ខេត្តព្រះសីហនុ៖ សមត្ថកិច្ចនគរបាលខេត្តព្រះសីហនុ បានឲ្យដឹងថា នៅម៉ោងប្រមាណ ៤ជិតភ្លឺ ព្រឹកថ្ងៃព្រហស្បតិ៍ ទី២១ ខែធ្នូ ឆ្នាំ២០១៧ មានជនជាតិចិន ២នាក់ បានជិះរថយន្តកាមរី បាទ្បែនពណ៌ទឹកមាស ពាក់ស្លាកលេខ ព្រះសីហនុ-5132 ក្នុងទិសដៅពីចំណុចស្តុបមន្ទីរពេទ្យចំការចេក ឆ្ពោះទៅកាន់រង្វង់មូលតោពីរ ក្នុងល្បឿនលឿន ប៉ុន្តែចៃដន្យបើកមកដល់ មុខសណ្ឋាគារ និងកាស៊ីណូ ជីនប៉ី JIN BEI ក៏បានរេចង្កូតទៅបុករថយន្ត Rang rover ពាក់ស្លាកលេខ ភ្នំពេញ 2Q-2736 ដែលចតគ្មានសណ្តាប់ធ្នាប់លើចញ្ចើមផ្លូវថ្នល់ មុខសណ្ឋាគារ ជីនប៉ី រួចបន្តបុករះរ៉ឺម៉កកង់បី និងម៉ូតូ ដែលចតនៅលើចញ្ចើមផ្លូវមុខកាស៊ីណូកំពង់សោមស៊ីធីថែមទៀត។
សាក្សីនៅកន្លែងកើតហេតុ បានឲ្យដឹងថា បន្ទាប់ពីបុករះរួច ក៏ឃើញអ្នកបើករថយន្តកាមេរី បាឡែន បានចុះចេញពីរថយន្ត ក្នុងអាការៈស្រវឹង និងដើរធីងធោង ប៉ុន្តែសំណាងល្អ គ្រោះថ្នាក់ចរាចរណ៍នេះ មិនមានមនុស្សរងរបួសធ្ងន់ធ្ងរទេ។
ប្រជាពលរដ្ឋ ដែលជាសាក្សីឃើញហេតុការណ៍ផ្ទាល់ភ្នែក បញ្ជាក់ថា ភ្លាមៗក្រោយកើតហេតុគ្រោះថ្នាក់ចរាចរណ៍ អ្នកបើកបររថយន្តបង្ក ជនជាតិចិន ត្រូវបាននកម្លាំងគរបាល នាំខ្លួនទៅកាន់ការិយាល័យនគរបាលចរាចរណ៍ នៃស្នងការដ្ឋាននគរបាលខេត្តព្រះសីហនុ។
បញ្ហានេះដែរ លោក អ៊ី សុខា ស្នងការរងនគរបាលខេត្តព្រះសីហនុ ទទួលផែនសណ្តាប់ធ្នាប់ បានអោយអ្នកយកព័ត៌មាន CEN.COM.KH ប្រចាំខេត្តព្រះសីហនុ ដឹងថា គ្រោះថ្នាក់បង្កដោយអ្នកបើកបរជនជាតិចិន នៅមុខកាស៊ីណូ ជីនប៉ី (JIN BEl) គឺមិនធំដុំទេ ហើយពេលនេះគ្រប់ភាគីពាក់ព័ន្ធគ្រោះថ្នាក់នេះ បានដោះចូលខ្លួនដោះស្រាយ បញ្ចប់បញ្ហាជាស្ថាពររួចហើយ នៅថ្ងៃព្រហស្បតិ៍ ទី២១ ខែធ្នូ ឆ្នាំ២០១៧។
ទាក់ទិនគ្រោះថ្នាក់ចរាចរណ៍បង្កដោយជនបរទេស ពិសេសជនជាតិចិន អាចមានសិទ្ធិបើកបររថយន្តដោយខ្លួនឯងនេះដែរ កន្លងមក មន្ត្រីអង្គការកៅរដ្ឋាភិបាល មួយចំនួននាខេត្តព្រះសីហនុ ធ្លាប់បានស្នើដល់ សម្តេចក្រឡាហោម ស ខេង ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ អោយជួយអន្តរាគមន៍ទៅ លោក ជួន ណារិន្ទ ស្នងការដ្ឋាននគរបាលខេត្តព្រះសីហនុ អោយបង្កើនសក្មភាពទប់ស្កាត់ ត្រួតពិនិត្យ កុំអោយជនបរទេស អាចមានសិទ្ធិបើកបររថយន្តខ្លួនឯងច្រើនពេក ជាពិសេសជនជាតិចិន ព្រោះឥរិយាបទបើកបរ របស់ពួកគ មិនគោរពច្បាប់ចរាចរណ៍ផ្លូវគោកកម្ពុជានោះទេ ព្រោះជនបរទេសភាគច្រើន បើកបរក្នុងស្ថានភាពស្រវឹង មានល្បឿនលឿន និង មិនគោរពភ្លើងសញ្ញាចរាចរណ៍ជាដើម។ ជាងនេះទៀត ក៏តែងបង្កគ្រោះថ្នាក់ចរាចរណ៍ នាំអោយបាត់បង់អាយុជីវិត ប្រជាពលរដ្ឋខ្មែរ ដែលធ្វើដំណើរតាមផ្លូវ កើតឡើងស្ទើជារៀងរាល់យប់-ថ្ងៃ នាទីប្រជុំជនក្រុងព្រះសីហនុក្នុងរយៈពេលពីរបីឆ្នាំចុងក្រោយនេះ៕ ដែន សីមា