដោយសមត្ថកិច្ច ស្ទាក់បាញ់សម្លាប់ជនរងគ្រោះ ព្រោះច្រឡំថា ជាចោរលួចរថយន្ត ។ ទាំងដែលជនរងគ្រោះ គ្នាគ្មានអាវុធក្នុងដៃ ថែម ទាំងបានលើកដៃសំពះកុំបាញ់ទុក្ខជីវិតខ្ញុំផង។ ប៉ុន្តែជនដៃដល់នៅតែបាញ់ស្រោចមិនឈប់ រហូតស្លាប់ម្នាក់ក្នុងថ្លុកឈាមនិងរបួសម្នាក់។ ម្ដាយជនរងគ្រោះដែលត្រូវបានគេបាញ់ស្លាប់ បានអះអាងថា កូនគាត់បានទិញរថយន្ត ម៉ាកព្រូសពណ៌ប្រផេះ ពាក់ស្លាកលេខភ្នំពេញ2AF2679 ដោយបង់រំលោះ នៅខ្វះលុយ ៣០០០ដុល្លារទៀត។
ហើយម្ចាស់ដើមឈ្មោះ ផាន់ សុឌី ភេទប្រុស នៅភូមិតាម៉ៅ ឃុំកំពង់សឹង ស្រុកព្រះស្ដេច ខេត្តព្រៃវែង បច្ចុប្បន្តជាជាងជួសជុលឡាននៅភ្នំពេញបានជួលរថយន្តនោះ ឲ្យទៅជនជាតិចិន។
ក្រោយមកជនរងគ្រោះឈ្មោះ ម៉ន រ៉ាវុធ ដឹងថា រថយន្តខ្លួន ត្រូវម្ចាស់ដើមយកទៅជួលឲ្យចិន ទើបខ្លួនស្កាត់ទៅយករថយន្តនោះ ពីជនជាតិចិនទាំងទទឹងទិស។ រួចបើកពីភ្នំពេញ រត់គេចមក ផ្ទះជាមួយឈ្មោះ វ៉ាន ខេមរិន ។ ទន្ទឹមនឹងនោះ ឈ្មោះ ផាន់ សុឌី គិតថាទិញរថយន្តឲ្យលុយមិនទាន់គ្រប់ផង ហើយទៅយករថយន្ត ពីអតិថិជនអ្នកជួលបែបនោះទៀត និងមានបំណង គេច ទើបខ្លួនស្រាវជ្រាវតាម GPS បើកឡានតាមពីក្រោយ និងទូរស័ព្ទប្ដឹងសមត្ថកិច្ច ដោយបំភ្លៃថា ចោរលួចរថយន្តខ្ញុំហើយ។
ជាមួយគ្នានោះ សមត្ថកិច្ចប៉េអឹមបានបើករថយន្តដេញតាម ពីក្រោយតាំងពីចំណុចស្ពានអ្នកលឿង ផ្លូវជាតិលេខ១ ។ រថយន្តក៏បាន បត់កាច់តាមផ្សារអ្នកលឿង ហើយបត់ស្តាំមកតាមផ្លូវជាតិលេខ១១ ឆ្ពោះទៅទីរួមខេត្តព្រៃវែង។ លុះមកដល់កន្លែងផ្លូវបត់កែងទៅផ្សារ ស្នេហ៍ ស្រុកបាភ្នំ រថយន្តនោះបានបើកបត់សំដៅទៅស្រុកបាភ្នំតែម្តង។
ខណៈសមត្ថកិច្ច ប៉េអឹមតាមពីក្រោយ រួចបោះដៃឲ្យ នគរបាលប៉ុស្តិ៍កំពង់សឹង ស្រុកព្រះស្ដេច ដែលមានគ្នាបីបួននាក់ បើករថយន្តចេញមកស្ទាក់ នៅចំណុចភូមិគោកសណ្តែក ឃុំរក្សជ័យ ស្រុកបាភ្នំ ដែលជាកន្លែងកើតហេតុ។ ពេលជនរងគ្រោះ បានបើករថយន្តមិនព្រមឈប់ ទើបប៉ូលិស ឈ្មោះ ជឹម រតនៈ និងឈ្មោះ ជឹម វិន ដកកាំភ្លើងសម្រុកបាញ់ស្រោច មកលើជនរងគ្រោះ បើទោះបីជាជនរងគ្រោះ គ្នាលើកដៃសំពះ សុំជីវិត ក៏នៅតែបាញ់មិនឈប់ ខណៈឈ្មោះ ជា ឡាឌីន មេប៉ុស្តិ៍ក៏មិនឃាត់ទៀត បណ្ដាលឲ្យឈ្មោះ ម៉ន រ៉ាវុធ អ្នកទិញរថយន្ត និងជាអ្នកបើកបរ ស្លាប់ក្នុងរថយន្ត រួចហើយទើបបញ្ជូនសពទៅព្យាបាល។ ដោយឡែកអ្នករួមដំណើរ ឈ្មោះ វ៉ាន ខេមរិន បានរងរបួសស្រាល ហើយត្រូវបាននគរបាលឃាត់ខ្លួនមកសួរនាំ។
ក្រោយបាញ់សម្លាប់ជនរងគ្រោះរួចមក ដើម្បីដោះខ្លួន និងការពារកូនចៅបក្ខពួក លោក ព្រុំ សន្ធរ ស្នងការខេត្តព្រៃវែង បានធ្វើរបាយការណ៍បំភ្លៃបិទបាំងថា ជារឿងជ្រុលដៃបាញ់ចោរលួចឡាន ព្រោះពួកគេព្យាយាម បើកបុកប៉ូលិស និងផ្អែកលើពាក្យបណ្ដឹងបូករួមទាំងអ្នកប្ដឹងតាមពីក្រោយ ប៉ុន្តែសាច់រឿងពិតបានដឹងដល់ សម្ដេចក្រឡាហោម បញ្ជាឲ្យតាមចាប់ជនដៃដល់ ដើម្បីផ្ដល់យុត្តិធម៌ជូនជនរងគ្រោះ កុំឲ្យស្លាប់ដោយឥតន័យខូចឈ្មោះថា ជាចោរលួចឡាន៕ ដោយ ៖ បញ្ញាស័ក្តិ