ព្រះសីហនុ : កាលពីថ្ងៃទី៣០ ខែមករា ឆ្នាំ២០១៩ លោក អង្គ វង្សវឌ្ឍនា រដ្ឋមន្ត្រីក្រសួងយុត្តិធម៌បានចេញសេក្តីប្រកាសលេខ០៦២ អោយសាលាដំបូង និងអយ្យការអមសាលាដំបូងប្រគល់រាល់កិច្ចការទាំងឡាយដែលជាសមត្ថកិច្ចរបស់អាជ្ញាសាលាអោយអាជ្ញាសាលាវិញ គឺមានន័យថារាល់កិច្ចការរបស់អាជ្ញាសាលា ដែលព្រះរាជអាជ្ញាឬព្រះរាជអាជ្ញារងធ្វើបណ្តោះអាសន្ន គឺត្រូវប្រគល់អោយអាជ្ញាសាលាជាអ្នកធ្វើវិញទាំងអស់ ចាប់ពីថ្ងៃទី៣០ ខែមករា ឆ្នាំ២០១៩នេះទៅ លើកលែងតែនៅតាមបណ្តារខេត្តទាំងឡាយណាដែលគ្មានមន្ត្រីអាជ្ញាសាលាប្រចាំការនៅទីនោះ។
ដោយយោងតាមកំណត់ហេតុស្តីពីការចុះអនុវត្តដីកាសម្រេចបង្គាប់អោយប្រគល់អចលនវត្ថុលេខ ១៨៤ តរ/១៩ បានអោយដឹងថាសាលាដំបូងខេត្តព្រះសីហនុ នៅថ្ងៃទី២៥ ខែមីនា ឆ្នាំ២០១៩ បានអោយដឹងថាលោក កៀង សុន្ទរោ ដែលជាព្រះរាជអាជ្ញារង នៃអយ្យការអមសាលាដំបូងខេត្តព្រះសីហនុ និងក្រឡាបញ្ជីកញ្ញា លុយ សុវត្តី បានចុះអនុវត្តដីកាសម្រេចបង្គាប់អោយប្រគល់អចលនវត្ថុលេខ ១៨៤ តរ/១៩ ចុះថ្ងៃ១៤ ខែកុម្ភៈ ឆ្នាំ២០១៩ របស់សាលាដំបូងខេត្តព្រះសីហនុ ដោយមានលិខិតបញ្ជាក់ការចូលជាស្ថាពរនៃដីកាសម្រេចលេខ ២២ តរ/១៩ ចុះថ្ងៃទី២២ ខែមីនា ឆ្នាំ២០១៩ របស់សាលាដំបូងខេត្តព្រះសីហនុ ដែលមានទីតាំងស្ថិតនៅភូមិឫទ្ធី២ ឃុំកែវផុស ស្រុកស្ទឹងហាវ ខេត្តព្រះសីហនុ។ ប៉ុន្តែកិច្ចការចុះអនុវត្តដីកាសម្រេចបង្គាប់អោយប្រគល់អចលនវត្ថុលេខ ១៨៤ តរ/១៩ ចុះថ្ងៃ១៤ ខែកុម្ភៈ ឆ្នាំ២០១៩ របស់សាលាដំបូងខេត្តព្រះសីហនុនេះ គឺជាសម្ថកិច្ចផ្តាច់មុខរបស់អាជ្ញាសាលាខេត្តព្រះសីហនុតែប៉ុណ្ណោះ។
មេធាវីរបស់កូនបំណុលបានបញ្ជាក់អោយដឹងថា ក្រុមលោកកំពុងតែប្រមូលភស្តុតាង ដើម្បីធ្វើការសិក្សា ក៏ដូចជាភិភាក្សាជាមួយកូនបំណុលឈ្មោះ គង់ មាលាដែលរងភាពអយុត្តិធម៌ពីការចុះអនុវត្តខុសនីតិវិធីផ្លូវច្បាប់នេះ។ លោកបានបន្ថែមទៀតថាកូនបំណុលរបស់លោកអាចនឹងពិចារណាប្តឹងសុំមោឃភាព ឬប្តឹងសុំលប់នីតិវិធី ឬកំណត់ហេតុនៃការចុះអនុវត្តរបស់លោកព្រះរាជអាជ្ញារង កៀង សុន្ទរោ ដែលផ្ទុយនឹងច្បាប់ ក៏ដូចជាផ្ទុយនឹងប្រកាសលេខ០៦២នេះចោលតែម្តង។ លោកបានបញ្ជាក់បន្ថែមទៀតថាកិច្ចការចុះអនុវត្តនេះគឺជាសម្ថកិច្ចរបស់មន្ត្រីអាជ្ញាសាលាដែលប្រចាំការនៅខេត្តព្រះសីហនុ ប៉ុន្តែបែរជាលោកព្រះរាជអាជ្ញារងយកមកអនុវត្តទៅវិញ នេះគឺជាការរំលោភសម្ថកិច្ច។
លោកមេធាវីដដែលរូបនេះលោកថា លោកមានការភ្ញាក់ផ្អើល ដែលសាលាដំបូងខេត្តព្រះសីហនុ នៅតែមាន ព្រះរាជអាជ្ញារង ចុះអនុវត្តដោយរំលោភសម្ថកិច្ចរបស់អាជ្ញាសាលាបែបនេះ បើទោះបីជាក្រសួងយុត្តិធម៌បានចេញប្រកាសលេខ០៦២តាំងពីថ្ងៃទី៣០ ខែមករា ឆ្នាំ២០១៩រួចមកហើយក្តី។
ជាចុងក្រោយលោកមេធាវីបានបង្ហាញថាឆ្លងកាត់បទពិសោធន៍ជាក់ស្តែងលោកបានសង្កេតឃើញថាសាលាដំបូងរាជធានីភ្នំពេញ គេបានអនុវត្តបានត្រឹមត្រូវតាមផ្លូវច្បាប់ និងប្រកាសរបស់ក្រសួងយុត្តិធម៌ ចម្លែកតែសាលាដំបូងខេត្តព្រះសីហនុនេះប៉ុណ្ណោះ។
យោងតាមក្រមព្រហ្មទណ្ឌមាត្រា៥៨៧ បានចែងពីបទបន្តអនុវត្តមុខងារដោយខុសច្បាប់ និង ក្រមព្រហ្មទណ្ឌមាត្រា៦០៩ បានចែងពីបទជ្រៀតជ្រេកដោយខុសច្បាប់ទៅក្នុងការបំពេញមុខងារសាធារណៈ តើការចុះអនុវត្តរបស់លោកព្រះរាជអាជ្ញារង កៀង សុន្ទរោ ដែលបានរំលោភសម្ថកិច្ចរបស់អាជ្ញាសាលានេះ អាចជាបទល្មើសព្រហ្មទណ្ឌដែរឬទេ?
បច្ចុប្បន្ននេះមន្ត្រីអាជ្ញាសាលាកំពុងតែប្រចាំការនៅសាលាដំបូងរាជធានីភ្នំពេញ ខេត្តកណ្តាល សៀមរាប បាត់ដំបង បន្ទាយមានជ័យ ខេត្តព្រះសីហនុ និងខេត្តពោធិ៍សាត់។
គួរបញ្ជាក់ផងដែរថា អាជ្ញាសាលាជាស្ថាប័នអនុវត្តសាលក្រម ឬសាលដីការបស់តុលាការ និងសេចក្តីសម្រេចផ្សេងៗរបស់តុលាការដូចជាការប្រគល់ចលនវត្ថុនិងអចលនវត្តុ ការរឹបអូសចលនវត្ថុ ការលក់ចលនវត្ថុនិងអចលនវត្ថុ ការអនុវត្តការរក្សារការពារ ការស្រាវជ្រាវស្ថានភាពបច្ចុប្បន្នអចលនវត្ថុជាដើម ក្រៅពីនេះកិច្ចការផ្សេងៗទៀតរបស់អាជ្ញាសាលាគឺការអនុវត្តលិខិតយថាភូតដែលធ្វើឡើងដោយសារការី ៕ ដោយ ៖ កូឡាប
