ខេត្តព្រះសីហនុ ៖ ប្រជាពលរដ្ឋរស់នៅក្រុងព្រះសីហនុ បានអះអាងថា បន្ទាប់ពីមានការចុះផ្សាយតាមបណ្តាញសង្គម និងគេហទំព័រសារព័ត៌មានមួយចំនួនជាបន្តបន្ទាប់ ដោយបានតិទៀនរិះគន់ ចំពោះសកម្មភាពបង្ហូរទឹកកាកសំណល់ស៊ីម៉ង់ត៍ របស់ក្រុមហ៊ុនក្រឡុកស៊ីម៉ង់ត៍មួយកន្លែង មានទីតាំងនៅបុរី ប៊ីអេស BS ដែលនាំឲ្យខូចខាតផ្លូវសាធារណៈរបស់រដ្ឋ និងប៉ះពាល់ដល់ការធ្វើដំណើរ របស់ប្រជាពលរដ្ឋរួចមក។ ក្រុមប្រជាពលរដ្ឋ បានឲ្យដឹងថា នៅព្រឹកថ្ងៃទី២៧ ខែមីនានេះ ឃើញមានដាក់ពង្រាយគ្រឿងចក្រមួយចំនួន មកឈូសឆាយពង្រាបផ្លូវសាធារណៈ របស់រដ្ឋ នៅពីមុខក្រុមហ៊ុនក្រឡុកស៊ីម៉ង់ត៍ ស្ថិតក្នុងភូមិ៥ សង្កាត់លេខ៤ ក្រុង-ខេត្តព្រះសីហនុ ត្រូវបានជួសជុលស្ថាបនាជាថ្មីឡើងវិញ។
គួររំលឹកថា កន្លងមកនេះ ប្រជាពលរដ្ឋធ្វើដំណើរឆ្លងកាត់ផ្លូវមុខក្រុមហ៊ុនក្រឡុកស៊ីម៉ង់ត៍នៅបុរី BS និងពលរដ្ឋភាគច្រើន ដែលមានលំនៅឋាននៅជាប់ក្រុមហ៊ុនខាងលើ ពួកគាត់បានរអ៊ូរទាំចំពោះទង្វើ របស់ក្រុមហ៊ុនក្រឡុកស៊ីម៉ង់ត៍នេះ ថាបានបង្កសំឡេងរំខានដល់ការរស់ របស់ពួកគាត់។ ក្នុងនោះក្រុមហ៊ុនបានបង្ហៀរទឹកកាកសំណល់ស៊ីម៉ង់ត៍ ចេញពីក្រុមហ៊ុនមកលើផ្លូវសាធារណៈ នាំឲ្យខូចផ្លូវពិបាកធ្វើដំណើរឆ្លងកាត់ និងមានពេលខ្លះបានបណ្តាលឲ្យមធ្យោបាយយានយន្តមួយចំនួនដួល និងក្រឡាប់ផងដែរ។
កង្វល់ខាងលើនេះ បានឈានដល់ប្រជាពលរដ្ឋរស់នៅទីប្រជុំជនក្នុងក្រុងព្រះសីហនុ និងអ្នកធ្វើដំណើរឆ្លងកាត់ផ្លូវមុខក្រុមហ៊ុនក្រឡុកស៊ីម៉ង់ត៍នៅបុរី BS បានសំណូមពរដល់ លោក អ៊ី សុខឡេង អភិបាលក្រុងព្រះសីហនុ និង លោក យន្ត មីន អភិបាលខេត្តព្រះសីហនុ ឲ្យជួយបញ្ជូនមន្ត្រីជំនាញ ចុះត្រួតពិនិត្យ និងឈានទៅទប់ស្កាត់សកម្មភាពមិនប្រក្រតី របស់ក្រុមហ៊ុនក្រឡុកសុីម៉ង់ត៍មួយកន្លែង ស្ថិតក្នុងភូមិ៥ សង្កាត់លេខ៤ ក្រុងព្រះសីហនុ ដែលបានបង្ហូរកាកសំណល់ផ្សេងៗ ជាពិសេសទឹកស៊ីម៉ងត៍ចេញពីក្រុមហ៊ុន មកលើផ្លូវសាធារណៈ បង្កការរំខាន ដល់ការរស់នៅ របស់ប្រជាពលរដ្ឋជិតខាង និងប៉ះពាល់ដល់អ្នកដំណើរ ព្រមទាំងបានប៉ះពាល់ដល់បរិស្ថានក្រុងទេសចរណ៍មួយនេះធ្ងន់ធ្ងរថែមទៀតផង។
ត្រង់ចំណុចនេះ ក្រុមប្រជាពលរដ្ឋ បានស្នើដល់អាជ្ញាធរ ស្ថាប័នពាក់ព័ន្ធ ជាពិសេសលោក អភិបាលក្រុងព្រះសីហនុ និងលោកអភិបាលខេត្តព្រះសីហនុ ស្នើឲ្យជួយអន្តរាគមន៍ ដោះស្រាយបញ្ហាមិនប្រក្រតី ដែលត្រូវក្រុមហ៊ុនក្រឡុកស៊ីម៉ង់ត៍នេះបង្កើតឡើង ត្រូវដោះស្រាយជូនប្រជាពលរដ្ឋ ឲ្យបានឆាប់ និងឲ្យមានប្រសិទ្ធភាព។
ជាបន្តបន្ទាប់មកនេះ ប្រជាពលរដ្ឋ និងអ្នកធ្វើដំណើរឆ្លងកាត់តាមផ្លូវសាធារណៈមុខក្រុមហ៊ុនក្រឡុកស៊ីម៉ង់ត៍ នៅបុរីប៊ីអេស BS បានចោទក្រុមហ៊ុននេះ ថាបានធ្វើសកម្មភាពរំខានដល់ការរស់នៅ របស់ប្រជាពលរដ្ឋមាននលំនៅឋានក្បែរតំបន់នោះ ជាពិសេសអ្នកធ្វើដំណើរឆ្លងកាត់តាមផ្លូវនេះ គឺបង្កឲ្យមានផលវិបាកក្នុងការបើកបរ ព្រោះផ្លូវខូច និងមានទឹកស៊ីម៉ង់ត៍ដល់នៅលើផ្លូវនាំឲ្យខ្ទាតប្រឡាក់យានជំនិះ និងស្ថានភាពផ្លូវរអិលជាដើម។
ក្រុមប្រជាពលរដ្ឋ បានអះអាងថា សកម្មភាព របស់ក្រុមហ៊ុនក្រឡុកស៊ីម៉ង់ត៍ខាងលើនេះ គឺបានកើតមានជាយូរមកហើយ ប៉ុន្តែអាជ្ញាធរក្រុង-ខេត្តព្រះសីហនុ ហាក់មិនទាន់មានចំណាត់ការក្តៅ ចុះទប់ស្កាត់ ឬក៏ចុះណែនាំ ដល់ម្ចាស់ក្រុមហ៊ុនក្រឡុកស៊ីម៉ង់ត៍ខាងលើនេះ ឲ្យអនុវត្តការងារ របស់ខ្លួនឲ្យបានត្រឹមត្រូវ និងមានប្រសិទ្ធភាពនោះទេ។
យ៉ាងណាក៏ដោយចុះ នៅមិនទាន់មានប្រភពទាក់ទង ប្រធានក្រុមហ៊ុនក្រឡុកស៊ីម៉ង់ត៍ មានទីតាំងនៅបុរី BS ដែលប្រពលរដ្ឋរស់នៅក្រុងព្រះសីហនុ ចោទប្រកាន់ ដើម្បីស្នើការបំភ្លឺនៅឡើយទេ នារសៀលថ្ងៃពុធ ទី២៧ ខែមីនា ឆ្នាំ២០១៩នេះ។
ចំណែក មន្ត្រីរដ្ឋបាលក្រុង និងរដ្ឋបាលខេត្តព្រះសីហនុ ក៏មិនទាន់មានអត្ថាធិប្បាយ ឬមិនទាន់មានចេញសេចក្តីបំភ្លឺជាលាយល័ក្ខណ៍អក្សណាមួយ ដើម្បីជម្រាបជូនប្រជាពលរដ្ឋរស់នៅក្រុងព្រះសីហនុ ឬមហាជន ឲ្យបានដឹងជាសាធារណៈនៅឡើយដែរ គិតត្រឹមរសៀលថ្ងៃទី២៧ ខែមីនា ឆ្នាំ២០១៩នេះ។
យ៉ាងនេះក្តី គេសង្កេតឃើញថា កាលពីព្រឹកថ្ងៃទី២៧ ខែមីនា ឆ្នាំ២០១៩នេះ ឃើញមានគ្រឿងជាច្រើនគ្រឿង បានដាក់មកឈូសឆាយ ដើម្បីពង្រាបផ្លូវកៅស៊ូ ដែលរងការខូចខាតនៅពីមុខក្រុមហ៊ុនក្រឡុកស៊ីម៉ង់ត៍ មានទីតាំងនៅបុរី BS ស្ថិតក្នុងភូមិ៥ សង្កាត់លេខ៤ ក្រុងព្រះសីហនុនេះហើយ៕ ដោយ ៖ ដែន សីមា
