ខេត្តព្រះសីហនុ ៖ អភិបាលនៃគណៈអភិបាលខេត្តព្រះសីហនុ បានដឹកនាំមន្ត្រីក្រោមឱវាទ ធ្វើទស្សនកិច្ចសិក្សាផ្លូវរយៈពេលវែង ទៅកាន់ប្រទេសចិន ចាប់ពីថ្ងៃទី២៥ ដល់ថ្ងៃទី៣០ ខែមីនា ឆ្នាំ២០១៩។
មន្ត្រីរដ្ឋបាលសាលាខេត្តព្រះសីហនុ បានឲ្យដឹងថា ដំណើរទស្សនកិច្ចនេះ តបតាមការអញ្ជើញ របស់ប្រធានរដ្ឋបាល តំបន់ពិសេសម៉ាកាវ តាមរយៈស្ថានទូតចិន និងអភិបាលខេត្តហៃណាន ប្រទេសចិន។
មន្ត្រីដដែលបញ្ជាក់ថា ទស្សនកិច្ច របស់គណៈប្រតិភូខេត្តព្រះសីហនុដឹកនាំដោយ លោក យន្ត មីន ទៅកាន់ប្រទេសចិន ពេលនេះ គឺជាទស្សនកិច្ចសិក្សាលើកទី៥ ថ្នាក់អភិបាលក្រុង នៃប្រទេសជិតខាងចិន នៅតំបន់រដ្ឋបាលពិសេសម៉ាកាវ ដើម្បីស្វែងយល់ពីកិច្ចសហប្រតិបត្តិការ របស់រដ្ឋបាលម៉ាកាវ ជាមួយបណ្តាដៃគូអភិវឌ្ឍន៍នានា លើវិស័យសេដ្ឋកិច្ច វិស័យពាណិជ្ជកម្ម វិស័យទេសចរណ៍ និងវិស័យវប្បធម៌ជាដើម..។
ព្រមជាមួយគ្នានេះ លោក យន្ត មីន អភិបាលខេត្តព្រះសីហនុ ក៏នឹងដឹកនាំប្រតិភូ នៃរដ្ឋបាលខេត្តព្រះសីហនុ ទៅចូលរួមកិច្ចប្រជុំ ក្នុងវេទិកាប៉អាវ និងវេទិកាសន្ទនា របស់អភិបាលខេត្ត-ក្រុងប្រទេសចិន និង អាស៊ាន ស្តីពីការលើកកម្ពស់ ការតភ្ជាប់អាស៊ាន – ចិន ដើម្បីសេដ្ឋកិច្ច និងកិច្ចសហប្រតិបត្តិការវប្បធម៌ ចាប់ពីថ្ងៃទី២៨ ដល់ថ្ងៃទី៣០ ខែមីនា ឆ្នាំ២០១៩ផងដែរ។
ថ្លែងក្នុងវេទិកានាតំបន់រដ្ឋបាលពិសេសម៉ាកាវ ប្រទេសចិន កាលពីថ្ងៃទី២៦ ខែមីនា ឆ្នាំ២០១៩ លោក យន្ត មីន បានថ្លែងកោតសរសេីរចំពោះសមិទ្ធិផលនានា របស់ប្រទេសចិន ក្រោមការដឹកនាំប្រដោយគតិបណ្ឌិត និងចក្ខុវិស័យវែងឆ្ងាយ របស់ លោកប្រធានាធិបតី ស៊ី ជីនពីង។
នាឱកាសនោះដែរ លោក យន្ត មីន បានឆ្លៀតអំពាវនាវដល់អ្នកវិនិយោគទុន នៃទីក្រុងម៉ាកាវ និងប្រទេសចិនទាំងមូល ព្រមទាំងប្រទេសនានា ក្នុងតំបន់អាស៊ាន ឲ្យចូលមកបណ្តាក់ទុន និងចូលមកទស្សនាខេត្តព្រះសីហនុ ឲ្យបានច្រើនកុះករ នាបណ្តាឆ្នាំខាងមុខៗទៀត។
ព្រមជាមួយគ្នានេះ លោក យន្ត មីន អភិបាល នៃគណៈអភិបាលខេត្តព្រះសីហនុ ក៏បានលើកឡើងអំពីសក្តានុពល លើវិស័យទេសចរណ៍ វិស័យសេដ្ឋកិច្ច និងវិស័យឧស្សាហកម្មជាដើម សម្រាប់បើកផ្លូវដល់អ្នកវិនិយោគទុននានា មកពីបណ្តាប្រទេសក្នុងតំបន់អាស៊ាន ជាពិសេសអ្នកវិនិយោគទុនមកពីប្រទេសចិន ឲ្យងាកទៅចាប់អារម្មណ៍ និងចុះទៅសិក្សាលើគម្រោងវិនិយោគផ្សេងៗនៅខេត្តព្រះសីហនុ ឲ្យបានច្រើន ទៀត ដោយអាជ្ញាធររដ្ឋបាលខេត្តព្រះសីហនុ នឹងរង់ចាំស្វាគមន៍ ព្រមទាំងសម្របសម្រួល ដល់ការងារវិនិយោគគ្រប់ក្រុមហ៊ុនទាំងឡាយ ដែលចូលទៅបោះទុនវិនិយោគស្របច្បាប់នៅកម្ពុជា ជាពិសេសនៅមូលដ្ឋានខេត្តព្រះសីហនុ នាថ្ងៃអនាគត ដោយការទទួលខុសត្រូវខ្ពស់៕ ដោយ ៖ ដែន សីមា
