ប្រធានាធិបតីអាមេរិច ដូណាល់ ត្រាំ នៅថ្ងៃពុធម្សិលមិញនេះ បាននិយាយថា រុស្សីគួរតែដកវត្តមាន ចេញពីប្រទេសវេណេហ្ស៊ុយអេឡា។ ការថ្លែងរបស់លោកត្រាំ កើតឡើងតែមួយថ្ងៃប៉ុណ្ណោះ ក្រោយពេលរុស្សីការពារវត្តមានរបស់ខ្លួននៅក្នុងប្រទេសនោះ។
“រុស្សី ត្រូវតែចេញ”។ នេះជាការថ្លែងរបស់លោក ត្រាំ ក្នុងសន្នសិទ ប្រាប់អ្នកស្រី Fabiana Rosales ដែលជាភរិយារបស់មេដឹកនាំបក្សប្រឆាំងវេណេហ្ស៊ុយអេឡា Juan Guaido។
លោកបន្ថែមទៀតថា រុស្សីបានយល់ពីជំហររបស់អាមេរិចយ៉ាងច្បាស់។
កាលពីថ្ងៃពុធកន្លងទៅដែរ អនុប្រធានាធិបតីអាមេរិច Mike Pence បានស្នើឲ្យរុស្សីបញ្ឍប់ការចរចារជាមួយ នឹងប្រធានាធិបតី Nicolas Maduru និងបានថ្លែងថា វត្តមានយោធារបស់រុស្សីនៅក្នុងប្រទេសវេណេហ្ស៊ុយអេឡាគឺជាការបង្ករឿង។
កាលពីថ្ងៃសៅរិ៍កន្លងទៅនេះ រុស្សីបានបញ្ជូនយន្តហោះចំនួន ២គ្រឿងទៅប្រទេសវេណេហ្ស៊ុយអេឡា ដោយមានដឹកទ័ពចំនួន ១០០នាក់ និងឧបករណ៍ និងសំភារៈផ្សេងៗចំនួន ៣៥តោន។ នោះបើយោងតាមសេចក្តីរាយការណ៍។
ជុំវិញវត្តមាននោះដែរ ក្រសួងការបរទេសរុស្សីបានថ្លែងថា វត្តមានរបស់អ្នកជំនាញរបស់រុស្សីនៅក្នុងប្រទេសវេណេហ្ស៊ុយអេឡាគឺស្របទៅតាមកិច្ចព្រមព្រៀងសហប្រតិបត្តិការបច្ចេកទេសយោធា រវាងប្រទេសទាំងពីរ ដែលមិនចាំបាច់មានការអនុម័តពីរដ្ឋសភាវេណេហ្ស៊ុយអេឡាឡើយ។
លោក ត្រាំ បានថ្លែងថា បច្ចុប្បន្ន រដ្ឋាភិបាលវេណេហ្ស៊ុយអេឡាកំពុងស្ថិតក្រោមសម្ពាធយ៉ាងខ្លាំង។
សូមបញ្ជាក់ថា សហរដ្ឋាអាមេរិចកំពុងស្វែងរកការដាក់ទណ្ឌកម្មសេដ្ឋកិច្ច និងការផ្តាច់ទំនាក់ទំនងការទូតជាមួយនឹងរដ្ឋាភិបាលវេណេហ្ស៊ុយអេឡា ដើម្បីគាំទ្រដល់មេដឹកនាំបក្សប្រឆាំង ដែលត្រូវបានអាមេរិច និងប្រទេសជាច្រើនទទួលស្គាល់ជាប្រធានាធិបតីបណ្តោះអាសន្នរបស់វេណេហ្ស៊ុយអេឡា។
រុស្សីបានថ្កោលទោសការគំរាមកំហែងរបស់អាមេរិចប្រឆាំងទៅនឹងរដ្ឋាភិបាលស្របច្បាប់របស់វេណេហ្ស៊ុយអេឡា ដោយហៅវិធានការរបស់អាមេរិចថា ជាការជ្រៀតជ្រែកចូលកិច្ចការផ្ទៃក្នុងរបស់វេណេហ្ស៊ុយអេឡា៕
អត្ថបទប្រែសម្រួលដោយ៖ សុភ័ក្រ
ប្រភព៖ CGTN