ភ្នំពេញ ៖ ជនសង្ស័យប្រុសស្រីចំនួន១៧នាក់ ដែលនាំគ្នាមកសេពគ្រឿងញៀន ក្នុងសណ្ឋាគារឈូកទិព្វ១ ត្រូវបានប៉ូលិស មន្ទីរប្រឆាំងគ្រឿងញៀនសហការជាមួយកម្លាំងនគរបាលខណ្ឌទួលគោក និងនគរបាលប៉ុស្តិ៍រដ្ឋបាលផ្សារដើមគរ ក្របួចបាន១៧នាក់ និងដកហូតថ្នាំញៀន បានមួយចំនួន។
ប្រតិបត្តិការនេះបានធ្វើឡើងកាលពីវេលាម៉ោង១រសៀលថ្ងៃទី២០ ខែធ្នូ ឆ្នាំ២០១៧ ក្នុងសណ្ឋាគារឈូកទិព្វ១ ចំនួន៤បន្ទប់ គឺបន្ទប់លេខ ២០៤ , ២០៦ , ២០៩ និង២១០ ស្ថិតក្នុងដីឡូត៍លេខ12-14 ផ្លូវ336 ក្រុមទី26 ភូមិ10 សង្កាត់ផ្សារដើមគរ ខណ្ឌទួលគោក រាជធានីភ្នំពេញ។
មន្ត្រីប៉ូលីសបានឲ្យដឹងថា កម្លាំងនគរបាលមន្ទីរប្រឆាំងគ្រឿងញៀន សហការជាមួយកម្លាំងនគរបាលខណ្ឌទួលគោក និងនគរបាលប៉ុស្តិ៍រដ្ឋបាលផ្សារដើមគរ ដឹកនាំដោយលោកវសេនីយ៍ទោ ទិត ចំរើន នាយការិយាល័យ(ក៣)នៃមន្ទីរប្រឆាំងគ្រឿងញៀន ដោយមានការសម្របសម្រួលពីលោក គង់ សំសារ៉េត ព្រះរាជអាជ្ញារង អយ្យការអមសាលាដំបូងរាជធានីភ្នំពេញ បានបើកប្រតិបត្តិការ ប្រមូលយុវជនសេពគ្រឿងញៀនចំនួន១៧នាក់ ស្រី៤នាក់ និងឆែកឆេររកឃើញម្សៅក្រាមសថ្លា ចំនួន៧កញ្ចប់តូច។ បច្ចុប្បន្នជនសង្ស័យ រួមទាំងវត្ថុតាង បានបញ្ជូនទៅមន្ទីរប្រឆាំងគ្រឿងញៀន ដើម្បីចាត់ការតាមផ្លូវច្បាប់៕ ដោយ ៖ បញ្ញាស័ក្តិ