សាស្ត្រាចារ្យផ្នែកច្បាប់មួយរូប នៅសកលវិទ្យាល័យដ៏ល្បីមួយក្នុងទីក្រុងប៉េកាំង ត្រូវបានបញ្ឍប់ និងដាក់ឲ្យស្ថិតក្រោមការស៊ើបអង្កេត ដោយសារតែសរសេរអត្ថបទដ៏កម្រ រិះគន់ប្រធានាធិបតីចិន ស៊ី ជីនពីង។
លោកសាស្ត្រាចារ្យ Xu Zhangrun នៃសកលវិទ្យាល័យ Tsinghua ត្រូវបានគេប្រាប់ថា គាត់ត្រូវបានគេដកចេញមិនឲ្យបង្រៀនទៀតឡើយ រហូតទាល់តែការស៊ើបអង្កេតលើរូបគាត់បានបញ្ចប់។ នេះបើតាមការបញ្ជាក់របស់មិត្តភក្តិលោក ឈ្មោះ Guo Yuhua ប្រាប់ CNN កាលពីថ្ងៃពុធ។
អ្នកស្រី Guo Yuhua ដែលជាសាស្ត្រាចារ្យផ្នែកសង្គមវិទ្យានៅសកលវិទ្យាល័យជាមួយគ្នា បាននិយាយថា ការងាររបស់លោក Xu Zhangrun ដែលធ្វើជាគ្រូបង្រៀន អ្នកស្រាវជ្រាវ និងជាគ្រូបង្រៀនឯកជន ត្រូវបានគេផ្អាក។
អ្នកស្រីបញ្ជាក់ទៀតថា ពត៌មានលំអិតនៃការបញ្ឍប់លោក Xu Zhangrun មិនទាន់ច្បាស់នៅឡើយទេ ប៉ុន្តែអ្នកស្រីគិតថា វាអាចទាក់ទងទៅនឹងការសរសេរតែងសេចក្តី ដែលលោកបានបោះពុម្ភកាលពីខែ កក្កដា ឆ្នាំ ២០១៨។
អត្ថបទរបស់លោក Xu Zhangrun ដែលលោកបានបោះពុម្ភកាលពីឆ្នាំ ២០១៨ មានចំណងជើងថា “ការភ័យខ្លាចដែលនឹងជិតកើតឡើង សេចក្តីសង្ឃឹមភ្លាមៗ” (mminent Fears, Immediate Hopes) ដែលអត្ថបទនោះប្រឆាំងទៅនឹងទិសដៅរបស់ចិន ក្រោមការដឹកនាំរបស់លោក ស៊ី ជីនពីង និងបានស្នើឲ្យមានការកំណត់អាណិត្តប្រធានាធិបតីជាថ្មី។
ការស៊ើបអង្កេតលើសាស្ត្រាចារ្យរូបនោះគឺជាវិធានការថ្មីបំផុតរបស់រដ្ឋាភិបាលចិន ក្នុងការដាក់សម្ពាធលើសម្លេង និងគំនិតទាំងឡាយណាដែលផ្ទុយទៅនឹងគោលនយោបាយរបស់បក្សកុម្មុនិស្តចិន។
សូមរម្លឹកផងដែរថា កាលពីដើមឆ្នាំ ២០១៨ រដ្ឋាភិបាលរបស់លោក ស៊ី ជីនពីងបានធ្វើការកែប្រែច្បាប់ ដែលអាចបើកផ្លូវឲ្យលោក ស៊ី ជីនពីងកាន់តំណែងជាប្រធានាធិបតីដោយមិនកំណត់អាណត្តិ៕
អត្ថបទប្រែសម្រួលដោយ៖ សុភ័ក្រ
ប្រភព៖ CNN