Andrei Zhestkov ភេទប្រុស សញ្ជាតិរុស្ស៊ី ត្រូវបានចាប់ខ្លួននៅព្រលានយន្តហោះ Denpasar Bali ខណៈពេលឆ្លងកាត់ទ្វាសន្តិសុខដើម្បីឡើងយន្តហោះវិលទៅស្រុកវិញ ។
សត្វទោចដេកលង់លក់ ពេលប៉ូលិសរកឃើញ
តាម APP ប៉ូលិសឥណ្ឌូណេស៊ី មានការសង្ស័យបុរសរូបនេះ ហើយក៏បើកវ៉ាលីសឆែកឆេរ ស្រាប់តែឃើញសត្វទោច១ក្បាល អាយុ ២ឆ្នាំ កំពុងលង់ដំណេកក្នុងកាបូបធ្វើពីផ្តៅ ។
អ្នកនាំពាក្យស្ថាប័នអភិរក្សសត្វនិយាយថា ទោចនេះបានត្រូវបញ្ច្រកថ្នាំអាលែកហ្ស៊ីដើម្បីឲ្យវាដេក ហើយថ្នាំនោះត្រូវបានរកឃើញក្នុងវ៉ាលីសផងដែរ ។ ទន្ទឹមនោះក្នុងវ៉ាលីស ប៉ូលិសនៅបានរកឃើញតុកកែ ២ក្បាល និងបង្កួយ ៥ក្បាល ផងដែរ ។
ជនល្មើសសារភាពថា សត្វទាំងនេះត្រូវបានមិត្តភក្តិម្នាក់កាដូរឲ្យ ហើយមិត្តរូបនោះបានទិញសត្វទោចតម្លៃ ៣.០០០ដុល្លារ នៅតំបន់ផ្សារមួយនាទីក្រុង Java ។
ឥឡូវបុរសជនជាតិរុស្ស៊ីអាចនឹងត្រូវកាត់ទោសឲ្យជាប់គុក ៥ ឆ្នាំ ព្រមទាំងពិន័យប្រាក់ ៧.០០០ដុល្លារ តាមច្បាប់ឥណ្ឌូណេស៊ី ។
សត្វទោចលើពិភពលោកកំពុងរងការគំរាមកំហែងដ៏ធ្ងន់ធ្ងរ ហើយបច្ចុប្បន្ននៅសល់ប្រមាណ ១០០.០០០ក្បាលប៉ុណ្ណោះ ៕ ចន្ទ្រា